Zo Vapual

I part i hre chiang em?

C. Lalmuankima

Newcastle, United Kingdom

Mahni part lova kan sak hian zaipawl kaltluang lai a tibuai nuaih thei a, kan bula awmte tan kan hnawksak thei bawk. Zaipawlah chuan soprano te, contralto te, alto te, tenor te, leh a bass te a awm thin a, chung zawng zawng infinkhawm chuan zaipawl mawi tak a siam chhuak thin a, ngaithlatute tan ngaihthlak nuam tak chhuahin ngaihthlak nawn leh fo kan chak thin.

Photo: Google Image

Chutiang chiah chuan chhungkua pawh hi zaipawlin an lo tehkhin fo thin a. Chhungkuaah hian pa dinhmun te, nu dinhmun te, fate dinhmun te, mo leh makpa dinhmun te a awm thluah mai a, chung zawng zawng chuan mahni dinhmun theuh hriaa an tih tur an tihin chhungkaw duhawm leh entawntlak tak a siam chhuak thin a ni. Zaipawlah chuan mahni part ni lova kan sak chuan zaipawl a buai nuaih thin a, zaipawl a buai mai ni lovin ngaihthlak tlak lohvin a awm thin a, a tawpah zaipawl hlu lovah a chhuak thin. Chutiang bawkin chhungkua pawh hi mahni part theuhva kan sak lohva midang part-a kan va sak khan chhungkua inrelbawl dan a buai nuaih thin a, chhungkaw inpumkhatna tihbovin a awm vat thin a, a tawpah chhungkaw kehchhiatna hial thlengin rah tha lo tak a chhuah thin a ni. Chuvangin mahni part ni lova sak hi a pawi em em a, part dang kan tibuai nuaih thin angin chhungkuaah pawh mahni dinhmun theuhvah kan din chiah khan chhungkaw duhawm, mite ngaihthlak kham theih loh khawpa zaipawl mawi tak ang chhungkaw entawntlak tak kan lo siam ta thin a ni.

Chhungkuaah Pain a dinhmun a hriat lohva chhungkaw lu ber a nihna anga a dinhmun a luah zawh lohva mawhphurhna a lak ngam loh chuan kha chhungkua khan tlakhniam lam a pan thuai thin a, a tawpah chhungkaw tlakranna leh kehchhiatna thlengin a thlen thin a ni. Chhungkuaah chuan Pa a nihna angin chhungkaw mawhphurhna a la ngam tur a ni a, nupui fanaute rinchhantlak kulhpui a ni ngam tur a ni. Mahni nupui fanaute pawhin min thlamuanpuitlak loh khawpa chhungkaw Pa dinhmun kan luah ngam lo a nih chuan kan chhungkaw hma lam hun tur chu a ngaihtuahawm hle ang. Chhungkuaa Pa dinhmun hi thil awl chu a ni lo phawt mai, mahse chhungkua kan din tawh tawh chuan chhungkaw lu ber kan nih angin chhungkaw mawhphurhna kan la ngam tur a ni. Mahni mawhphurhna la ngam lo tute hi khawvela mi dawihzep ber te an ni a, engtikah mah an hlawhtling ngai lo vang.

Chhungkuaa Nu dinhmun pawh hi a awl lo hle mai. Nupui fel chu a pasal tan lallukhum a ni a, a man chu lunghlu sen tha mi aiin a hlu zawk a ni tih a nih angin pasalte hlawhtlinna hi nupuite chungah thui tak a innghat a ni. Chutianga inthlun zawm tlat kan nih avang chuan chhungkuaa Nu dinhmun pawh hi ngaihnep tur a ni hauh lo. Pasal zah leh fanau enkawl leh in chhung sekrek thil ilovah te hian nute hi an pawimawh em em a, fate enkawlna kawngah phei chuan pate aiin an pawimawh zualin an mawhphurhna a sang zawk a ni lawm ni tih tur khawpin nute hi an pawimawh hle a ni. Mahni dinhmun hriaa pasalte zah thiam nute hian chawimawi an hlawh fo thin a, thenawm khawvengte entawn an hlawh fo thin. Pa fel tak aiin nu fel tak te hian fate enkawl chungchangah an fate an enkawl puitling zawk a, fate harsatna chipchiar taka hriatthiampuitute an ni bawk. Fate nunkawng khalhngil tur leh chhungkaw nun siam tha tur hian nute hi an pawimawh hle a ni. D.L.Moody phei chuan, ‘Ka nuin min enkawl ang hian nu te hian an fate enkawl sela chuan Lung In hi a awm lo vang.’ tiin nute hi fate enkawl chungchangah an pawimawhzia a sawi chhuak hial reng a.

George Herbert thu sawi pawh hi chhinchhiahtlak tak a ni ve bawk. ‘Nu tha tak pakhat chu zirtirtu za khat tluk a ni.’ tiin nute zirtirna pawimawhzia a rawn tarlang a, nute hi fate enkawl puitlin kawngah chuan zirtirtu tha ber te an ni. Nu leh in chhung hi a inhlat tur a ni lo, nu leh in chhung a inhlat ni apiangah chhungkaw tlakranna a thleng thuai thin. Chutianga dinhmun pawimawh taka ding an nih an inhriat loh phawt chuan chhungkuain a tlakran phah thuai thin a ni.

Fate dinhmun pawh hi inzir tur tam tak a awm. Fate pawh hian mahni dinhmun an/kan hriat fo a pawimawh a ni. Tunlai thangtharte zingah sum leh pai kan dek chhuak dek dek a, kum lama tha thum tawh leh chakvak tawh lohna avanga hna thawk thei lo nu leh pate hmuhsit tumna leh tihduhdah duhna rilru a lo chhuak thin hi a pawi hle a ni. I nu leh pa chu engtiang khawpin lo tar chaklovin an tha thum tawh mah sela, nangmah hringtu leh chawm puitlingtu che an nih avangin i theih tawp chhuahin i zahin i enkawl thin tur a ni. Chu chu i tu leh fate thleng pawha i malsawm dawnna kawngkhar inhawnna tur awm chhun a ni bawk. Nu leh pate hmusit thin leh tiduhdah thin fate an hmuingil ngai lo va, an tluang ngai hek lo. Kan nu leh pate hi kan lei pathiante an nih angin an thu thuin kan awm zawk tur a ni. I nu leh pate khan hmun nuam taka i dah theih an phut kher lo vang che, i ngaihsak erawh chu an thlahlel hle thung ang. In leh lo nuam tak leh changkang taka i dah theih avangin i nu leh pa laka i mawhphurna i hlen emaw inti mai ngai suh ang che. In leh lo tha leh changkang taka i dah theih aiah khan i ngaihsakna leh duhsakna an chunga i lantir fo kha an thlahlel zawk asin! Chuvangin nu leh pate laka kan rilru puthmang pawh hi kan inzir fo a ngai a ni.

Mo leh makpa dinhmun a awm leh a, he dinhmun pawh hi zir turin a khat a ni. Mo fel leh mo sual inkar hi a lo hla thei dawn khawp mai. Mo felin hmun hla taka unau lainate a huikhawm laiin mo sual (mo fel lo) erawh chuan lam hnaia unaute pawh a hnawt darh thin a, thenawm khawveng lamin a um darh thin a ni. Movin a pi dinhmuna din a tum a, luah lan phet a tum tlat chuan chhungkaw kal dan a dik tawh lo tan a, a tawpah chhungkaw inthendarhna a thleng thuai thin. Chutiang bawkin a piin mo dinhmun a hriat thiampui bawk tur a ni a. Mo nena inkhing tawk rilru kan pu a nih chuan chhungkuaah rah tha a chhuak thei ngai lo vang. Rilru zau tak puta mo te harsatna lai hriatthiampui a, thil tha ber sawiho zel thin ila, chhungkaw hlim leh nuam tak kan din thei zel dawn a lo ni reng mai. Mo hi a enkawltu enkawl thiam dan azira sual thei leh sual lo thei an ni ve bawk a, pakhat leh pakhat inzah tawn hi chhungkaw member pumpuite kan that tlan theihna tur a ni. Member tin teah pakhat leh pakhat inzah tawnna kan tlakchham phawt chuan mahni duh dan danin kan kal ang a, chhungkuaah rah tha lo a chhuah thuai mai ang.

Chhunzawm leh atan....