Zo Vapual

Tlangsam par rinawmna

C. Lalmuankima

Newcastle, United Kingdom

Tlangsam par ( Google Image )

Tlangsam par hian Lal thar lo piang tur lawmin kum tin par hun bi neiin an par thin a, mihring thinlung hi chu kum a zirin a danglam thei thin a; a kum a tel mai ni lovin darkar tin, minute tin, second tin maiin a danglam thin a ni. Tlangsam par erawh chuan a par hun a theihnghilh ngai lo va, a danglam ngai bawk hek lo va. Khawvel mihringte chhandam tura Lal thar lo piancham phaphak a lo thlen dawn apiangin a par hun theihnghilh lovin mawi takin a rawn par chhuak thin a ni.

Pangpar dang angin rimtuina leh mawi chungchuanna a nei lo va, tlangsam par hmu thin chuan kan hre vekin a rinawm, amahah hian pangpar dang anga rintuina nei lo mah sela, a par hun bi thulh lovin vawiin thlenga rinawm taka Lal thar lo piang tur lawma a mawi thei ang bera a rawn par chhuak thin hian pangpar dangte aia a rimtui loh bikna leh mawi loh bikna a awm hauh lo, a par hun hi a hre em em a, a par hun hi a fuh bawk a, Lei leh van lalber piancham phaphak a lo thlen dawn apianga rinawm taka a rawn par chhuak thin hian a tihlu lehzual a, pangpar dangte aiin par hun a hria kan ti lo thei lo vang.

Tlangsam par aia par mawi leh rimtui sawi tur tam tak a awm teuh vang a, a ni aia hmun ropui tak tak luah thin par dang sawi tur a awm teuh bawk ang. Pangpar then khat te chu lal in zau leh nuam takah te, in ropui leh tha tak takah te, hmun mawi leh nuam tak takah te awmna hmun tha changin a khawitute tan an parmawina leh rimtuina chhuahin a khawitute nun a tihlim em em thin a, tlangsam par erawh Lal in nuam leh zau tak tak te, in ropui leh tha tak takah te, hmun mawi leh nuam tak takah te awmna hmun chang ve lo mah sela, a par hun bi theihnghilh lova Lal piancham phaphak a lo thlen dawn apianga rinawm taka a rawn parchhuak thin erawh hi chuan par dang zawng zawng te aiin Zofate thinlungah hna thawkin hlutna riau a nei a ni. Awmna hmun (a lo chawrchhuahna hmun) a uluk lo hle mai a, hnim hnawk bawn leh champang karah te, hnimbuk leh hlingtawm karah te, ram palaileng tak leh mual pawngah te, hnim hnah kar leh phulah te, khamrang karah te a rawn to thin a. A tona hmun uluk lo hle mah sela, a hun takah Lal thar chibai buk tura rinawm taka par a rawn chhuang thin erawh hi chuan thinlung a hneh hle a ni.

Tlangsam par hian pangpar dang angin par rimtui viauna leh mawi chungchuanna nei lo mah sela, Zofate thinlungah chuan Bethlehem lam min hawitirtu pangpar pawimawh tak a nih avangin Zofate rilruah hmun pawimawh tak a luah tlat a ni. A ni aia par mawi leh rimtui tak tak sawi tur a awm teuh vang a, a lo parchhuah hun hian a zir em avangin Mizote thinlungah chuan Bethlehem-a Lal lo piang hmuak tura kan thinlungte Bethlehem lam min hawitirtu pangpar hlu tak a ni.

Masi a lo thlen dawna ‘Tlangsam par’ kan rilrua a rawn lang ang hian Sapho pawhin Kristmas dawn hi chuan vur (snow) hi an rilruah a lang lian ber a, White Christmas hi an ngai pawimawh hle a ni. Thlasik khaw vawh vur tlak hun leh Bethlehem-a Lal thar lo piang champha hi a lo inmil chho zel a, mi thenkhat phei chuan thlasika vur a tlak vak loh phei chuan thlasik hmangah pawh an inngai meuh lo. Chuvangin thlasik a lo thlen hi chuan vur tla ngei ngei turah an ngai tawp a, thlasik vur tlak hun hi December-January te a nih deuh thin avangin Kristmas hunlai tak hian vur a tlak duh em avangin ‘White Christmas’ hian an rilru a luah khat hle a ni.

Tlangsam par hian Mizote thinlungah dinhmun pawimawh tak a lo luah a ni kan tih tawh kha….! Upa dan takin kan naupan lai chuan han ti ve khanglang ila; Tlangsam a lo par tan tawh hi chuan ‘Masi a hnai ta’ tiin rual ute leh nu leh paten min hrilh thin a, a chang chuan ‘Masi/Mas Par’ ‘Masi Pangpar’ te pawh kan ti thin a ni. Hmanlai kan pipute pawh khan hunbi leh kum chhiar nan tunlai angin Calendar leh thil dang ziaka han chhinchhiahna an la nei ve lo va, an chheh vela thil thleng eng eng emaw ni hmangin an lo chhinchhiah ve thin a, an rilruah a fiah em em thung. Chutianga an rilrua an lo chhinchhiah tlat thin chu a hun taka par rawn chhuang chuan an rilru ngaihtuahnaah Bethlehem lam a hawitir tlat a, an thil hmuh khan Kristmas hnaihzia inhrilhfiah ngai lovin a tifiah nghal tawp a ni.

Tlangsam par (masi par) hi pangpar dang angin rimtuina leh mawi chungchuanna nei lo mah sela pem thar damdawi atan a tha hle mai a, kan naupan laiin pem thar kan neihin a hnah hi kan nuai sawk sawk a, pemtharah chuan kan sawr/hnawih a, thisen chhuak tam lutuk tur kha a titawp/dang ve tlat thin. A hnah erawh a rim tui viau lem lo va, rim nger ngeuh deuh a neih avangin thil rim na ngai na lo tan phei chuan luak tichhuak ngawih ngawih hi a ni ringawt.

Par chhuah hun hi a thlang thiam em em a, kan tana nausen lo piang tur piancham phaphak hunah tak rinawm taka rawn parchhuakin kan thinlung Bethlehem lam min hawitirtu pangpar pawimawh tak a ni. Pangpar dangte chu rimtuiin mawi chungchuang viau mah sela Tlangsam par tluka Bethlehem lam min hawitir thei khawpa zun nei an awm chuang lo. Tlangsam par erawh chuan Bethlehem lam min hawitir a, kan tana Lal thar lo piang tur chu chibai buk turin min inbuatsaihtir thin a ni. Zofate thinlungah chuan tlangsam par leh Bethlehem hian inzawmna thuk tak nei hian ka hre thin. A chhan chu tlangsam par hmuh apiangin rilruah Bethlehem lam a lo lang tel ve tlat zel mai a, hei hi a tihlutu pakhat chu a ni ve chiang alawm....!