Zo Vapual

Harsatna hi ringtute pum tha ber a ni

Photo - Google Images

"Ka khawngaihna i tan a tawk e. Ka thiltihtheihna hi chak lohnaah asin tihfamkimin a awm ni" (II Kor. 12:9).

Pathianin kan tawngtai hi a chhang thin a. Mahse min chhan dan chu kan tuarna leh phurritte la bo tur zawng ni kher lovin chu phurrit chu phur thei tura chakna nasa lehzual min pek belh a tum thin zawk a lo ni fo. Kan phurrit phurh hi nunna kawngka zim leh boralna kawngka zau inkara daidanna bang duhawm tak an ni. 

Pathian hian min lak bosak sela chuan, boralna kawngpui zawhin van lam kan thleng lo thei hial awm e. Thahnemngai taka kan tawngtai thinna hling bang hi Pathianin min lak kiansak ta mai sela chuan, tam tak chu 'Kan rovin, engmah lo' kan nih phahin a rinawm. Ropuina rama mi thianghlim kal hmasaten ngaihnawm an tih tur a awm lo vang a, an hla sak a tawp zo ang a, mittui tla zawih zawiha tawngtaina van thleng hriat tur lah a awm dawn si lo. Chuvangin van tingtang ri a reh zo ang a, tlan sate luah tur hmun chu a luahtu awm lovin a lo ruak dawn a ni. Pathianin kan dil ang angin min pe nghal zel sela chuan, vuak ngai, zilh ngai kan awm tawh lo vang a, mihring siam that nan khaw dur a ngai si! Khaw dur tel lo, ni sa ringawtah zawng thlai an thi zo zawk thin angin kan chau zo vek zawk dawn a lo ni. Mittui nena phurrit phur chunga tawngtaitu tawngtai hi vanin ngaihnawm leh mawi an ti ber zawk asin!

'Hrehawmna i chungah lo thleng fo sela,

 Ka thatna tur a nih chu, tiin ngai la. 

 Pathianin thil harin mi a siam tha thin.

 Khaw dur khaw thiang nenin lei a lo tha si,

 Mihring siam that nan khaw dur a ngai a ni.'

Thu lakna : Thlarau lam Hnute tui

                  C. Darkunga