Zo Vapual

Hmangaihna mitin i mihringpuite en thin ang che

C. Lalmuankima 

Slough, United Kingdom

Hmangaihna mita ena Lal Isua atanga mi kan teh thin loh chuan mi tumah kan teh tling ngai lo vang. Keimahni ngei pawh hi Lal Isua avanga tling, Lal Isua avang veka chatuan nunna nei, Lal Isua avanga Pa Pathian hmaa mi tling kan ni si a, Lal Isua atang zel hian teh thin ila a lo fuh ber a; a hahdam ber bawk a; mi tumah teh tlinloh kan nei ngai tawh lo vang.

Photo: Google Image 

Nangmah atanga i teh chuan nang aia fel anga lang leh khawvela mifel ber pawh a sualna leh thil tihsual zawngin i mitah chuan a tling chuang lo vang a ( nang aia sual anga lang chu sawi lohva lumah dah ta ila....), an tih that poh leh an fellohna lai hmuhchhuah tumin tan i la nasa ting mai ang....!!!

Lal Isua atanga i teh a, hmangaihna mita i en erawh chuan misual bera i ngaih pawh kha i hmu tling tawh ang a, nangmah ngei pawh Lal Isua khawngaihna zara tling ve chawp i nihzia i hria ang a, misual ber : tualthatpa, uirenu, rukrupa, dawtsawi ching, kawhmawh bawl ....etc. pawh Isua thisen chuan a silfai vek thei a ni tih i hmufiah tawh ang a, i teh tling vek tawh dawn a ni. A pawimawh ber Lal Isua atanga bul tan tur hi kan lo theihnghilh leh thin hian kan ngaihtuahna a tibuai fo thin a lo ni zawk e. Tehna kipui ber atan Lal Isua Hmangaihna kan hman phawt chuan tumah tlinglo kan awm lo, Lalpa Isua zara Pa Pathian thinlunga tling vek kan ni.

Mi zawng zawng hi Lal Isua tel lo chuan Pa Pathian hmaah kan tling zo lo va, Lal Isua avang erawh chuan mi zawng zawng hi Pa Pathian hmaah mi tlinglo kan awm lo ve thung. Hmangaihna mita kan mihringpui te kan ena Lal Isua atanga kan teh phawt chuan mi tumah tehtlin loh kan nei tawh lo vang.

Mihring nihphung a lo mak dawn khawp mai. Kan aia level sang deuhva mi an invawrh sanin kan thik a, sawisel tur kan zawng a, kan aia level hniam deuh lah hmuhsit leh chaldelh ran chungin kan en leh lawi si, kan level puite lah chu engah mah kan ngai bawk si lo, mite chunga kan rilru puthmang hi chhe thei tak chu a ni. Fiamthu thiam thenkhatin an sawi, 'Hmana engah maha kan ngaih lohte leh kan tanpui ve fote kha an rawn thanglian a, kan neih zawh loh an rawn neih chinah phei chuan mut a tui tawh lo tan a, thiknain kan khat a....' tia an sawi pawh hi kan nihna dik tak a ni thin. Mizo thufingin, 'Zangkhua pawhin bungbut hun a nei thin...' tih hi vawiin thlengin a la dik zel a nih ber hi maw!

Heng zawng zawng hi hmangaihna mita kan en thiam loh chuan keimahni mi tinatu a ni fo thin reng a ni. Hmangaihna mita mi en nachang kan hriat loh chuan thiknain kan khat ang a, engtik lai mahin hlimni kan hmu ngai lo bawk ang. Bible thurawn tha ka tih deuh mai ka han zep tel teh ang. 'In tih apiang chu hmangaiha tih ni vek rawh se' tiin a sawi a (1 Korinth 16:14). Thil engkima hmangaihnaa tih a nih phawt chuan thil sual a inzep tel dawn lo tihna a ni. Miin thil sual ti turin kan induhsak ngai lo va, chu thil sual tih chu hmangaihna atanga chhuak a ni ngai lo bawk. Chuvangin kan mihringpui te tana kan tih theih tha ber mai chu hmangaihnaa tih hi a ni a, chu chu a daih rei ber bawk a ni. Hmangaihna mita kan mihringpui kan en thiam chinah chuan kan inkarah inremlohna tihbovin a awm ang a, inlaichinna leh inpumkhatna tha zawk a lo awm zel dawn a lo ni reng mai.

'Hmangaihnain a dawhthei a, ngil a nei bawk thin; hmangaihnain a itsik lo va; hmangaihna a infak lo va, a uang lo va, a che mawi lo lo va, mahni hma a sial lo va, a thinur duh lo va, sual lamah a ngaihtuah lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin. ' (1 Korinth 13:4-7)