Zo Vapual

Fate malsawm thin Pa kan mamawh….!!!!

(II Samuela 6:20; Genesis 49:1-28; Johana 15:1-ff)

C.Lalmuankima

Newcastle, United Kingdom

 

Kan ram leh hnam hian Lal Davida anga fate leh chhungte malsawm thin pa kan mamawh a ni. Pate malsawmna atang hian faten malsawmna an dawng chhawng thin a, an hmuingil bawk thin. Fate an pate malsawmna dawng thin leh fate an pate malsawmna dawng ngai reng reng lo te hi khua reiah an lo inthlau thei dawn khawp mai.

Photo: Google Image

Fate hrawk nan chuan aw theih tawp kan chhuah a, fate malsawm nan kan aw hi engvangin nge a thawp leh sut thin ni? In ngaihtuah chian a ngai khawp mai. Pate malsawmna hi faten an dawn chak ber a ni a, pate malsawmna avangin fate hian malsawmna tam tak dawngin an hmuingil thei bawk. Thenkhat chuan, ‘‘Kei chu mipui hmaah pawh ka ding chhuak ngam ngai lo va, tawngkam ka thiam lo em mai, ka fate malsawmna pe thiam khawpin tawngkam ka thiam lo.’’ tiin zah na tur dik lovah kan zak thin a, hei hi kan tihsualna lian tak pakhat a ni reng a ni. Fate malsawmna hlan turin tawngkam thiam a pawimawh ber lo va, pek thiam hle pawh a ngai hek lo. I fate tana i duhsakna i tihlana malsawmna tawngkam i pek tluka tha kha a awm chuang lo va, chu tawngkam hnih khat lek chuan an damchhungin a hruai tawh mai dawn a ni. ‘Ka fate u, ka hmangaih che u a, Lalpa hmingin mal ka sawm a che u, in damchhungin lo hmuingil zel ula, in tuchhuan thlengin malsawmna tam tak lo dawng zel ang che u…..’ han tih mai kha mi tam tak chuan sawi chhuah harsa kan ti thin a, fate malsawm ngam lo leh fate malsawm ngai lovin mual kan liam leh mai thin hi a pawi tak zet a ni e. Thil tha tih na chang hre reng si a, kan tih loh hian a sawhkhawk lam lo thleng leh tur kan ngaihtuah thlen ngai loh vang a ni duh chawk reng a ni.

Evan Thlamuan Tharan a sawi pakhat ka duh deuh mai chu, ‘Keini Zofate zingah hian ‘ka tawngkam khat avanga chhe vek thei i ni’ tih tawngkam hi fate hrawk nan leh thu tawp sawi dawnin kan chelek thin a, a tha lo hle a ni.’ a tih hi a ni. Kan fate kan tawngkam khat avanga chhe vek thei an nih chuan engvangin nge kan tawngkam khat avang bawka kan faten malsawmna dawnga hmuingil thei an nih lam hi kan ngaihtuah tel thin loh le? In enfiah tur kan ngah hle mai. I tawngkam khat avanga i faten malsawmna leh hmuingilna chi hrang hrang an dawn theih dawn phawt chuan engvanga malsawm hreh viau nge i nih le? Fate tan chuan kan pate hi kan hero an ni a, pa dang chak leh tha pui pui, thil tithei tak tak te ai pawhin kan pate chu thil ti thei zawk leh chak zawkah kan ngai tlat thin a ni. Chuti chu kan fate hian an hma lam hun kal lehzel turah malsawmna dawnga hmuingil taka an lo awm zel theih nan malsawm fo hi a tha a ni.

Zofate zingah pa leh fa inkar inhla thin lutuk hian kan inlaichinna a tinghet lo fo thin a, inngainatna a tikiam thin a ni. Hnampui zawka kan ngaih Sapho zingah chuan pafaa inkawma hna thawk dun kerh kerh hmuh tur an awm zut a, keini Zofate zingah hian pa leh fa inkawma hna thawk dun kerh kerh hmuh tur an vang hle mai hi inzir tur kan la ngahzia tilangtu pakhat chu a ni phawt mai le. Kan hnathawh duhzawng leh kan hna chelh te a in ang lo a ni mah na, mahse pafaa inkawma infiam bawrh bawrh erawh kan zingah hmuh tur an vang khawp mai. An awm lo chu kan ti a ni hauh lo, hmuh tur an vang hle a ni. Pafa inkawma ti ti dun te hian pa leh fa inkarah inlaichinna a tinghet a, inngainat zualna a siam thin a ni. Chuvangin kan fate nen kan tui zawng a in ang lo emaw kan hnathawh a in ang lo a nih pawhin kan fate nena kan inlaichinna tinghet zual sauh sauh turin thu sawi dun te, infiam bawrh bawrh te hi tih fo a tha a ni. Chu chuan pa leh fa inkara karawl zau tak awm thin chu a pawt hnai ang a, karawl awm lovin a siam thei dawn a ni. Pa leh fa inkar karawl zau lutuk thin hi kan pawt hnai thin lo a nih chuan pa leh fa inkar karawl chu a lo zau telh telh ang a, a tawpah kan inlaichinna a chhe thei a ni tih hi kan hriat a tha khawp mai. Kan sawi tawh angin pa leh fa inkar karawl hnawh khat tur chuan hnathawh dun tam te, infiam dun tam te, inkawm tam te hi a pawimawh em em a, pa leh fate chauh ni lo kan thiante nen kan inkawm ngun na na na chuan kan inkarah inlaichinna nghet a awm thin ang hian thil tih dun tam fo hi pa leh fa inkara inlaichinna nghet siamtu a ni fo a ni.

Thenawmpain a fate a enkawl dan ang kherin i fate kha enkawl tum ngai suh ang che. Mi ten an thatpui apiang hi keini fate hian an thatpui ve lo mai thei. Chuvangin fate harsatna lai va hriatthiampui tuma thil tihpuia kawm tam fo hian an harsatna lai kan hriatthiampui ang a, a chinfel dan kawng kan zawnsak zawk tur a ni. Thil reng reng chu a kaida kan man thiam phawt chuan a chinfel dan kawng a lo awm zel a, kan fate harsatna lai kan hriatthiampui phawt chuan a chinfel dan kawng kan kawhhmuhin kan zirtir thei dawn tihna a ni. Chu chu Zofate zingah hian a nachang hriatlohna hian min bum tlat thin a, hemi lak atang hian kan tal chhuah a hun tawh tak zet a ni e. Fate zingah pawh mize in ang lo tak tak an awm dawn a, enkawl dan chungchangah pawh an mize mila enkawl thiam chu a ngai hle ang.

Zofate zingah mahni fate thil tha tih tur kawhhmuha Pathian thu hrilh keuh keuh hi kan vang hle mai, hei hi kan inenfiahna atan hmang ila, kan faten an tuchhuan thlenga malsawmna dawng thei zel tur leh kan chhungkaw hming titha zel tura awmtir kan duh chuan thu tha hla tha hrilh chu kan tihmakmawh a ni ta phawt mai. Pathian pawhin kan fate malsawmna pe thin turin min duh thu Jakoba nun atang hian a hmuh theih a ni. Jakoba chu a lo upa ta hle a, a thih hun a lo hnaih dawnin a fapa sawm leh pahnihte chu a koh khawm a, an hmingin mal a sawm hlawm a ni (Genesis 49:1-28). Hei hi zirlai atan kan lak thiam a tha hle mai. (Thih dawn hnaih khera malsawmna pek/hlan tur tihna a ni lo va, kan fate hi malsawmna kan pek/hlan fo a pawimawhzia thu tarlanna atan Jakoba tih dan hi kan rawn la chhuak mai zawk a ni....).

Pain malsawmna a pek/hlan thin fate chuan pain malsawmna a pek/hlan thin fate aiin  malsawmna an dawng nge nge thin a, an hmuingil bawk thin. Pate malsawmna hi fate tan chuan damchhunga hmuingilna rohlu tling a ni a, tuchhuan thlenga malsawm dawnna a ni tel bawk a ni. I fate sum leh pai, in leh lo tha pui pui i hnutchhiah aia hlu leh manto chu i nun dan kha a ni tih hi hre reng la, i fate entawntlakin hun hmang thin ang che. I fate sum leh pai, in leh lo tha pui pui i pe thei lo a nih pawhin i kain malsawmna i pe/hlan thei a ni tih hria la, chu chuan an damchhungin hmuingil takin a hruai zel dawn a ni.