Zo Vapual

Hnam Lungphum Thalaite

Martin L. Chhakchhuak

Newcastle

United Kingdom

Lungphum nghet pawimawhzia hi in hrilhfiah leh chuan ngai lovin kan hre tlang vek awm e, Lungphum nghet a awm loh chuan a chungah in tha leh ropui tak tak te a sak theih loh va, lungphum a ngheh tawk loh chuan miin an lo sak sa pawh a hnuk chim leh thin. Chutiang bawkin hnam lungphum a ngheh loh chuan ram leh hnamin a tawrh phah thin a, a tawpah ram leh hnam chhiat rupna a thleng ta thin a ni.

Photo : Google Image

Ram leh hnam lungphum innghahna hi Thalaite ah thui tak a innghat a, Thalaite hi ram leh hnam siamthat thu ah te, venhim thu ah te, tihchangkan leh tihhmasawn kawngah te a thawh hlawk ber ber te zinga mi an ni a, Thalaite ke penna lam apiang chu khawvel nih phung leh nih dan tur emaw tih tur khawvel hian kan zui dul dul ta a nih ber hi maw......!

Hmanlai kan Mizo pipute nun hlui kha han thlir let lawh teh ang. Thalaite ah an innghahzia kan hmu thei a ni. Entirnan : Khawtlangah sa a tlakin emaw ral khel dar (raldo) a lo rikin emaw thalai rual te chuan mahni awm hmun atangin Zawlbuk lam an pan khawm a, chutah Val Upate nen ral khelh dan tur an rel ho thin a, sa hrang leh ral lakah khawtlang an lo chhanhim ta thin a nih kha. Thalaite hi sa hrang leh ral laka ram leh hnam inhumhimna kulhpui an ni a, an tel lovin khawtlang a him lo a ni.

Kut ni vangthla a lo herchhuah chang pawhin Thalaite hi kalkhawm mipuite tihlimtu leh kut tihhlawhtlingtute zinga pawimawh ber ber te an la ni zel a. An tel lovin kut ni vangthla hlawhtling a awm thei ngai lo a ni. Thalai awmlohna khawtlang chu sa leh ralin an zuam a, a tawpah an thuhnuai fo thin.

Chutiang zelin chhungkuaah pawh hian Thalaite hi chhungkaw innghahna pawimawh ber ber te an ni a, Thalaite tel lovin chhungkua hian ke a pen tak tak thei lo. Chhungkuain kan thlamuanpui ber pawh Thalaite hi an ni tlat. Chhungkuaa Thalai awmlohna chu a khawhar tlawk tlawk a, miten an zuam fo thin bawk.

Kan sawi tawh angin Thalaite ke penna lam apiang hi khawvelin a nih dan turah a ngaih theih ta a, tunhnu khawvel lo awm lehzel tur pawh Thalaite kutah a innghat a ni. Khawvelin a neih ro hlu ber ber te zingah chuan Thalaite hi an buk a rit ber an ni awm e, khawvelin a chhuan tur neih zawng zawng zinga hlu ber leh tha ber leh pawimawh ber an ni bawk. Thalaite tel lo chuan khawvel hi a tlei thei lo a ni. Chumi tifiah turin (hrilhfiah leh chuan a ngai awm lo ve.....) khawvel sumdawnna peng hrang hrangah te, khawvel finna leh hriatna, thiamna sang zirnaah te leh infiamna (games and sports) kawng tinrengah te, rimawi khawvelah te .....adt....hian Thalaite hian hma an hruai a, khawvel mipui hi min tihlima min awitlei a; an tel lovin sera mu kan thur thei lo a ni ber e.

Kawng leh lamah chuan Thalaite hi ram leh hnam thlamuantu, siamthatu, chhanhimtu leh chawimawitu an nih rual rualin ram leh hnam tichhetu, tihmelhemtu, rawktu leh tibawrhbangtu an ni ve thei bawk. Thalaite nunah hian ram leh hnam innghahna lungphum hnukpui a awm a, chu ram leh hnam innghahna hnukpui chu a chelh dan kan thiam loh ni apiangah ram leh hnamin a tawrh phah thei a, ram leh hnam chhiat rupna pawh a thleng thei a ni. Vawiin nia kan ram leh hnam innghahna lungphum Thalaite hi an rinawm lohva an nun a chhiat viau chuan naktuka thang leh thar lo awm tur ten an 'nakin hun' tur sawi tur an nei ve tawh lo vang. Thalaite hi ram leh hnam innghahna, ram leh hnam lungphum, ram leh hnam nun vawngtute an ni a, tuna kan ram leh hnam innghahna lungphum hi a chhiat mai loh nan leh kan hnua thangthar lo la awm zel tur ten min mawhchhiat mai loh nan kan puanven te sawichhingin ram leh hnam tan țan i la zual sauh ang u.

Lungphum nghetah chuan in tha leh ropui tak tak a sak theih angin vawiina Thalaite hi ram leh hnam lungphum innghahna pawimawh tak an nih angin kan Thalaite nunah hian chi nung tuh ila, ram leh hnam innghahna tlakin chher chhuak bawk ila; ram leh hnam ropui leh thiltithei khawvel hriat khawpa ropui kan din thei dawn a ni.

Vawiina Thalaite hi naktuka ram leh hnam hruaitu tur te an ni a, ram leh hnam innghahna pawh an ni e.