Zo Vapual

Hapta khat chhunga Myanmar ramchhung sumdawnna chanchin

Photo-DVB

Myanmar NLD hruaitu pi Suu Kyi leh sipai sawrkar thar minister pu Aung Kyi te inhmuhna chuan ramchhungah sumdawnna thra leh boruak thra a siam ngei rin a ni. Kawng lehlam atranga thlirtute tan erawh chuan he sawrkar thar hian khawvel hmuha hmaifai a tum lek fang a ni mai lo maw tia thlirtute pawh an awm ve bawk a ni.

Sawrkar tharin budget a neih loh avangin Naypyidaw-a an in sak mek te pawh chawlhsan lai lawk a nih mai bakah vice President pu Tin Aung Myint Oo pawhin sipai ration pawh 25 % a tihhniam thu Naypyidaw-a sumdawng mi pakhat chuan a sawi a ni. Sipai budget tihhniam avangin sipaiina a sumdawnna threnkhat te pawh tih tawp a nih thu a sawi tel bawk.

Tun hma kha chuan Karen, Mon leh Shan States leh Tanintharyi Division ramri depa chengte chauhvin ram threnawma hnathawka chhuakin an inhlawh fa thrin a ni ngai a, tunah erawh chuan thralai tam tak te chu Thailand leh Malaysia ah hnathawka inhlawhin an kal chhuak zo va, lo lam hnathawk tur pawh hmuh tur an awm mang tawh lo a ni.

Pawisa thlengna rate chungchangah chuan FEC thlengna rate a chhiat em avangin FEC-a hlawh dawng te tan a buaithlakin harsatna an tawk a; tun hma deuh kha chuan FEC unit khatah Ks.1000 deuh thawa hlu a ni thrin a, tunah erawh chuan Ks.700 vel chauh a ni tawh a ni. Vawiina FEC pawisa thlengna rate chu Ks.715 a ni a, US Dollar khatah Ks.775 bawr vel a ni ve thung. Rangkachak rate erawh chu Ks.667500 a ni.

Bangladesh-Myanmar ramri insumdawn tawnnaah chuan Bangladesh atrangin lei chi, hriak, alu, purun, artui leh adt... dan lo angin (illegal) lak luh a ni a, Myanmar atrang erawh chuan sangha, kaikuang, thei um chi hrang hrang leh adt,... legal takin thawn chhuah a ni ve thung,

A rukin thing leh mau a lut tam ber a, kaikuang, chakai, bawng leh adt,... a lut bawk. Bangladesh-Myanmar pawisa thlengna rate chu Taka khatah Ks.10 leh pya 25 a ni.

Thailand-Myanmar in sumdawn tawnna chungchangah chuan Myanmar lamin kum rei tak chhung lak luh an phal tawh loh bungrua 30 zinga chi 15 chu lak luh a ni leh dawn tih Thai Media lam chuan an puang a ni. He tih lai hian Myanmar lam Import & Export Minister chuan lak luh phal a la nih loh thu a sawi ve bawk.

Vawiina Thailand-Myanmar pawisa thlengna rate chu Bath khatah Ks.25 leh pya 65 a ni.

Thu lakna : DVB