Zo Vapual

Chawlhna nuam Krista nunah

(Sam 23:1-3; 62:5-7; 127:1,2; 4:8; Matthaia 11:28-30; Hebrai 4:9-11)

C. Lalmuankima

Newcastle, United Kingdom

"Kristaa chawl reng reng te chu taksain an chawl lo va, thlarauvin a ni an chawlh zawk ni."

Evan Hmingsawia

Krista atanga chhuak chawlhna nun ni lo hi chuan taksa leh rilru leh thlarau chawlhna famkim a thlen tak tak thei lo va, chawl ti siin kan hah tun tho a ni. Taksaa chawlhna piah lamah hian rilru leh thlarau chawlh hahdamna a la awm a ni, chu nun chu Kristaa chawlhna hi a ni. In ropui leh nuam tak takah inkhunga chawlin silh leh fen, ei leh bar lungkham ngai hauh lovin insiam thei mah ila kan taksa tan chuan a lo tha viau mai thei, mahse Krista nuna chawlhna tak takah kan chawlh loh erawh chuan in ropui leh nuam taka inkhung si hian nun khawhar takin kan awm ve thei thung.

Photo : Google Image

Lal Isuan Kalvari kraws-a min chhandamnaah khan taksa leh rilru leh thlarau chhandamna famkim a tel nghal vek a, kan thlarau chauh a chhandam lo va, kan rilru leh taksa pawh a chhandam tel a ni. Chuvangin Lalpaa chawlte chuan taksa leh rilru leh thlarauvah nun hahchawlhna famkim an nei thin. 'Ka thlarau a chhandam tawh tho alawm, duh duh ti mah ila a pawi tawh chuang lo...' kan tih chuan Chhandamnaah kan la chiang meuh lo tihna a ni ang. Pathian chhandamna chuan sual lam kawnga zalen turin min chhandam lo va, ama tana zalen taka nung tawh turin min chhandam zawk a ni.

Heti zawng hian ngaihtuahna siam ila ka va duh tak em! Lal Isuan min chhandamnaah khan harsatna te, manganna te, buaina te, lusunna te....adt. tawk tawh lo turin min chhandam lo va, a nuam zawng hlira awm tura chhandam kan ni hek lo. Nuam zawng zawng nei vek tura kan inngai a nih chuan kan tisual hle bawk ang le. Khawvela kan la awm chhunga khawvel thil nen kan la inkungkaih reng chunga nun hahchawlhna min pek hi a ni kan sawi ni. "Ka nghawngkawl bat ula, ka hnenah zir rawh u...." titu hian a nghawngkawl a nawma a phur pawh a zan thu a sawi tel a (Matt 11:29,30). A hnena kan chawlh avanga engmah phurrit nei tawh lo tur zawngi min zirtir hauh lo mai, phurrit nei reng chunga hahchawlhna lam a ni min zirtir zawk ni.

Hei tak hi a ni Chanchin Tha Thutak nun laipui kan sawi fo thin chu ni, miin engvangin pasalte ruang chungah pawh hlim taka Lalpa an fak theih thin? Engvangin nge an neih rohlu zawng zawng a boral veka an sumdawnna te an tlakchhiat vek hnu pawha Lalpaa an lawm thin? Engvangin nge accidence rapthlak tak an tawh lai pawha Lalpa hming an la fak fo? Ngati nge Tirhkoh hmasate ngei ngei pawh khan vuak leh velh an tawk chung leh tan in thuk thim taka an khung chung khan Lalpaah lawmthu an la sawi theih fo kan tih chuan Chanchin Tha Thutakin anmahni a thlen chilh a, phurrit tak nei reng chung khan an phurrit neihin anmahni a neih let tlat loh avangin an hun tawn apiangah khan Lalpa an lo fak thei ta thin a ni. Hei tak hi a ni Chanchin Tha Thutak laimu tak chu ni, kan hun tawn apianga Lalpaa lawmna tluka nun pawimawh hi a lo awm chuang reng reng lo. Kan phurrit phurh te hi keimahni i inneihtir thin suh ang u, keimahniin phurh i tum bawk suh ang u.

Lal Isua tel lo leh Lalpaa chawlhna ni lova phurrit neih chu mahniin kan phur a, a lo hahthlak em mai...! Chuvangin kan phurrit te mahnia phur tur chuan kan zo thin lo a ni. Engvangin nge mi tam tak hi beidawnga an kun ngawih ngawih a, mahni nunna lak duhna hial khawpa sualin a beih thin kan tih chuan anmahni phurrit kha anmahnia phurh an tum thin vang leh an phurh thin vang a ni. Phurrit nei lo mihring tumah kan awm lo, kan phurrit phurh len zawng erawh a in ang vek kher lo mai thei, eng ang tiat (size/shape) pawh lo phur thin mah ila Lal Isua nena phurh dun tluka hlimawm leh hahchawlhna nun hi a lo awm chuang lo. Lal Isua nen chuan kan phurrit phurhna nghawngkawl hi a lo zang ta thin a ni.

Nang leh keia harsatna te hi a tan chuan a te tham em em a, a pawimawh ber chu kan phurrit te a bula kan keuh thluk tawp hi a pawimawh a ni, tichuan ani nen chuan nuam takin kan phur thei ang a, kan tumram (vanram) chu hlim leh nuam takin kan thleng thei dawn a ni. Lal Isuan a chhawk theih loh khawpa phurrit hi a lo awm reng reng lo, mihring tih theih rual loh Pa thinung hial pawh han thawi damtu chuan nang leh keia phurrit te hi chu sawi tham pawh a ni lo vang. "Lalpa, he ka phurh mek phurrit hi i hnenah ka rawn keuh thlu leh tawp e, i hnenah ka rawn dah leh tawp e, keimah chauh chuan ka phur zo leh dawn lo. Chuvangin nangmah rinchhanin ka rawn dah leh tawp e...." tiin i tawngtai thin ang u, tichuan kan harsatna min tanpui tura inpeih reng Pathian chuan a hun tak zelah min lo chhawk zel dawn a ni.

Mi tam tak chuan kan phurrit te hi keimahnia phurh zawh kan inbeisei thin a, kan tum bawk thin. A tawp chu beidawnna mai a lo ni leh thin. Chuvangin kan phurrit te hi mahnia phur lo va Lal Isua nena kan phurh phawt chuan hah takin phur siin chawlhhahdamna nuam tak a lo awm thin a ni. "Pathian mite tan chuan Chawlhnia chawlhna a la awm ta fo va...." (Hebrai 4:9) a tih hian engdang mah a kawkin ka ring lo, Lal Isuaa chawlhna tho a ni a kawh ni.

Thuthlung Hlui hunlaia serh leh sang lama an inserh thianghlimzia chu kan hre vek awm e, hnahthel pakhat pawh chawi sawn hreh khawpin an inserh a nih kha...! Sabbath/chawlhnia an chawl chung khan an rilru/thlarau nun a chawlh ve tlat loh avangin chawlhna famkim Krista chu min rawn pe ta zawk a, nang leh kei atan pawh chawlhna nuam a lo ni zel a, Lalpaa chawlhna (Krista nuna chawlhna) atang hian taksa leh rilru leh thlarau chawlhna nun famkim chu a lo awm ta zawk a ni.

Ringtu nun hi a nuam zawng hlirin a kal lo va, hrehawm a lo thlen huna Lal Isuaa tlan luh na chang hria apiang te hian chawlhna nuam Krista nun chu an chang a, phurrit nei reng siin Lal Isua nen hlim leh nuam takin hun an hmang ta thin a ni. Lal Isua nen chuan eng anga phurrit pawh hi a lo zang thin a, nuam takin a phurh theih ta thin a lo ni.

Lal Isua nun neih avanga phurrit zawng zawng kiang deuh duak emaw nei tawh lo tawp turah chuan i ngai suh ang u, he khawvela kan cham chhung hi chuan mimal nun tak pawhin phurrit sawi tur neuh neuh chu kan nei vek dawn. Chutah tak chuan Lal Isua hnenah kan phurrit hi kan hlan thin em? Kan manganna leh beidawnna te kan thlen thin em? Ani nen chuan engtiang khawpa phurrit pawh hi a lo zang ta thin a, kan sawi tawh angin phurrit tak phur chung hian zang takin kan lo phur thei ta thin a ni.

"Pathian chak tak hnuaiah chuan intihnuai ula, anin a ngaihsak thin che u avangin in manganna zawng zawng ama chungah nghat vek rawh u." (1 Petera 5:7) Manganna zawng zawng ama chunga nghah hi kan tih tur hmasa ber chu a ni a, chu tak chu kan ti thin lo hian keimahniah nun chawlhna min siam thei lo thin a ni. Chuvangin fakna hla siamtuin a sawi angin,

‘I mangan a hnen thlen la, a nin a lo tanpui zel ang che’ tih hi nunin i sa thin ang u.Kan manganna te, kan phurrit te pek na chang kan hre thin lo leh mahnia phur ve phet kan tumna hian nun hahchawlhna kan neih loh phah thin. Lalpaah zel hian kan manganna te, kan phurrit te hlan zel ila, tichuan anin min lo chhawk zangkhaisak zel dawn a ni.