Zo Vapual

Hlawhchhamna chu a hmaichhanah ngei en thin ang che....!

C. Lalmuankima

Newcastle, United Kingdom

Kan kawng zawhah hian inchhuih palh chang te kan nei thin a, tluk palh chang te kan nei thin. Chumi atanga thawh leh nachang hre lo te chuan an tum ram an thleng ngai lo vang. Kan hringnunah hian hlawhchhamna chi hrang hrang kan tawk thin a, kan hlawhchhamna tawh dan te chu a degree a in ang lo theuh mai thei. Chung hlawhchhamna chi hrang hrang chu min bawituah kan neih palh ang tih hi a hlauhawm a, chumi lak atang chuan tlan chhuak thin ang che.

Photo image; Google Image

I hringnunah khan vawi tam tak insawhin i lo tlu palh a ni mai thei e, chumi atang chuan tho leh thin la, a tawpah i tum ram ngeiah hruai thlenin i awm mai ang. Vawi khat i tluk avang khan tlu hlen vang vang turah in ngai ngai suh ang che. Tlukna hmun atanga thawh tawh loh hi a pawi em em a, tlukna hmun atanga kan thawh tawh loh chuan beidawnnain a salah min man nghal a, engtikah mah tho leh thei tawh lo turin hlawhchhamna khurah min hnuk lut ta thin a ni.

Eleanor Roosevelt-i thu sawi pakhat tha ka tih em em mai chu, ‘I remtihna tel lo chuan tuman an ngai hniam / hnuaichhiah ngawt lo vang che.’ a tih hi a ni. I hmaa hlawhtlinna kawng su kaw turin nangmah ngei kha i tling tawk a, engtik lai mahin indah hniam ngai suh ang che. Mite anga ti ve thei lo nia kan inhriat hian hlawhchhamna khurah thui tak ke kan lo pen tawh tihna a ni. Chu hlawhchhamna chu a hmaichhan ngeiah ding chunga kan en hnuah chuan mahniah inrintawkna te, chakna te kan lo nei ang a, hlawhchham hlauhna te tih bovin a lo awm bawk ang a, tichuan tih theih loh nia kan ngaihte pawh kan lo ti thei zel tawh dawn a ni.

Thil vawi hnih khat kan han ti a, kan hlawhtlin loh avangin hlawhchham berah kan inngai thin a, beih nawn leh a, tih leh hram hram lam aiin a tlanchhiatsan dan kawng kan dap a, thil dangah kan pakaisan thin. Hei hi keini Zofate kan hlawhtlin theih lohna bulpui ber a ni. Harsatna tlanchhiatsan hi harsatna chin fel dan tha ber a ni lo va, pehhel lova hmachhawn ngamna hi a chin fel dan tha ber a ni thung. Vawi hnih khat i hlawhchham avang khan hlawhtling ve lo turah in ngai ngai suh ang che. Thomas Elva Edison-a khan a vawi khat hlawhchhamnaah khan lo tawp san ta mai se la chuan vawiina electric current eng hi kan hmu kher ang em, hmu kher lo vang. Alexander Graham Bell-a khan tuna kan ngaihtuah ang chin chiah hi ngaihtuahin a vawi khat hlawhchhamnaah khan lo tawpsan ta mai se la khawvel telecommunications pawimawh tak tak te hi kan hmu kher ang em, hmu kher lo mai thei asin. Khawvela mi hlawhtling tak tak te hi an pian atanga rawn hlawhtling saa piang an ni bik hauh lo va, mi pangngaite aia tlem te an tih belh leh hlek thin khan hlawhtlinna a hlangkai ta thin a ni.

Hlawhchham kan la hlauh viau chuan hlawhtlinna kan la hlat hle tihna a ni ang. Kan hlawhchham ang a, kha hlawhchhamna kha min neituah kan hmang tur a ni lo, kha hlawhchhamna atang khan zirlai lain kan insiam tha zawk tur a ni. Hun kal tawha tihsual atanga insiamthat nachang hre lo chuan a hun hman mek leh hun lo kal turah pawh a insiamthat nachang a hre ngai lo vang. Mithiamten hun kal tawh hi inzirna tha ber a ni an lo tih angin kan hun kal tawha kan tihsualte kha insiamthatna atan kan hmang fo tur a ni. Khawvela mi hlawhtling ber ber te hi lo hlawhchham fo tawh te an ni a, hlawhchhamnain a phuar beh zawh loh te an ni thung. Hlawhchhamna chu menah an thlak a, an inphuar behtir lo va, a hmaichhanah ngei enin hnehna an puan khum thin a ni.

Photo; Google Image

Khawvel mi hlawhtlingten hlawhchhamna hneh tura an ralthuam hman te chu taihmakna te, chhelna te, dawhtheihna te, tumruhna te, beidawnlohna te, huaisenna te, rinawm taka nghah rei peihna te an ni a, chung ralthuamte chu vawiin khawvela mi hlawhtling ber berah a chherchhuak ta thin a ni. Naupan laiin kan thianten midang nen min chotuaha mi nen kan insual dawnin an mitah ngei kan en a, an chalah chil kan inhnawm hmasak thin. Chutianga tihmasatu huai zawkah kan inngai thin a ni. Chutiang chiah chuan hlawhchhamna chu a hmaichhanah ngei enin a chalah chil han hnawm siah mai la, nangmahah inrintawkna te, chakna te, huaisenna te i lo neih belh chhah ang a, tichuan hlawhchhamna chu ngam takin i hmachhawn tawh mai dawn a ni.

Kan hlawhtlin theih loh chhan bulpui ber te zing ami chu hlawhchhamna hi a hmaichhanah kan en ngam thin lo va, vawi hnih khat kan hlawhchham a, hlawhchham ber anga kan inngaih thin vang a ni. Vawi hnih khat kan hlawhchham avang khan hlawhchham ta luaah inngai lo ila, kan tanhmun kan rem tha leh sauhvah ngai ila, tichuan kan tlukna hmun atanga tho leh zak zak thei turin chakna thahrui neih belh zel bawk ila, tichuan hlawhtlinna tlangah kan lawn liam ve thei ang. A pawimawh ber chu tlukna hmun atanga thawh leh a ni.