Zo Vapual

Kan ram chungchanga ka ngaihdan

Salai Martin

Tunlai kan ramchhung boruak thil thleng te hian rilru ngaihtuahna min siamtir lo thei lo va, ngaihtuahna tam tak min neihtir a ni. U Thein Sein sawrkar thar hian ramchhungah hian engnge a tih le? Tunlaia Kachin ramchhunga buaina chin fel a la ni lo leh, chin fel a hnekin buaina chuan pun lun lam a pan tual tual si a, a hminga democracy ram in ti si hian ramchhungah buaina a punlun telh telh mai a ni. Chumai ni lovin ramri depa Karen leh sipai sawrkar te innghirngho thrin te pawh hian ramchhung sawrkar thar rorelna thrat leh thrat lohzia chu a tilang chiang mai lawm ni.....?

Kan ram chian a hming maia Democracy ni lovin a taka lang thei leh mipuiten kan duh thala ram hruaitu tur te kan thlan theihna tur Democracy ram thar kan mamawh a ni. Ramchhunga Democracy a lo nih theih nana hmalaa nunna chan ta te kha an van fakawmin an van entawntlak tak em! An thisen hi a luang ral mai mai dawn lo a ni. Tunah hian an thisenin min au va, kan ram hian Democracy dik tak a hrinchhuah theihnan kan thralai rual te hi nasa lehzualin min fuih nasa a ni. Chuvangin zam chhe mai mai tur kan ni lo va, nasa lehzuala tran la a, ram leh hnam chhan pasalthaten an nunna hial dah khama ram tana tran an lo lak tawhna zawng zawng chu zam mai lova chhunzawm zel tur kan ni.

He sipai sawrkar thar hmaah hi chuan Dan in awmzia a nei thei tak tak lo va, anmahni hi dan an ni tawp a, an thu lo anga thil a kal dawn ai chuan an dan siam pawh anmahni vekin an bawhchhia a, an duh ang angin thil an hnuk kal ta thrin a ni. Dan leh duna inawpna thra tak tak a awm thei lo va, ram changkang leh ram ropuiten Dan dik tak hmanga ro an rel laiin leh ram rorelna chungchanga Dan chu tehna ki pui bera an hman laiin keini ram ve chu Dan hi an kut hnuaiah a awm a, an duh dan dana thil an tih kha dan a ni tawp mai a, dan leh dun thra tak tak pawh duang chhuak mah sela, anmahni tho hi a bawhchhe hmasatute an ni leh tho tho a ni.

Kan ram hian Democracy ram thar a mamawh tawh a ni. Mipui rorelna sawrkar thar a mamawh a ni. Chuti a nih loh chuan he sipai sawrkar thar hian min ei chhe zel dawn. Ramchhung leh rampawna mipuite pawhin kan theihna zawn zawn atranga kan tran ho va kan thawh ho a ngai tawh a ni. Tawp san mai tur kan ni lo va, hma lam pana ke pena kan ram hian Democracy ram thar a hmuh theih ngei nan thrahnemngai leh zualin kan thawk ho zel dawn lawm ni?