C. Lalmuankima
Newcastle, United Kingdom
Chhungkaw tlakbalna leh kehdarhna intanna hi a chhunga
cheng member tinte thawhhona a that leh that lohvah thui tak a innghat a ni a
tih theih awm e. Chhungkaw member tinte hian mahni dinhmun theuhva kan tan ho
hian chhungkaw hlim leh nuam kan din thin a, chutianga tanho nachang hre lo
chhungkua apiang chu a tawpah a lo kehchhiain a lo kehdarh thin. Chhungkaw
kehdarh lai leng chu thlawhna kehdarh ai pawhin a chhe hneh zual a, a part
pakhat mah lak tlak awm lo khawpin a kehdarh thei a ni. Chutianga chhungkaw
kehdarh tur indanna/invenna tha ber mai chu a chhunga cheng member tinte
inlungrual taka an thawhhona hi a ni.
 |
| Photo: Google Image |
"Khawvel
hi engtianga awm nge a nih tih mai pawh ni lo, tun hnaiah leh nakina a awm zel
tur enna khawl chu Chhungkua hi a ni." tiin Garner Murphy chuan a lo sawi a. Kan chenna
leilung khawvel tana X'Ray tha ber mai chu Chhungkua hi a ni a tihtheih awm e.
He Garner Murphy thu sawi hi vawiin thlengin a la dik chho zel chu a nih hi
maw. Chhungkua ber a tlakbal a, a tlakchhiat tawh tawh chuan a siamthat lehna
leh a tihdam lehna a vang tawh khawp ang a, khawvel hian beiseina pakhat mah a
nei tawh lo tluk a ni. Chu chhungkaw tlabal leh kehchhia chuan thil tam tak
nghawng chhiat a nei thin bawk.
Chu chu hriain Rev.Dr.Kenneth Chafin pawhin,"Chhungkua
ber a fuh tawh loh chuan khawvela eng pawl mah a fuh tak tak thei tawh
lo," a lo ti tawl mai le. Ni e, he khawvela eng pawl pawh hi
chhungkua atanga rawn irhchhuak, bul tanna tha a awm loh chuan a tum leh ilo
chu tha viau thin mah se, milem/milim mawi tak engmah titheilo ang mai a ni a,
a that tur ang leh nih dan tur ang a ni pha tak tak ngai lo vang. Chhungkaw nun
hi darthlalang nen tehkhin ta i la. Khawtlang darthlalang ber chhungkua a fuh
tawh loh chuan khawtlangin a nih tur ang a ni pha tawh ngai lo vang. Khawtlang
nun chhia chuan ram leh hnamah chawplehchilhin a nghawng chho nghal a, ram leh
hnam a chhiat chuan kan zavai chhiat a ni ta ber mai.
Chuvangin kan chhungkaw ke chheh tirualrem tur hian a
chhunga member tinte hi kan pawimawh vek a, a chhunga member tinten kan dinhmun
kan luah ngam a, ke kan pen chiah hian chhungkuain a nih dan tur ang tak niin a
ke chheh a tirualrem thin a ni. Chhungkaw ke chheh tirualrem tur hian
chhungkuaa pa ber chauh hi an tawk lo va, chutiang bawkin chhungkuaa nu ber
emaw fate emaw mo/makpa emaw chauh hi an tawk lo, mahni dinhmun theuh luaha kan
tanrual chiah hian chhungkuain a ke chheh a tidik thin.
Chhungkuaa thuneihna kan hman thiam loh avangte pawh
hian a changin kan chhungkaw ke chheh hi a pel he lek lek thin bawk. Chhungkaw
pa berin emaw nu berin emaw faten emaw mo/makpa ten emaw chhungkuaa thunei bik
leh dinhmun sang tak luah bik anga kan inhriat chiah hian chhungkuaah a nghing
a lo awm tan a, chu chu kan enkawl zui vat loh phei chuan a tawpah chhungkaw
tan thil pawi thleng thei khawpin min sawi nghing lawih lawih thei a ni.
Chuvangin chhungkaw ke chheh tirualrema tingil zel tur hian a chhunga cheng
member tinten inlungrual taka kan thawhhona hi i vawng nung zel ang u.
Chhungkuaa mahni dinhmun luah ngam lo leh luah nachang
hre lote avang pawh hian chhungkua hian a nih dan tur a nih theih loh phah fo
thin. Entirnan: Chhungkuaa pa berin a dinhmun luah ngam lo leh luah nachang hre
lovin emaw midang luahsak phet a tumin emaw hian chhungkuain a kal kawng a bo
tan a, a tawpah chhungkua chu a thlenna tur dik takah a thleng ngai thin lo a
ni. Chutiang zelin chhungkuaa nu berin emaw faten emaw mo/makpa ten emaw mahni
dinhmun luah ngam lo leh luah nachang hre lo leh midang dinhmun luahsak phet
kan tum chinah hian chhungkua chuan a kal tumna hmun a thleng ngai lo bawk ang.
Chuvangin chhungkua chuan tum thuhmun kan nei tur a ni. Tum nei hrang theuhva
chhungkua ke penpui kan tum chuan chhungkua hi khawi hmun mah kan thlenpui lo
vang.
I chhungkaw ke chheh tirualrem tur khan nang leh i chenpuite
tluka pawimawh dang an awm chuang lo. Chuvangin i chhungkaw ke chheh tirualrema
tingil turin nang leh i chenpuiteah khan inlungrualna leh inpumkhatna tha zawk
lo thlengin lo awm zel rawh se.
No comments:
Post a Comment