Zo Vapual

Kalvari Ennawm [2018 Good Friday Pual]
(Isaia 53:4-6; Luka 23:47-49; 1 Korinth 1:18; Kolossa 3:1-4)

C.Lalmuankima

Newcastle, United Kingdom

"Hmangaihtu tan chuan hmangaihte che vel hi thil dang zawng aiin a hmuhnawm ber a ni."

Photo Google Image 

Hmangaihtu Pathian tana hmuhnawm ber leh a en kham theih loh chu a fapa Isua Kristan a thu zawma Kalvari krawsa a thisen luang ral raiha misualte min tlanna hi a ni. Khawvelah hian mihringte ngaiha ennawm leh thilmak leh ropui tak tak sawi tur a awm teuh mai thei. Kan Pathian tan erawh chuan a fapa thiltih tluka Pathianin a lawm leh ennawm a tih thil dang a awm chuang lo (Matt 3:17; 17:5).

Rev. Vanlalzuata chuan heti hian a lo sawi a, "Thil reng reng keimahni kan inhmuhna hi chu ennawm a tling thin." tiin. A dik hi ka ti teh e. Thlalakhonaah te, chanchinbua hming list-ah te, video-ah te kan tel vena chu ennawm kan tizualin kan hlut thin a, mi tam tak karah pawh mahni awmna zawn kan zawng tang tang thin a, kan rilruin kan chhinchhiah deuh bik thin a ni. He Kalvari Ennawm danglam bikna pawh tuna kan sawi tak hi a ni, he ennawmah hian nang leh kei kan tel ve a; Isuaah khan (Kraws lera a thihnaah khan) keimahni ngei kan inhmu tel tlat hi a ni. Chu chu a en thiam ve lo tan chuan a atthlak em mai lah tak a, sawichhiat bak loh chu tih tur dang awm hek lo le. Mahse a en thiam tan erawh chuan a hmuhnawm em em thung a, en tawh hnu pawhin ennawn leh fo kan chak thin. Chu chu fakna hla siamtu Rev. Liangkhaia hian a hmu chiang hle a ni ang, ‘I Lalpa kraws lera awm chu nungin i va hmu ang…’ tiin a lo auchhuahpui hial a nih kha. Kraws thiltihtheihna hrechiangtute chuan Lal Isua kraws lera a thihnaah khan anmahni an inhmu let a, an thih aia thia khan a nunsak leh zawk thu an hmuh tlang thiam avangin Lalpa chu nungin an hmu ta thin a ni. Thil danglam tak hmuh tum ngai suh ang che, nangmah ngei kha inhmu thin la; Lalpan i aia a tawrhna hlutzia hi i hmuh thiam ni apiangah Kraws lerah khan Isua thi tawh lovin nangmah ngei i thinzia thu kha i hmu thiam tawh ang.

Thil azawnga hmuh hrehawm ber leh hmuh nuam lo ber mai chu mi na tuar lai hmel hmuh leh mi thi tur thih sual mek en hi a ni awm e. Lal Isua pawh kha kan natna zawng zawng phurin kan lungngaihnate pawh phur telin (Isaia 53:4), mihring nihphunga a mawina zawng zawng pawh vuakna vualtea tihchhiatsak a ni a, kan aia hrehawm tak leh lungngai taka a tuar lai hmel kha khawvel mitah chuan thil hmuhnawm tak chu a ni lo phawt. Mahse khang lungngaihna leh tihduhdahna leh sawichhiatna zawng zawng pawh a Pa thu awiha Kalvari Krawsa thi khawp hiala a tuar chhuak thak mai kha Pa Pathian tan chuan thil azawnga hmuh nawm ber a tling a, khawvel mite tan chuan atthlak tak ni mah sela amah ringtute tan chuan kan Chhandamtu leh Chatuan Puithiam leh thiltihtheihna a ni ta zawk a ni.

Chu kraws thu chu khawvel mite tan chuan a en dan an thiam ve loh avangin a atthlak em a, keini chhandam mek te tan erawh chuan Pathian thiltihtheihna a ni thung (1 Korinth 1:18). Chu Krawsah chuan Isua an khenbeh hmel chauh hmu tawh lovin keimahni ngei pawh min lo khengbet tel ve a ni tih kan va hmu a, chu mahni ngei kan inhmuhna chu a hmuhnawm em em tawh mai a ni. Kraws thiltihtheihna thuruk hi a hmu thiam tan chuan mahni ngei kan thihna a ni tih an hria a, khawvel thilin a rawn kraws chat chatna kha an hre chhuak fo thin.

Chu Kalvari ennawm chu a entute apiang tan damna a ni a, Isua hi miin khawi hmun atang pawhin en mah sela an tan damna a tling vek a ni. Isua hi khawi hmun atang pawhin en mah ila hmuhnawm a tling vek a, natna khirhkhan ber kan tawrh mek lai te, thihna hlim kawr ruam kan zawh mek lai te, kan sumdawnna a tlakchhiat rup rup lai te....etc. pawh hian a hmuhnawm hlei hlei a, a entu apiangte tan damna a ni. He Kalvari Ennawm danglamna chu en tawh leh hmuh tawh a awm ngai lo va, a en tawh leh hmu tawh te pawhin nitina en leh hmuh an chak thin hi a ni. Kraws lera mahni ngei kan va inhmuh telna hi a hmuhnawmna tizualtu pakhat a ni a, en zawh pawha ennawn leh kan chak fo thin.

Photo Google Image

Rinhlelhna chuan chhumpui angin min hual mup mup lai hian kan rinna siamtu leh tifamkimtu lam chu thlir chung zela ke pen turin Hebrai lehkha thawn chuan min fuih a (Hebrai 12:1), chung lama thil awmah te chuan rilru nghat tlat turin Kolossa lehkha thawn chuan min chah ve bawk a ni (Kolossa 3:2). En tur dik kan en fo erawh a pawimawh hle ang. En tur dik kan en thin loh avangin kan nunah harsatna tam tak kan tawh phah chang a awm a, chumi hmun atang chuan Isua lam chauh thlir turin i inbuatsaih thin ang u. Chumi hmun atanga kir leh nachang hre lo te chu sualin a nei hlen thuai thin. Chuvangin Lalpa lam hi i en tlat ang u, Lal Isua lam en tlattute an mualpho ngai lo va, mualpho a hnekin Pathian Thutak hmanga thawm khahin an lo awm thin zawk a ni. Pathianah han innghat mah teh, i mamawh kawng engkimah Amah chu a rawn tang tawh mai ang.

Khawvelah hian ennawm hmuhnawm tam tak leh thilmak leh ropui tak tak hmuh tur a awm teuh mai thei. Chung zawng zawng aia hmuhnawm leh mak leh ropui ber mai chu Pathian fapa meuh mihringa rawn changa thi khawp hiala a Pa thu zawma keini misual ber te tana a thia a thawhlehna hmun ngei mai hi ringtute tan chuan a hmuhnawm fo thin a ni.