Zo Vapual

Kan ram a damlo....?

By Salai Martin

Ram ropui leh ram nuam tehna chi khat chu a chhunga cheng mipuite zalennaah a innghat kan ti thei ang. Khawvelah hian sawrkarna chi hrang hrang a awm a, mipui lalna sawrkar, mimal thuneihna sawrkar...adt. Engkim mai hian a thatna leh chhiatna a nei vek bawk. Sawrkarna chi hrang hrang awm thei zingah mipui lalna, sawrkarna leh mimal thuneihna sawrkarna hi kan ram thlirna tarmit atangin han thlir bik dawn teh ang.

Kan sawi tawh angin thil engkim mai hian thatna leh thatlohna an nei vek a, thil reng reng chu a hmangtu a zira tha thei leh tha lo leh mai thei a ni bawk. Chuvangin thil tha nia kan hriat te chu hmaih awm miah lovin tih i tum zel ang u. Tunlai khawvel dinhmunah chuan mimal thuneihna sawrkarna aiin mipui thuneihna sawrkarna hian hma a la chak ber a, tun aia chak pawhin hma a la la zel dawn a ni. Kan ram Zalenna sualchhuaktu Gen. Aung San-a ngei pawh khan mipui lalna sawrkarna hi thlawpin a theih tawp a lo chhuah a, a thluak ngaihtuahna leh thiamna chi hrang hrang hmangin Kumpinu sawrkar hnena atangin Zalenna a lo sual tawh thin a ni. 

Kan ram hian Zalenna a neih hnu kum 1962 chho vela sipai sawrkarnain (mimal thuneihna) beihna a tawh atang khan Burma ram hi a let zawngin a thang a, a let zawngin ke a pen ta chher mai.... Ram sawrkarna tha lo na na na chu ramin a changkan loh phah a, ram a changkan loh chuan mipui bawkin kan tuar thin a ni. Chuvangin kan ram hian natna hri hlauhawm tak a vei a, a vei mek a, kan ram hi a damlo a ni. Ram a hrisel loh chuan a chhunga cheng mipuiten kan tuar a, kawng hrang hrangin kan tuar a; sawrkarna tha lovah chuan eng thil tih mah hi a tluang thei thlawt lo a ni. He kan ram natna hlauhawm tak, mimal thuneihna/mimal lalna sawrkar hi a zung puak chhuaka kan kar phawn hunah he kan ram Burma hian a natna hripui tawrh mek hi a dam ve thei chauh vang. Chuti a nih loh va, tun ang zela kan kal zel dawn a nih chuan he ram Burma hian din chan leh ni tih a nei tawh ngai lo vang. 

Kum 1960 hma lama Asia khawmual puia Burma Burma tih laih laih khawpa hmingthatna lo nei thin a, tunah chuan a ral ta riai riai a, he mimal thuneihna sawrkar/mimal thuneih tumna sawrkarin min awp chhung chu dinchhuah leh ni a nei tawh ngai lo vang. Khai le.... ka thalaipui duhtak, he kan ram natna hripui hlauhawm tak tidam tur hian midang tumah an awm lo, nang leh kei hian kan theih tawp chhuaha kan beih a, kan ram hian Democracy ram dik tak a sualchhuah hunah hian he a natna hripui vei mek hi tihdam a ni chauh dawn a ni. 

Kan ram hi a damlo a ni. A enkawl dam turin ........Nang leh Kei.......