Zo Vapual

Hringnun phurrit chhawkna

Photo - Google Image

America rama dawr lian tak mai, hmun hran hrana a zar leh peng inhung thliah thluah tham khawpa lian chu a tla chhe rup mai a. Eng vang nge ni le? An bungrua a chhe bik nge an thil zawrh te chu a man a sang bik? A eng mah mah chu a ni lo. Chu dawr nghaktute chuan nuih aiin nur an ching zawk a, anmahni dawrtute lakah hawihhawm an chhuah peih lo a ni. 'Chutiang ngata dawr nghah chu tlakchhiatna awlsam ber a ni,' an ti nia. Mi pakhat chuan, "Tunlaia harsatna lian tak pakhat, hnathawhna hmun neituten kan tawh chu hnathawktu, hna thawk duh bawk si, thawhpui nuam tak zawn hmuh hi a ni," tiin a sawi.

Tunlaiah miin a man zat leh a bungraw that leh that loh ringawt an thlu lo, mawihnai taka dawnsawn an duh tel vek a ni. Sumdawnna hmun lian tak pakhata an hotupa chuan tunlaia sumdawnna lian innghahna reng reng chu an thil zawrh dan an chhiar lam ai mahin anmahni dawrtute an enkawl that leh that lohvah a innghat zawk tiin a sawi hial mai. Chutianga mahni dawrtu apiang tha taka enkawl an nih theih thu puang zar tur chuan sumdawnna lian neitute chuan thiam chitin an thawh a. Company pakhat phei chuan anmahni dawrtute chu nelawm takin an enkawl a ni tih an hnathawktute hriat nawntir zel turin darkar tin an hmet ri thin nia maw le.

Lungawi lo hmel han pu a hmel nur han chhuah tur hian kan tihrawl sawmsarih pahnih a tan rual a ngai a, nur hmel chhuah tur erawh chuan tihrawl sawmpali chauh a tanrual zu ngai a. Tih theih leh thiam thil kan nei tlem viauin kan hre mai thei, mahse nitin mai hian tangkai taka kan hman theih tur ro tling thil kan kawl theuh nia. Chu kan ro chu he thuchang hian a hrilhfiah hlein ka hria.

'Man nei si lovin a siam chhuah a tam a.

A petu tan hekna thlen si lovin a dawngtu a tihausa a.

A lo lan chhung a reiloh tehlul nen dam chhunga hriatreng a hlawh thei a.

A tel lova khawsa thei khawpa hausa tumah an awm lo va, pe chhuak thei lo khawpa rethei tumah an awm hek lo.

In lamah hlimna a siam a, Sumdawnnaah inthian thatna a thlen a, thian nihna nemnghettu a ni. 

Chaute tan chawlhna a ni a, thinlung nguite tan lawmna eng a ni a, buaina tihreh nan Khuanu kutchhuak a ni.

Mahse he thil hi pek chhuah a nih hma loh chuan tangkaina nei lo, lei theih si loh, dil chhuah theih si loh, hawhchawp theih si loh leh rukbo theih loh a ni.

Tu emaw, nui hmel pawh hmuhtir thei lo khawp chea a lo chau a nih hlauh chuan engahnge i nui hmel chu i hnutchhiah loh vang le?

Kiai khat chauh pawh chhuah thei lo mihring aia nui hmel mamawh an awm hauh si lo.'

Thu lakna : Heile Vawiin

                 Letlingtu : P.L.Liandinga