Zo Vapual

Kan tuk tho (zing tho) Pathian biak thlakhlelhna kan nei thin em?

C.Lalmuankima

Newcastle, United Kingdom

 

I zing tho kha tu nge i biak hmasak ber ngaihtuah thin la, Pathian biak i thlakhlelh leh thlakhlelh loh a hriat mai ang.



Photo: Google Image



Martin Luther chuan, 'Ni khatah darkar thum tal ka tawngtai loh chuan ka thil tih tur ka thawk zo thei ngai lo...' zu han ti a....! Han ngaihtuah mai chuan a hun hlu zawng zawng tawngtainaah a hmang zo vek a ni lawm ni kan ti mai thei a ni. Khawvel mita thlira khawvel benga ngaihthlak chuan zaah za thil atthlak tak a ni kan ti thei ang. Mahse van lam mita thlira van lam benga ngaihthlak erawh chuan zaah za a dik thlap thung. Miin Lalpa tan hna tam tak an thawh duh avangin tawngtaina hau tak zetin bul an lo tan thin a ni.

Miin Pathian nena inpawlna an neih tak tak chuan ni khata darkar 24 pawh hi an kham lo lam a ni. Ni khatah hian hei aia darkar tam zawk hi awm thei se la an

duh thin a ni. Engvang nge kan tih chuan Pathian nena inpawl nawmzia an hria a, Lalpa biak hi an thlahlel ngawih ngawih tawh mai a, amah be hmasa lo leh amaha inhlan hmasa lovin engmah an ti ngai hek lo. An tih loh palh ni apiangah an nun a khawhar ngawih ngawih hlein an hria a ni. Keini hi i han in en teh ang u, ni khatah Lalpa tan darkar khat chu sawi loh, minute 10-15 lek pawh kan pe phal ngai meuh lo va, chuti chung chuan a malsawmna tam tak dawn kan beisei leh lawi si hi a kawng kal lo hrim hrim a ni.

Kan hmangaih ber te chu biak kan thlahlel ngawih ngawih thin a, kan be ning ngai lo bawk. Darkar tam tak kan inbiak pawhin kan kham thei reng reng lo ang hian Lalpa pawl fuhtute pawh amah Pathian nena inbiak hi an thlahlel ngawih ngawih thin a, amah biak hlan an nghakhlel ni tin thin a ni. Pathian biak kan thlahlel lo a nih chuan keimahniah dik lo a awm tan tihna a ni ang. Keimahniah tlansan ngai leh paih ngai a awm tihna a ni ang. Pathian thlahlel lo tura min siamtu chu khawvel thilte hi an ni fo thin. Khawvel thil kan kalsan tamna hmun apiangah Lalpaah thlarau lam thila chawmin kan lo awm zel dawn a ni.

I tuk tho i biak thlakhlelh ber thin kha Lalpa Pathian a ni thin em? Nge kan thiante leh kan unaute, kan thawhpuite leh zirpuite zawk? A nih loh pawhin social media chi hrang hrang (facebook, whatsapp, viber, twitter...etc. ) te hi an ni zawk em ni?

Heng khawvel hmasawnna leh changkanna thil te hi kan sawisel a ni ngawt lo va, amah maiin a sual hek lo. Pathian aia kan thlakhlelh a, Pathian aiawh deuh thawa kan biaka amah Lalpa thlakhlelh na chang hre lova kan awm hian a lo sual ta thin a ni. Lalpa tel lova min awmtleitu atana kan lo hman chiah hian min phuarbettu sual lian tak a lo ni ta thin a ni. Chuvangin a hman dan kan thiam a pawimawh hle bawk ang.

Lalpa tel lova min awmtleitu apiang mai hi sual a ni. Lalpa thlakhlelhna zaah za i neih theih nan a hnenah kir leh thin ang che. Pathian thlahlel lova min siamtu hi sual lak atanga chhuak a ni tih hi i hre reng ang u. Miin Pathian thlakhlelhna a neih loh phawt chuan a thlarau nun a chau thin a ni.