Zo Vapual

Kristian Chhungkaw Nun Zirhona Part IV

Kristian Chhungkua chuan goal-setting a nei tur a ni

C. Lalmuankima

Newcastle, United Kingdom

Photo: Google Image

Chhungkua hi tum bulbal nei lo pawhin thui tak chu a kal ve theih a, tum bulbal nei lo na na na chu a kal kawng a bo thin. Chhungkua hi tum bulbal nei lova a kal a nih chuan a dinchhan a tihlawhtling lo tihna a ni. Tum bulbal pawh nei lova chhungkua a kal phawt chuan a chhunga awmte an ngaihtuahawm hle dawn tihna a ni bawk ang. Chutiang chhungkua chuan engtik lai mahin a tum ram a thleng ngai lo bawk ang.

Tehkhin thu pakhat han zep tel lawk ila, lawng karfung nei lo chu thliin a chhemna lam lamah a tawlh thin a, a tum ram a thleng thei ngai lo ang hian chhungkua pawh hian tum bulbal tak nei lova a awm hian engtik lai mahin a dinchhan a tihlawhtling ngai lo vang a, a tum ram a thleng ngai lo bawk ang. Chuvangin chhungkua chuan tum bulbal nghet tak a nei tur a ni.

Chhungkaw member tinte Chatuan hmuna inkhung khawm vek hi Kristian Chhungkuain a tum bul ber a ni. Chu a tumah chuan a chhunga chengte zawng zawng hruai thlen chu a mawhphurhna a ni bawk. Chu a tuma hruai thleng tur chuan Kristian Chhungkua chuan thlarau lam nun hi a ngai pawimawh hmasa ber tur a ni. Kristian Chhungkua chuan thlarau lam nun a ngai pawimawh hmasa ber ang a, chumi zawhah taksa mamawh chakkhaiin a dawt chauh tur a ni. Chuti ni lova ngaih pawimawh loh zawk tur ngai pawimawha chhungkua a kal hian chhungkaw kal dan a buai thin. Ngaih pawimawh zawk tur thlarau lam nun ngaihthaha taksa mamawh chakkhaite kan ngaih pawimawh hmasak phawt chuan chhungkuain a dinchhan a ti lo va, a dinna atangin a ke pen a sawn tihna a ni. Chu chu a pawi hle a, engtik lai mahin a goal-setting a thleng ngai lo vang.

Rev. Vanlalzuata sermon ka duh deuh mai pakhat a awm. ''A ram leh a felna zawng hmasa lova a pek belhchhah tur lam ringawt ngaihtuah chuan engtik lai mahin kan indaih chuang lo vang....." a tih hi a ni. Hei hi Kristian Chhungkuaah pawh a thleng dik mek zel a ni. Kristian Chhungkua pawh hian a ram leh a felna thlarau lam nun zawng hmasa lova a pek belhchhah tur lam taksa mamawh chakkhai ringawt kan ngaih pawimawh hmasak chuan kan dinchhanaha kan ding tawh lo va, chhungkuaah engtik lai mahin kan indaih chuang lo vang.

Kristian Chhungkua chu inzirtirah a tawk mai lo va, inkaihhruai tel a ngai tel bawk. Thu tha leh hla tha hi hre teuh mah ila, inkaihhruai telna a awm si loh chuan chhungkuain a dinchhan a tihlawhtling lo fo thin a ni. Chuvangin Kristian Chhungkua chu inzirtirah tawp mai lovin a chhunga cheng member tinte kan inkaihhruai tel a ngai. Chutianga kan inkaihhruai tel phawt chuan chhungkuain a dinchhan a tihlawhtling a ni ang a, chhungkuaah hlimna leh lawmna a lo thleng thin.

Chhungkuain a goal-setting tihlawhtling turin a chhunga cheng member tinte hi kan pawimawh vek a, chhungkaw goal-setting tihlawhtling turin mahni dinhmun theuh atanga theihtawp kan chhuah hian chhungkaw ngel nghet siamin chhungkuain a tum ramah a thleng thin a ni. Chhungkaw goal-setting nei lo chuan engtik lai mahin a dinchhan a tihlawhtling ngai lo vang.