Zo Vapual

Him taka min awmtir thintu Pathian thu

(Sam 4:7,8; 46:1-3; 18:2,19; Kolossa 3:1-3)

C. Lalmuankima

Newcastle, United Kingdom

"Pathian chu kan inhumhimna leh kan chakna, mangan laia tanpui vartu hnai reng a ni." (Sam 46:1)

Khawvelah hian himna tluantling hi a lo va awm lo tak em! Kan himna leh innghahna atana kan hman mek te hi eng eng emaw vang chauhva inhamtang ve tang tang te kan la ni a. Heng kan eng eng emaw vanga kan innghahnate hi a boral ruala chhe vek thei kan ni tlat mai!

Photo Google Image

Tunlai khawvel finna leh thiamna a sang tual tual a, hriatna a pung tual tual bawk a, a ralmuang lo tual tual a, himna a awm lo tual tual bawk a ni. Ram pakhat leh pakhat inngurin intichhe thei vek dinhmunah kan ding ta reng mai. Ralthuam nei tha ramten hmun hrang hrangah an ralthuam thatzia entirna remchanga hmangin kut an thlak a, kan chenna khawvel hi a tiralti sawt em em bawk. Chuvangin tunlai khawvel finna, thiamna leh hriatna changkang ber ber te hi inhumhimna leh innghahna atan a tlak loh va, ram pakhat leh pakhat inlaichinna a derthawn ni apianga intichhe thei vek te kan ni ta.

Chutiang thil te chu kan tunlai khawvel boruak tawn mek te a nih avangin chatuana himna kulhpui min pe theitu lam hi kan hawi tlat a pawimawh reng a ni. Pathian thu atang lo chuan himna tluantling hi a awm reng reng lo va, mihringin kan him tawka kan inngaih pawh hi a tawpah chhiatna a lo thleng leh thin. Lalpa Pathian atang lo chuan himna tak tak min thlen theitu an awm chuang lo. Ralthuam tha ber ber leh changkang ber ber pawhin inkulh khat vek mah ila, Pathian remtihna tel lo chuan kan him chuang lo a ni. Chutiang zelin Pathian thu lo chuan mahni chauh pawhin awm mah ila kan lo him chuang reng reng lo bawk. Pathian thu lo chuan mahni chauhva awm pawh hi a him chuang lo va, ngaihtuahna sual chi hrang hrang ngaihtuahin hreprukna leh thil tha lo tak tak kan ngaihtuah thin a, mite tana harsatna thlen thei tur thil mak sak tak tak kan ngaihtuah fo thin. Chuvangin Lalpaah zel hian kan himna a awm a, Lalpa atanga kan tawlh bo ni apiang mai kha kan himloh ni a ni ta thin a ni. Pathian thu atanga kan tawlh sawn ni apiangah sual miziain min zuam thin a, min thlem thin a, a tawpah a salah min man let thin.

Sam ziaktu hian a rin Pathian hi a hrechiang hlein ka hria. LALPA chu a chakna, a lungpui, a kulhpui leh amah chhanhimtu a nih thu a auchhuahpui a (Sam 18:1-2), chumai duh tawk lovin mangan lai ber pawha amah tanpui vartu hnai reng a nih thu a puang chhuak bawk a (Sam 46:1-3), LALPA chauh hi mahni chauh pawha him taka awmtirtu a nih thu a sawi chhuak hial a ni (Sam 4:8). Kan sawi tawh angin Pathian thu tel lo hi chuan khawi lai hmun mai pawh hi a lo him reng reng lo mai a, Lalpa Pathian thuin a thlen chilhna hmun apiang erawh chu hmun him leh ralmuang a ni thung. Tichuan Lalpa Thlarau awmna apiangah chuan zalenna a awm thin bawk a ni (2 Korinth 3:17). Chu chu miin a hriatchian phawt chuan khawi hmun mai pawh hi LALPA Pathian fakna hmun atan a hmang thin a, Lalpa Thlarauvin a thlen chilhna hmun apiang mai kha hmun thianghlim Pathian fakna hmun zalen atan a hmang thin a ni.

Lalpa Pathian tel lo chuan keimah chauhva ka awm pawhin ka him zo lo va, ngaihtuahna sual mizia chi hrang hrang leh sual tihchakna thinlung lian tak a lo chhuak thin. A changa mi awm mai mai rel chakna leh mi chunga rilru chhe tak put chang te pawh a awm. Ka mizia hi sual lam awn reng a nih avang tak hian a ni Lalpa hi ni tin, darkar tin, minute tin, leh second tin maia ka mamawh ni. Pathian thu lo chuan keimah leh keimah hi ka inthuhnuai theih loh avangin ka mizia sual tak (a remchan dan azira min bum tum ran….) min hnehsak zel turin second tin Lalpa mamawhtuah min siam a ni. Midang nun chan ka sawi lo va, keimahah chuan ka mit khap kar tin leh ka ke pen tin mai hi sual lam kawnga pen lo turin Lalpa ka mamawh niin ka inhria. Chuvangin kan nitin nunah hian Lalpa tel lo chuan kan him zo thin lo a. Lalpa Pathian a tel erawh chuan mahni chauh pawhin awm mah ila, him takin ka awm leh thin a ni tih hi ka hre chiang a, Sam ziaktu sawi ang hian mahni chauh pawha him taka min awmtir thintu chu Pathian hi a ni.

Photo Google Image

I mihringpuite lakah pawh him lo angin i inhre mai thei, mahse Lalpa Pathian hi nang leh kei atan pawh hian kan himna Pathian nih a tling a, amaha rinna nghat leh amah nghaktute chu mualphovin an awm dawn lo va, tlakchham reng reng a awm dawn lo bawk. (Sam 25:3; 34:8-9) Mahni chauh pawha him lo anga kan inhriat ni apiangah Lalpa Pathian khi bel thin ila, a angchhungah khian tlan lut tawp zel ila, tichuan a thlazar hnuaiah min dahin hmelmate khawih theih loh turin min lo humhim zel dawn a ni. Mahnia him lo nih inhre reng chunga Pathiana tlan luh nachang hre lo kan nih chuan sual miziain min nei thuai thin a, a tawpah a salah kan tang leh nge nge thin. Chuvangin keimahnia him lo nia kan inhriat ni apiangah LALPA Pathianah zel khian tlan lut thin ila, tichuan a ni chu kan himna kulhpui a nih angin thlipui leh ruahpui anga hrang thin sual lakah min lo chhanhim zel dawn a lo ni reng mai. Lalpa chauh hi mahni chauh pawha him taka min siamtu Pathian a ni a, amah bel tlattute chu an mualpho ngai lo va, a kalsan ngai hek lo. Pathian bel tlattute leh amaha innghat tlattute an mualpho leh ta tih kan hre ngai lo va, Lalpa belh na chang hre lo leh bel duh lo te bawk hi an ni mualpho leh thin ni. Nang leh keia Pathian nih a zak lo hrim hrim pawh hi nihlawh i inti ve thin em? Heti khawpa kan sual chung chung leh tluk leh tlak kan fawm chung chung pawha kan Pathian nih a zak lo hi kan vannei tak zet a ni. Kan sual ang angin min thungrul nghal zel dawn se la chuan vawiin hun hmang thleng thei kan awm tawh lo vang, mahse a khawngaihna avanga vawiin thlenga a khawngaihna min la chelh dinsak hi kan vannei tak zet a ni e. Khawvel tawp thleng pawha kan hnena awm zel a la intiam leh nghal a, hei tluka thu thlamuanthlak a awm chuang awm lo ve (Matthaia 28:20).

Sual mizia inlar thin laka kan himna awm chhun pawh Pathian Thu hi a ni a, amahah zel hian rinna nghatin amah hi bel tlat zel ila kawng engkimah kan tisual ngai lo ang a, kawng engkimah kan him zel dawn a ni. Kan rin Pathian ngei hi mahni chauh pawha him taka min awmtir theitu Pathian ropui ber a ni a, a lak atanga tawlh sawn tum erawh chu chatuana boralna a ni thung. Lalpa khi i bel tlat zel ang u, tichuan himpuitlak Pathian a nihzia hi kan hmu chho telh telh dawn a lo ni reng mai.