Zo Vapual

Kohhran leh chanchin tha hril (Mission)
(Tirhkohte 1:8; 10:36; Marka 16:15; Matthaia 28:19; Rom 10:13-15.)
C. Lalmuankima
Newcastle, United Kingdom

Lal Isua he khawvela a hringnun a chan laia a ngaih pawimawh leh thupui ber mai chu Chanchin Tha hril hna a ni a, chanchin tha avanga mi zawng zawngin nun an neih theihnan (Johana 3:15) a nunna hial pawh kraws lerah mualpho taka khenbeha thlan thuk thim taka phumin a lo awm a, ni thum niah kaih thawhin a awm leh ta a nih kha...!

Photo : Google Image

D.L.Moody - a thu sawi ka duh em em pakhat a awm a, engnge kan tih chuan,"Ka thil hriat zawng zawngah Chanchin Tha hi a tha ber a, chuvangin thil hi ka sawi dawn a nih chuan chanchin tha hi ka sawi tam ber tur a ni." a tih hi a ni. Tha ka va ti tak em...! Keini hi engnge kan an ve le..? Kan ka atang hian chanchin tha hi a chhuak tam ve reng em? Chanchin Tha aiin mite hmuhsit leh tawngkam bawlhhlawh /mawi lo leh mite chhiatna lai sawi nuam tia relna tawngkam kan lo chhak chhuak fo thin te a ni lo maw...? In enfiah a va tha em......

Pathian hna pawimawh ber mai chu khawvel zawng zawngah kala chanchin tha hril a ni (Marka 16:15) kan tih tawh kha. Hei hi thupek a ni a, thupek reng reng chu tih ngei ngei tur a ni. Amaherawhchu khawvel zawng zawngah kalin kan fang chhuak thei kher lo mai thei. Mahse kan sum leh pai hmang te hian chanchin tha erawh kan hril ve thei a ni. Mission field ah kalin kan hun pumpui kan hmang thei lo a nih pawhin kan sum leh pai leh tawngtaina hmang pawhin chanchin tha hi kan hril thei a ni tih hi i hre thar leh ang u.

Mission field kan sawi chho ta zel a, Mission rawngbawlna hi a pawimawh em em a, kohhran leh mission rawngbawlna hi a kal tlana a inkawp tlat loh chuan kohhran hian hma a sawn thei lo, kohhran hian mission rawngbawlna hi a hna pui ber leh a tih ngei ngei tur a din chhan a ni. Kohhranin Mission rawngbawlna a hlamchhiaha a thlauhthlak ni apiangah kohhranah ngetna leh rona a lo thleng ta thin a ni. Mission rawngbawlna hlamchhiah fo kohhran chu lang thei lamah tha viau angin lang mah sela, chhungrilah nget leh ronain a khat thin.

Engvangin nge Chanchin Tha a min hringtute, khawthlang ram (Europe) kohhran hi a thih thup kan tih chuan chanchin tha ni lo thil dang kaih kep a ngah lutuk a, chu chuan kohhranah ngetna leh rona a thlen a; kohhran nung lo/kohhran thi leh mutthlukna thlengin sualin an chungah ro a rel phah ta a ni. Pathian thu ni lo thil dang khawvel chanchin lawmawm kan tuipui ni apiangah kohhranah Thlarau Thianghlim a che ngam lo va, ngetna hriin kohhran a ei chhe thin.

Photo : Google Image

England ka thlen hlima ka rilru tina em emtu leh vawiin ni thlenga ka chhungril mittui titlatu lian tak pakhat chu: Hmana chanchin tha meichher min chhitsaktute, hmana hlim taka Pathian an fak thinna Biak In ropui tak tak te chu luahtu tur awm mumal tawh lo a an dah tawl leh rauhsan tak te, Biak in an maintain theih tawh loh vanga an khar tak te leh sakhaw dang biaten an leisaka sakhaw dang biak ina lo chang hlen ta te ka hmuhin ka rilru chhungril a tap lo thei lo va, Pathian hnenah nasa lehzuala tawngtaipui tura chona lian tak min siamsak a ni. Miten an sawi thin, mit ngeia han hmuh chuan rilru a khawih lo thei lo va, chanchin thaa min hringtute hi chanchin tha hrilh chhawn an ngai letling ta zawk a, nang leh kei hi LALPAN mawhphurhna liam tak min pe a, kan theihna zawn zawn atangin LALPA tan theih tawp kan chhuaha kan tawngtaipui an ngai a ni.

A bulpui ber nia lang chu chanchin tha (Pathian Thutak ) ni lo, khawvel chanchin lawmawm an buaipui lutuk leh khawvel finna, thiamna leh hriatna, changkannaah an intlansiak nasa lutuk hian anmahniah a malsawmtu Pathian a theihnghilhtir a, Pathian mamawh lo nia inhriatnain an thinlung ngaihtuahna te chu thlem thlukin an awm ta a ni. Finna leh hriatna, thiamna te hi sang tak thlenga zir a tha e, amaherawhchu finna leh hriatna, thiamna min petu Pathian theihnghilh phah nan leh dodal nan kan hmang a nih vaih chuan kan hriat loh hlanin sual lam kawngah thui tak ke kan lo pen tawh tihna a ni.

Tum khat chu restaurant-a hna ka thawh laiin kan thawhpui nula pakhat hi ka zawt a. Pathian i ring em? Pathian hi a awm i ring em? tiin ka zawt a, a mi chhanna chuan ka rilru a va tinuamlo tak em....! 'Pathian hi a awm ka ring lo' a ti tawl mai a.....!! Engvanga ringlo nge a nih ka zawh chhoh zelnaah chuan heti hian min chhang a, "Nasa taka ka thawh chuan ka hlawhtling ang a, nasa taka ka thawh loh chuan ka hlawhtling lo vang. Pathianin min puih vanga hlawhtling ka ni lo, ka thawhrimna avanga hlawhtling ka ni." tiin min chhang a, Kristian thlirna zawn atang chuan a hma khua chu a thim hle a ni. Ama theihna te kha a ni chuan a pathian a, khami khan Pathian ngaihsaklohna leh theihnghilhnaah a hruai lut ta a ni. Ka sawi tum tak mai chu kan fin,fel,hriat,that, theihna te hi a petu Pathian theihnghilh leh dodalna atana kan hmang a nih chuan kan hmabak a thim hle dawn a ni.

Photo : Google Image

Kan thupui atang khan kan peng hla ta deuh va, kan thupui lamah khan let leh dawn ila. Kohhranin 'Chanchin Tha' hril hna a bansana a tawpsan ni apiangah kha kohhran khan a tih tur a tih loh avangin a tawpah kohhran thi (nunglo ) a lo ni ta thin. "Kohhranin Missionary hna ngawrh taka a thawh chiah hian a din chhan ang takin a nung a ni." tiin W.M.Felta chuan a lo sawi tawh a.

Mission rawngbawlnaa thawh hlawk ber ber te zinga mi David Livingston -a leh Oswald J. Smith-a te thu sawi hmang hian thu tlang i han kawm dawn teh ang.

David Livingston -a chuan Mission rawngbawl hna pawimawhzia hriain, "I ram lo thleng rawh se tiin kan tawngtai thin a, Lalpa min tie ta che, heta hi ka awm kan ti ngai si lo. Pathianin fapa pakhat chauh a nei a, Missionary-ah a siam nghal." tiin a lo sawi a ni.

"Pathian inhriattirna chu ka dawng a, chuvangin keima tan chauh ka nung thei tawh lo, ka engkim hi ka pek hma chuan ka nun hi engmah lo aia nep zawk a ni." tiin thu hriltu ropui tak Oswald J. Smith -a chuan a lo sawi ve bawk a. Chuvangin Chanchin Tha hril hna hi kohhranin a thawk lo a nih chuan a din chhan a tihlawhtling lo va, kha kohhran kha ding lo law law se a duhawm zawk ang.

A tawp ber atan Lal Isua ngei hi thu sawi turin i han sawm ve teh ang. "Khawvel zawng zawngah kal ula, thil siam zawng zawng hnenah chuan Chanchin Tha hi hril rawh u. A ringa baptisma chang chu chhandamin an awm ang a; a ring lo erawh chu thiam loh changin an awm ang." (Marka 16 : 15, 16)

Kohhran chuan 'Chanchin Tha Hril' hi a hna pui ber a ni a, tinunga malsawmtu erawh chu Lalpa thlarau thianghlim a ni ve thung.

Lalpan mal min sawmsak rawh se.