Eng hi nge tha thawh hun?
 |
| Photo : Google Image |
Rawlthar pakhat chuan mi huan hnim samah pawisa a hlawh chhuak teuh mai a. A pa chuan chutia pawisa a hlawh thei riau mai chu mak a ti a, a enzui ta ngat a. A fapa hnenah chuan, 'Engatinge an kut an thlak ve hma hian inhlawhna tur i dil duh miah loh chu le?' a'n ti a.
Chu naupang fing zet mai chua,'Hmanhmawh loh ka zir alawm. Ka hna tam ber hi chu mahnia phur taka thawk tan ve mai a, mahse a chanve vela ti tha leh peih ta lo hnen atanga ka hmuh hi a ni miau a ni!' a ti nia.
Hna reng rengah hian hlawhtlinna a awm dawn lai vel chiah hi a harsa lai a ni duh khawp mai. Kum za kalta vela Kimberley hmuna an lunghlu khur ropui lutuk hmuhchhuah thu kha i lo hre tawh mai thei. Hausak thuai duh mi tam tak an lo kal a, lunghlu chu an zawng sup sup mai a. A tirah chuan a lei pawnlangah chuan lunghlu chu an han lai chhuak mai a. Chutia lunghlu hmel an han hmuh chuan mite chuan an pawisa tlin tawk ram leiin an hai sup sup mai a ni. Chutianga kum hnih vel an han phet suau suau hnu chuan a chunglanga lunghlu inphum chu an hai chhuak zo ta mai a. Chu lei chunglang hnuaiah chuan tlak lei dum chi, chang em em mai, pa sek pui pui ban tha leh lei verhna thir hriam hmawr zum pawhin a chhun khawh hleih theih loh a lo awm a. Chu tlak lei sak tak mai han bawh pawp tur meuhva rilru han siam ngam chu an tlem hle a. An lunghlu zawnna hmanrua te chu an hralh ta zawih zawih a, chu hmuna lunghlu chu an la zo tawh ni awmin thu a thang zui ta mai reng a.
Chu lunghlu khur kiangah chuan dawr te tak te hi Barnett Barnato chuan a nghak ve a. Lunghlu awmna ram chang ve hman lovin a lo thleng tlai pek a. A lo thlen fel ve meuh chuan lunghlu zawngtute chuan an hmanrua dahin chulai hmun chu an chhuahsan ta mai si a, a sumdawnna pawh a tlahniam nghal mai. Beidawnga chu hmun chhuahsan turte'n an ram hralh chu tlawm te tea lei khawm a rilruk ta a. Ni khat chu tlak lei chang lutuk mai hnuaiah chuan engnge awm tehreng tia laih pawh a tum lai chuan mi pakhatin a lo thlir reng mai tih a hre ta a. Chutia lo thlirtupa chu England atanga lo kal, taksa hrisel zawk nana vak khawthawng a lo ni a. Chu mikhual chuan Barnato chu ni hnih khat a'n thlek vang vang a, mi ram hralh leikhawmah a ram tang ve ta nghal a.
Chuti chuan a ni, khawvela lunghlu khur ropui ber ber neitu pahnih, Barnett Barnato leh Cecil Rhodes chu an lo inkawp tak ni. Vawiin thlenga kan la hmuh, De Beers Corporation din turin an chakna an telkhawm dun ta a.
North American University President chuan a zirlaite hnena a thusawiah chuan, "An lunghlu khur kha a laih a lo harsat veleh mi tam ber chuan bansan nachhan tur an dap a. Chutah chiah chuan mi fing chuan an tha an thawh nasa zual sauhva, an tha a phur zual tlat a ni!"
Thu lakna : Heile Vawiin
Letlingtu : P.L.Liandinga
No comments:
Post a Comment