Zo Vapual

Hna zahawmna hre khawpin thawkrim thin ang che

C. Lalmuankima

Newcastle, United Kingdom

Eng hna pawh hi (sawrkar huat zawng ni lo tawh phawt chu) thawk mah ila, hna zahawmna hre khawpa thawh thin a tha. Hna zahawmna hre khawpa kan thawh thin loh avangin kan hnathawhah kan lungawi lo va, kan hnathawhah kan lungawi loh chuan kan hnathawh zahawmna kan hmu thei thin lo.

Photo; Brainy Quote 

Miin eng hna pawh hi zah taka a thawh a, rinawm taka a thawh bawk a, a chhungkua leh nupui fanaute hrawkhrui chawmna atana a hman theih phawt chuan chu tluka pawimawh leh tha chu a awm chuang lo. Chutiang ti mi chungah chuan hna zahawmnain a thlen chilh a, malsawmin a awm thin. Thenkhatin hna hnuaihnung zawka kan ngaih Cleaning hna te hi thawh kan zak thin a, a pawi hle a ni. Cleaning hna thawka chhungkua kan chawm theih chuan officer hna lian tak thawk si a, chhungkua chawm zo si lo ai chuan a tha tawh hrim hrim a, eng hna pawh thawk ila (sawrkar huatzawng ni lo hna tawh phawt chu), chhungkuain a zar kan zo tlan theihna a nih phawt chuan a tha tawh hrim hrim. 

Hna reng reng hi officer hna a nih avangin a zahawm ngawt lo va, a thawktuin zah taka a thawh leh thawh lohvah a innghat zawk a ni. Chutiang zelin cleaning hna pawh hi a thawktuin zah taka a thawh phawt chuan hna zahawm tak a ni thei bawk. Hna reng reng chu a thawktuin kan zah thiam dan azira hlu leh zahawm thei a nih rual rualin a thawktuin kan zah thiam dan azir bawka hlu lo leh zahawm lo thei a ni bawk. A thawktu chungah hian hna zahawmna chu thui tak a innghat a tih theih a ni.

Officer hna lian ber pawh thawk mah ila, kan hnathawhah zahtlak khawpa kan thawh leh chuan si loh chuan awmzia a nei lo tihna a ni ang. Cleaning hna chu hna hnuaihnung angin lang mah sela, a thawktuin zah taka kan thawh phawt chuan keimahniah chawplehchilhin zahawmna min siamsak nghal thin a ni. Chuvangin kan hnathawhnaah hian hna zahawmna hre khawpa kan thawh fo a pawimawh hle. Hna zahawmna hre khawpa i thawh phawt chuan hna zahawmna chuan a thawktuah zahawmna a siamsak ang che ang a, mi zahawmah a siam dawn che a ni.

Mite zahtlak khawpin hna kan thawk thin em tih erawh kan ngaihtuah tel fo a tha ang. Kan boss-te an ni emaw kan hnuaia hna thawkte an ni emaw kan thawhpuite zahtlak khawpin kan thawk em tih hi mahni leh mahni inenfiah nan i hmang thin ang u. Chutianga mahni inenlet nachang kan hriata mahni hnaah zahawm tak leh entawntlak taka kan thawh phawt chuan hna zahawmna hian min kalsan ngai lo vang. Hna zahawmnain a chen chilh reng theihna tur chein hna zahawmna hre khawpin thawkrim thin ang che. Tichuan chu hna zahawmna chuan nangmah ngei pawh mi zahawm takah a siam thei dawn che a ni.

Hna zahawmna hre khawpin thawkrim thin la, i inchhir ngai lo vang. Hna zahawmna hre khawpa i thawhrim thin phawt chuan i chenpuite leh i thawhpuite tan pawh malsawmna i ni zel mai dawn a ni. Midangte tan malsawmna mai ni lovin nangmah ngei pawh mi zahawm takah a siam thei dawn che a ni. Chuvangin hna zahawmna hre khawpin thawkrim thin ang che. Kan thiltih hian keimahniah zahawmna min siamsak a, kan thiltih azirin mihring hi kan zahawmin kan zahawm lo thei bawk a ni. Hna zahawmna hre khawpa kan thawh thin phawt chuan hna pawhin a malsawmna hi engtik lai mahin a sum ngai lo vang. Chu hna zahawmna malsawmna dawng thei tur chuan hna zahawmna hre khawpin i thawkrim thin ang u.