Zo Vapual

I beisei aia tha pe theitu che Pathian

(Sam 31:24; 118:8, 9; 33:18; Hebrai 11:1)

C. Lalmuankima

Newcastle, United Kingdom

 

Pathian hian kan tana thatna tur awm lo chuan awm ze nei lovin indona field-ah hian a thlawnin min dah ngai lo.

Vawiina i dinhmun kha tihsual palh emaw lo awm palh emaw avanga awmah i inngai thin em ni? Nge, i tana awmze nei lo takah i ngai thin zawk? Pathian hian kan tun dinhmun hi awmze nei lo takah min siam ngai lo va, kan beiseina aia tha zawk kan thlen theihna atan erawh chuan hmanraw tangkai takah min hmansak thin thung. Pa chuan a fate tan thil tha ber a duhsak thin ang hian kan rin Pathian pawh hian amah ringtute tana thil tha ber kan chan fo hi min duhsak thin a ni tih hi kan hriat a tha hle mai.

Photo: Google Image

Kan rilruin, 'Chuti chu hausak te, ropui te, thiam theih te...etc. te kan duh vek si a, kan duh angin kan va nei si lo ve,' kan ti mai thei. A dikna lai tam tak a awm ngei ang. Mahse heti zawng hian i han ngaihtuah dawn teh ang. Pain a fapa kum hnih mi vel infiamna atan chem hriam tak a pek i ring em? I ring hauh lo vang. A chhan chu naupang kum hnih mi vel tan chuan chem hriam tak hlauhawmzia leh amah tina thei leh thihna hial thlen thei a nihzia a hriat dawn loh avangin kha chem hriam tak kha infiamna atan a pain a pe ngai lo vang. Naupang khan ngenin tap mah sela, a tana tha lo tur leh amah hial tina thei thil a ni tih hrechiangtu a pa tan chuan naupang tlei loh pawh kha a pawi ti lo zawk ngei bawk ang. Kha naupang kha a lo puitlin huna chem tangkaizia a hriat hunah chuan a pa tan pawh pek kha a harsa tawh lo vang.

He tehkhin thu atanga kan zir tur pawimawh chu: Ringtu nun puitling kan neih hma chuan miten an neih ang te neiha an tih ang te tih ve zel kan duh thin. Mahse kha kan thiltih chak/duh em em kha kan tana thil pawi thei a nih lam hi kan ngaihtuah thin lo va, zawi zawia ringtu nun puitlinna kawng kan neih hnuah erawh chuan kawng a inhawng zel zawk thin a ni. Malsawmna te hi duh lo mihring kan awm hauh lo vang. Mahse malsawmna dawngtlak kan ni em tih lam hi kan ngaihtuah tel fo a pawimawh hle ang. Malsawmna a ni kan tih lai hian kan mittui min titla tamtu malsawmna a nih phawt chuan dawn teuhvin awmzia a nei lo va, malsawmna a nih theih rual rualin min eichhetu leh tiboraltu hri hlauhawm tak a ni ve thei bawk a ni. Pathian pawh hian amah ringtute chu malsawmna vur teuh chu a duhthusam ber a ni ngei ang, mahse a malsawmna dawngtlak nun ze nghet neitute erawh a zawng fo thin a nia....!

A hming ropuina atana ti i nih dawn phawt chuan ringlo mite ai pawha chungnung zawkin a siam thei che a ni. A pawimawh ber chu amaha rinna nghah tlat a ni thung. Mihringin Pathian lakah beiseina kan nei a, a tha hle mai. Chu aia tha lehzual chu kan beiseina aia tha zawk min pe theitu Pathian a nihna hi a ni. Beiseina neih loh tur kan tihna a ni lo va, kan beiseite aia tha zawk min tihsak theitu chu Pathian a ni tih hi kan hriatchian a tha hle mai. I beisei ang takin thil a lo thleng lo pawh a ni mai thei a, khami phenah khan Lalpan i tana thil tha zawk a lo buatsaihsak reng che a ni thei a ni. Lalpaa i beiseina erawh ti bo ngai suh ang che.

Tuna i thiltih mekah khan i duh ang thalin i hlawk lo a ni mai thei. Mahse ringtu tan chuan kha kha a tawpna a la ni mai lo tlat. I tana tha zawk tur hretu chuan tuna i tih mek aia tha zawkin a thawhsak thei che a ni. A pawimawh ber chu amah tihna a ni a, amah titute chungah chuan lawmna a neih thin thu Sam ziaktu chuan a lo sawi angin (Sam 147:11) Lalpa chu kan chunga a lawm phawt chuan kan beiseinate tihhlawhtlin hna chu a tih tur a ni ve thung. I beiseina bo vek khawpin a thlahthlam ngai lo vang che.

Thil tha ber ber te hi beisei loh tur kan ti lo va, beisei tur a ni. Mahse kan beiseina anga thil a lo thleng lo a nih pawhin kan tana tha zawk tur Lalpan rem min lo ruatsak zawk a ni tihah hian lungawi ila, tichuan Pathian nena kan inlaichinna hrui hi suih nghehin a lo awm zel dawn a lo ni reng mai. Kan beiseina angin thil lo thleng vek ta se la, keimahni tana chhiatna tur thil te pawh kan lo beisei teuh mai thei asin. Chuvangin kan beiseinate hi Lalpaah zel hian thlen ila, kan beisei anga thil a lo thleng lo a nih pawhin kan tana thatna turin Lalpan min thawhsak leh mai ang tihah hian lungawi bawk ila, rilru a lo hahdam ber zel a ni. A ni chuan kan tana thatna tur a hre zawk si a, kan chhiatna tur chuan kan chungah hian a thlentir hauh lo vang. Nang leh keia beiseina te tihlawhtling tur hian kan rin Pathian khi a rintlak em em a ni.

Sam ziaktu chuan, "Ngai teh, LALPA mit chu amah tihtute chungah a fu reng thin a, a ngilneihna beiseitute chungah chuan; an nunna thihna laka chhanhim tur leh tam tlaka anmahni tungnung turin." tiin a lo sawi a (Sam 33:18), Lalpa tihna nena thil kan tih phawt chuan thihna leh tam lakah pawh min chhanhima min tungnung thei tur chu Amah bawk a ni. Mihring lamah kan beiseina te tihbovin awm thin mah sela, beiseina nung min siamsaktu chu Lalpa a ni a, amah hi kawng engkimah i beisei tlat ang u. Kan beiseina tihlawhtling tur leh kan beisei aia tha min pe theitu chu kan rin Pathian hi a ni.