Zo Vapual

Kan pekna thinlung hi dik hmasa thin rawh se

C. Lalmuankima

Newcastle, United Kingdom

Kan pekna thinlung a dik phawt chuan a dawngtu tan hlimna a nih mai bakah a petu tan a let tam taka malsawmna dawn letna pawimawh tak a ni. Kan pekna thinlung a dik phawt chuan kan pek tlem leh tamah a innghat lo va, kan pe tlem emaw pe tam emaw kan nun a hlim tlat a ni. Mi thil kan pek dawnin kan pekna thinlung a dik leh dik loh hi kan inenfiah hmasak a pawimawh hle mai. Kan pekna thinlung a dik loh chuan cheng nuai tam tak pawh pe chhuak mah ila, kan nunah hlimna min thlen belh chuang hauh lo nia. Chuvangin kan pekna thinlung hi a dik tawk em? Lalpa lawm zawng a ni em? tih te hi ngaihtuah tel fo a tha a ni.

Photo Google Image

Kan rilruin thilpek leh zel zelah chutianga thinlung dik hmasak a pawimawh kher chuang em ni kan ti mai thei. Hei hi a pawimawh khawp mai, kan pekna rilru leh thinlung a dik loh chuan cheng nuai tam tak pawh pe chhuak thei mah ila, keimahniah hlimna thuruk min thlen chuang hauh lo nia. Kan pekna rilru leh thinlung a dik erawh chuan dere pakhat chauh emaw pawh pe ila nun a hlim tel tlat a ni. He thil hi mi hausa leh hmeithai pakhat thawhlawm thawh atang khan a hriat thei a, entawn tur pawimawh tak kan hmu thei [Mk 12;41-44; Lk 20;1-4]. Lal Isuan mi hausate aia hmeithai rethei te tu emawin dar tangka dere a thlak kha a tam zawk a tihna chhan hi a hnuai lama kan chhiar thlak zel chuan kan hmu thei a.Mi hausate kha chuan an neih aliama mi thawhlawm bawmah an rawn chhung lut ruih ruih a, inkhawmte mithmuhah chuan a tam na ngiang mai, mahse in lamah an la kawl teuh thung. Hmeithai rethei te erawh chuan in lamah pawh kawl nei tawh lovin a intunnunna tura a neih chhun a thlak a, kha kha Lalpa tan chuan a tam em em a, inpekna sang tak a ni zawk a ni.

Lal Isua khan thawhlawm bawma an thawh aiin in lama a bang kha a en zawk a, mi hausate chuan in lamah khan a bang an la ngah lutuk a, Isua hmuhah chuan an thawh hnem lem lo. Hmeithai rethei te erawh kha chuan in lamah pawh a bang a nei tawh lo va, a intunnunna ngawih ngawih pawh a thlak avang khan Lalpa ngaihin a thlak hnem ber a ni. He mi atang hian zirlai i han la dawn teh ang. Lal Isua khan a pe tlem apiang a duh em ni ti ta ila, a ni chuang hauh lo. Hmeithai rethei te khan a pek tlem vangin Lal Isuan a lawmin a thlak hnem ber tiin a puang a ni lo va, in lama a bang zawk kha a ensak a, thawhlawm bawma thlak hnem berah a puang ta zawk a ni. Mi hausate kha chuan an thawhlawm thlak tam piah lamah khan an rilru leh thinlungah uang leh chapo an lo la kawl teuh mai a, chumi avang chuan Isua hmaah an thlak tamin awmzia a nei ta lo a ni. Keini pawh mite thil kan pek dawnin emaw thawhlawm kan thawh dawnin emaw keimahniah hian chapo tlat thin te, uang tlat thin te, hming that duh tlat thin miziate a awm em tih hi kan inenfiah hmasak fo a ngai. In lamah a bang kan lo la ngah lutuk chuan Lalpan pe tam list-ah min dah ngai lo vang. Kan pekna thinlungah hian uang leh chapo thin a awm a nih chuan pek loh law law kha a tha zawk a ni.

Mite hnena thil pek loh hi a tha e kan tihna a ni lo va, mite hnena thil kan pek dawnin kan pekna thinlung hi a thianghlim tawk em tih hi kan inenfiah hmasak fo a pawimawh hle a. Kan pekna thinlung a dik loh chuan keimahniah uanna leh chaponain min nei thuai a, mite chunga thil tha ber tiah kan inngai fo thin a, mi hausate thawhlawm bawma thawhlawm thawh angin thawh tam ber leh thil tha ti berah kan inngai. He mizia chapo leh uang thin tak hi Lalpa mithmuhah chuan thil tenawm ber a ni a, a huat ber a ni bawk.

Mite hnena thil kan pek dawn pawh hian tawngtainain mal kan sawm thin em tih hi kan pek hmain kan ngaihtuah nawn fo a tha. Kan thil pek tur kha a dawngtu tan anchhiaah a chang thei a, duhsak taka pe angin lang mah ila, a dawngsawngtu lamah hmelmain hna a thawh tlat chuan a chhiatpui ve thei bawk a ni. Chuvangin mite thil kan pe dawn a nih chuan tawngtaina nena hlan thlap hi a him ber a, a dawngtu tan pawh malsawmna a tling a ni. A dawngtu tana malsawmna ni lo tur chu pek loh mai pawh a tha fo vang. A pawimawh ber mai chu kan pek dawna kan rilru leh thinlung putzia kha a pawimawh hmasa ber a, chumi zawhah kan pekaten malsawmna an dawn phahna tur a nih theih nan tawngtaina nena hlan thlap kha a him bawk. Kan sawi tawh angin duhsak taka kan pek hian a dawngtuah chhiatna a thlen theih avangin chutiang thil a thlen loh nan kan pek hmain Pathian hnenah tawngtainain kan hlan hmasa ang a, tichuan chapona leh uanthuanna awm lovin tlang takin kan pe thin tur a ni. Chutianga kan tih phawt chuan a dawngtu tan hlimna a nih mai bakah a petu tan pawh a let tam taka malsawmna dawnna hnar pawimawh tak atan Lalpan mal a sawm thin a ni.

Kan pekna thinlung hi dik hmasa thin se la, a dawngtu tan malsawmna leh hlimna tam tak kan thlen mai bakah a petu tan pawh nun hlimna tam tak kan dawng tel bawk a ni. Hei erawh theihnghilh ngai suh ang che, khatiang tithei tura siamtu Lalpa Pathian hnena lawmthu sawi hi bang ngai suh ang che. Tichuan i pek chhuah dawnin tawngtaina nen Pathian hnenah hlan hmasa thin la, tichhetu leh eiraltu lakah Lalpan a vensak zel dawn che a ni. Peka hneh ban theih loh Pathian a nih avangin kan pek ngam chin chinah malsawmna a let tam taka vur turin a inpeih reng a ni. Lal Isua khawvela a lo kal lai khan amah ringtuten kan tih tur tam tak min hnutchhiah zingah Chanchin Tha hril leh thilpek hi a lang sar zualte an ni a, thilpek hmanga rawngbawlna hian nasa takin hna a thawk thei a; mite harsatna tam tak a su kiang thei a ni. Chuvangin kan thilpek chhe te hmanga Lalpan a lalram a zauh ve duh a nih chuan bang lovin i pe mawlh mawlh ang u. He leia kan thilpek hmang hian van ro kan khawlkhawm zel a ni tih hriain thilpekah i pe uar sauh sauh vang u. Kan pekna thinlung erawh dik fo thin se la, uang leh chapova pe lovin Lalpa tan thahnemngai taka kan pek phawt chuan nakina kan lawmman tur chu tuman min chhuhsak thei lo vang. Lalpa tan rinawm takin i pe zel ang u.