Mi hlawhchham Petera
(Tirhkohte 7:22-34; Luka 5:8; Sam 51:17)
C. Lalmuankima
Newcastle, United Kingdom
"Pathian aia mahni kan la inhmuh lena kan
indah san zawk chhung hi chuan Pathian inpuanna kan chang tak tak thei ngai lo
vang."
 |
| Photo: Google Image |
Engvanga chutianga khawvel thila hlawhtling leh
thil tithei leh ropui zawk te chu thlang lova thil hmuhsitawm leh thil awm lo
te hial thlang tlat thin Pathian nge a nih le....tih hi i han ngaihtuah dawn
teh ang. A chhan dang engmah a lo awm chuang lo ve, keimahnia ti ve thei nia
kan inhriatna hian Pathian mamawh lohna min siamsak a, chu mai bakah min siamtu
Pathian dodalna thlengin min lo bum thin a, mihring lama kan beidawn hnuah
chiah Lalpa inpuanna a lo thleng thin a lo ni. Kan theihna sang ber pawh hi
Pathian hmaah chuan engmah lo mai a lo ni thin a, keimahni lam kan la hlawhtlin
chhung hi chuan Pathian khi keimahniah a la hlawhtling tak tak thei ngai lo
thin a ni.
Mosia koh thu kha kan chhiar theuh tawhin ka ring.
Mosia kha Aigupta finna leh thiamna zawng zawng zir chhuak vek khawpa mi thiam
leh tling a ni a, a thu-ah leh thiltihah a ropui em em thu kan hmu a (Tirhkohte
7:22). Mosia koh a nih khan a tha chak vanglai takin Aigupta ramah a tir let lo
va, thlalerah kum sawmli a vei hnuin koh a ni ta zawk a (Tirhkohte 722ff,
Exodus 3:2-10). A tha chak vanglai tak khan han tir let se la chuan a
chhawrnahawm dawn teh reng nen, mahse Pathian thil tum a ni tlat lo. Mosia lama
inchhuan theihna zawng zawng tih tawpa a awm hnuah chiah Pathian thu hmanga koh
a lo ni ta zawk a, Pathian thiltihtheihna rinchhantuah siamin a lo awm a,
tichuan a mi Israelte chu Aigupta ram atangin a hruai chhuak ta a ni.
Keimahah hian Pathian aiin keimah hi ka lo
hlawhtling leh thin a, hei hian Pathian hmel hmuh a dal ta thin a ni. Mahnia ti
ve thei nia kan inhriatna hian min lo bum leh thin a, Pathian mamawh lohna leh
siamtu Pathian hial dodalnaah min lo hnuk lut thin a, a pawi tak zet a ni.
Keimahniah Pathian a hlawhtlin theih lohna chhan chu Pathian aiin keimahni ngei
kan hlawhtlin thin vang a ni.
Kan thu sawi tum a fiah lehzual theih nan he
tehkhin thu hmang hian i han chhunzawm teh ang. 'Tlang Theology' tih hi kan hre
nual tawhin ka ring. Tlang lenzia leh sanzia ral atanga teh mai theih a ni lo
va, a bul kan hnaih poh leh a lenzia leh a sanzia kan hmu thin a ni. Tlang chu
ral atang chuan kam level-pui leh keini ai pawha tê zawk leh sawi tham lohvin
kan hmu thin a, mahse a bul hnaia han thlen chiah hian keini aia a let tam taka
a lenzia kan hmu ta thin ang hian Pathian khawngaihna leh hmangaihna pawh hi
ral atanga teh chuan kan neih sa khawngaihna leh hmangaihna tluk lekah emaw a
aia tê zawkah emaw kan ngai thin a, kan ti dik lo hle reng a ni. A bul hnai han
thlen chinah chiah hian a lakah chuan kan têtzia leh sawitham loh kan nihzia
kan inhmu a, kan sualzia leh tenawmzia kan inhmu chhuak fo thin a, a lakah
chuan engmah lo ai pawha zang zawk kan nihzia kan inhmu chhuak fo a nia! Mahni
lian zawk leh tithei zawka kan la inhriat chhung hi chuan Pathian kan la hnaih
tak tak lo a ni duh khawp mai.
Petera hlawhchhamna pawh kha kan ngaihtuah thin em?
Lal Isuan li thuk lam pana len te deng tura a tih khan zan khuaa an beiha an
hlawhchham thuin a chhang a, mahse Isua thua len a den leh chiah khan an lente
chat pheuh pheuh khawpin sangha an khuh ta mai a. Chutianga Isua thua an
hlawhtlin chiah khan Petera chu Lal Isua hmaah chuan mi sual a nihzia inhriain,
'Lalpa, mi kalsan rawh, mi sual ka nih hi.' (Luka 5:8) tiin a hlawhchhamnaah
Lalpa a inpuang ta zawk a ni. Petera leh a thianten zan khuaa an deng chung
pawha an hlawhchhamna hmunah khan Isua a rawn hlawhtling ta zawk a, chu Pathian
Thu chu Petera hnena a rawn thlen veleh mi hlawhchham a nihzia inhriain Lalpa
hmaah chuan mi sual a nihzia a puang ta a, chu mi sual nih inhria chu Isuan a
kalsan mai lo va, kalsan a hnekin tun hnuah chuan mihring a man tawh tur thu a
hrilh ta zawk a ni.
Petera hlawhchhamna kan sawi hi thawnthu maiah ngai
suh, nangma chanchin pawh a tel a ni. Kan hlawhchhamna te hian Pathian min
hnaihtir fo thin rawh se. Kohhran leh khawtlanga kan inhmanna te hi ngaih that
nan kan hmang palh ang tih hi ka hlau hle mai. Heng thil te hi Pathian min
hnaihtirtu atan kan hman loh phawt chuan mahni thahnemngaihna leh chapona
tlangah min lawnpui ang a, Pathian aiin keimahni kan ropui palh ang tih hi a
hlauhawm thin a ni. Keimahni lam hi zero-ah insiam zel ila, tichuan Pathian
thuin min lo chhung khat zel dawn a lo ni reng mai. Pathian Thu aia mahni kan
la indah san chhung chuan Pathian Thu hmanga chhun khahin kan awm thei ngai lo
vang.
Miin Pathian hmaah chuan mi hlawhchham an nihzia
leh mi sual an nihzia an inhriatna hmunah chiah Pathian hian a kalsan ngai tawh
lo va, a inpuanna hmun thianghlim atan a hmang thin a ni. Pathian hmaah chuan
mihring tlawm rawh tih ngai lovin kan tlawm sa hrim a, kan that lai ber leh
thil tithei nia kan inhriat lai ber pawh hi a lakah chuan engmah lo mai a lo ni
thin. "Pathian âtna chu mihring aiin a fing zawk a, Pathian chak lohna
pawh chu mihring aiin a chak zawk bawk si a....." tiin Korinth lehkhathawn
pakhatnaah kan hmu a ni (1 Korinth 1:25).
Thil mak ve deuh mai chu Pathian hian mihring lama tlinga
inngaite thlang lova mi tling lo leh mi sual nih inhriate a thlang zawk hlauh
mai hi kraws thu makna a ni. Lal Isua hunlai pawh khan i kalna apiangah ka zui
zel ang che tia full time-a inpe te thlan an ni lo va, 'Lalpa, mi sual ka ni,
min kalsan rawh....' titute thlan an ni hlauh zawk te hi mak i ti mai thei.
Mahse kan Pathian thu danglamna chu tling nia inhriate hnawl an nih laiin
tlinglo leh mi sual nih inhriate a rawngbawltu pawimawh takah thlan an ni tlat
mai hi a danglamna pakhat a ni.
Nangmahah Pathian a hlawhtlin fo
theih nan nangmah kha hlawhchham zawkah insiam fo thin ang che.
No comments:
Post a Comment