Zo Vapual

Ropuina Dik Tak 

Kum tam tak kaltaah khan England ramah zirtirtu pakhat chuan 'Ropuina Dik Tak' tih thupui hmangin a zirtirte chu thu ziak turin a ti a. A zirlaite zingah chuan hmeichhe naupang rethei tak leh lehkhathiam lo chhungkua atanga lo chhuak hi a awm ve a. Chutiang thilah chuan an hotunu chuan chu hmeichhe naupang hnen atang chuan eng thil ropui mah a beisei lo. Mahse chu hmeichhe naupang thu ziak chuan chu zirtirtunu rilru chu a hneh khawp a, chanchinbua chhuah turin a pe ta a. Mite chuan an lo lawm hle mai a, hmun tin maiah chanchinbute chuan an chhuah ta uai uai mai a. Chu hmeichhe naupang hming chu hriatreng pawh a ni tawh lo, mahse a thu ziak chu a la dik reng mai. Tlem lo tar lang ila;

Ropuina dik tak chu neih tum avanga neih mai theih a ni lo. I zawn loh hunah chiah hian i nei thei a ni. Thuamhnaw tha tak te hi a tha khawp mai. Thuamhnaw tha tak tak han inbel hi chuan tuihnai tak anga lan hi a awl hle mai a. Mahse ropuina tak tak i hmuh duh chuan thuamhnaw chhe tak inbel chung pawha thuamhnaw tha inbel ang maia khawsa thei hi en mai rawh. Vawi khat chu ka nu naupai laiin an Inah chuan sava pakhat, Bill an tih chu an khawi a, Bill chuan a ke a titliak a, a thih mai te pawh an ring a, a nih loh leh tihhlum mai pawh tha zawkah an ngai a ni. Mahse a tuk khua a lo var chuan a ke tha lam hmang chuan awn ang tei tawi hian a lo ding hram hram a, a lo zai vet vet mai a. Chu chu 'Ropuina Dik Tak' chu a ni. 

Tumkhat chu nu pakhat, puan su nasa deuh mai hian a puan suk chu tlangbanah a zar a. A tlangban chu a chat palh a, an puan suk sa chu chirhdiakah a tla ta chiam mai a, mahse engmah a sawi lo. Puan chu a su tha leh vek a, a tlak theih tawh lohna hmun, phaitual hnim chungah a pho ta hlauh mai a. Mahse chumi zan chuan ui ke bal zet mai hian a lo dai bawlhhlawh leh ta vek mai a. Chu thil a'n hmuh pawh chuan tah mai lam zai ren reng a rel chuang lo. 'A engti zawng maha a'n fuh thei ta lo mai chu a va'n mak reh em!' a ti lek fang a ni. Chu chu ropuina dik tak chu a n tih hre reng tur chuan puan suk ve chiam phawt a ngai tlat.

Mahni inthunun theih hi mihring nunah chuan a pawimawh khawp mai. Hei hi mipui leh hruaitu danglamna ber chu a ni. Hruaitu chuan amah a inthunun thei a. Mi naran chuan a thei lo. Solomon-an mahni inhneh thu a sawi kha a la dik reng a, a dik zel dawn a ni.

Thulakna : Hei le vawiin, letlingtu - PL Liandinga