Zo Vapual

Mi tin ta tur Chanchin Tha
(Luka 2:8-20; Marka 13:10; 16:15; 1 Korinth 9:16-18)

Kan thupui hian a huam zau em em mai a, mi tin ta tur Chanchin Tha a tih avangin mi zawng zawng zingah kan tel ve chuan kan tan pawh a ni ve a ni tih hi hre hmasa ila a va tha dawn em!

Photo : Facebook

Mi zawng zawng zingah kan lo tel ve avang hian he 'Mi tin ta tur Chanchin Tha....' hi kan tan pawh a lo ni ve reng a ni. Kan retheih bik vang emaw kan hausak bik vang emaw kan hmel that loh vang emaw kan hmel that vang emaw etc...a nei tur kan ni lo va, mi tin ta tur Chanchin Tha tih a nih tlat avangin mi rethei berin a mamawh ang chiahin mi hausa ber pawhin a mamawh ve a ni. Mi fing berin a ta neih theih loh va, mi mawl ber a nih avanga duhsak bik a ni hek lo. Mi tin ta tur Chanchin Tha 'Lal Isua a lo piang a, a thi a, a thawhlehna thu lawmawm' hi mi hausa ber pumbilh theih a ni lo va, mi rethei ber hnen pawha thleng phak Chanchin Tha a nih tlat avangin vawiina nang leh kei pawh hian a zar kan lo zo ta zel a, Chanchin Tha lawmawm em em dawngtuah Lalpan min lo siam ta zel a nih hi.....!

Shopping Mall lian tak tak leh bazaar velah han kal ila, a thlawna neih theih hi zu han awm hauh lo va....! Thil tê ber leh ho bera kan ngaih pawh man chawia pek vek a lo ngai a, thil hi a thlawnin an zuar lo hrim hrim. Mi tin ta tur chu sawi loh, chhungkaw khat chauh tan pawh a thlawnin an zuar lo hrim hrim a ni. Lal Isua Chanchin Tha erawh chu mi tin ta tur Chanchin Tha a ni bawk a, a duh apiangte tan a thlawna neih theih a ni thung. Chu tluka Chanchin Tha lawmawm chu a awm chuang lo vang.

Chu mi tin ta tur Chanchin Tha lawmawm em em mai chu mi rethei ber hnenah pawh a thleng phak a, mi hausain amah chauhvin a pumbilh zawh theih a ni lo va, mi rethei leh pachhe ber hnenah pawh a thleng phak tlat mai hi mi tin ta tur Chanchin Tha lawmawm a nihna chu a ni chiang mai! Company thil siamte hi a leina tur neih loh phei chuan mi tin hnenah a thleng pha lo mai thei, Lal Isua Chanchin Tha erawh chu mi tin tan a ni a, mi rethei leh mi mawl ber hnen pawha thleng pha a nih tlat avangin a hlu em em a ni. Mi fing leh mi mawl hnena a thlen dan erawh a in chen vek lo mai thei. An fin leh mawl dan azir te pawh a ni thei ang.

Kan innghahna atana kan Bible chhiarah han han let leh ila: Beram vengtuten zana an beramte venga phula an riah chilh laiin Lalpa vantirhkoh pakhat an kianga lo ding chuan, "Hlau suh ulang, ngai rawh u, mi tin ta tur chanchin tha lawmawm em em ka rawn thlen che u a ni. Vawiinah hian in tan Davida khuaah Chhandamtu a piang ta, Lal Krista chu. Tin, hei hi in tan chhinchhiahna tur a ni, nausen puana tuam, ran chaw pekna thlenga mu in hmu ang" (Luka 2:8-10) tiin Lalpa vantirhkohvin chhinchhiahna nen thlap a rawn pe a. Beram ven hna hi a hunlai chuan hna hnuaihnung ber thawka an ngaih te an ni a, Aigupta mite phei chuan an tenzawng a ni. (Genesis 46:34)

Chutianga mite endawng leh hna hnuaihnung bera ngaih thawktu beram vengtute hnenah pawh chuan Lalpa vantirhkoh a inlar a, an mawl ang anga chhinchhiahna fel tak nen pein Lal thar Isua lo piang chu chibai buk turin an kal ta a ni. An va thlen chuan nausen chanchin vantirhkohvin a hrilh ang thlapin an va hmu a, chung thu vantirhkohvin a hrilh anga an sawi vel chu a hretuten mak an ti hle a nih kha (Luka 2:17-18). Pathian hian a mite hnena a inpuan reng rengin fiah mang lo leh tiriai ruaiin a inpuang ngai lo. Mi mâwl ber pawhin a hriat theih turin a inpuang a, mi fing te hnenah pawh an fin dan azirin a inpuang thin a ni. Chu tak chu mi tin ta tur chanchin tha lawmawm em em a nihna chu a ni.

Chu Chanchin Tha lawmawm em em dawngtute nunah chuan hlimna sawi hleih theih lohvin a thlen chilh a, Pathian fak leh chawimawi lo thei lova siamin an awm thin a ni. Beram vengtute pawh khan vantirhkoh hrilh ang ngeia engkim an hmua an hriat avangin Pathian chawimawi leh fak chung zelin an kir leh ta ang khan Pathianin a inpuanna dawngtute nunah hian amah Pathian fak leh chawimawi lo thei lovah a siam thin a, amah Pathian fak leh chawimawi hi an chaw tui ber leh hlimna ber a ni thin.

Eng ang dinhmunah pawh awmin eng hna pawh thawkin khawi hmunah pawh awm mah la, Lalpa Pathianin a inpuanna hmun zel kha i tan chuan hmun thianghlim leh hmun tha a ni zel ang a, chumi chuan amah Pathian fak leh chawimawi lo thei lo dinhmunah a siam thin ang che. Retheih leh hausak lam a ni lo va, Lalpan a inpuanna atana a hman dawn phawt chuan mihring ngaiha thil ho ber leh hnuaihnung ber te pawh hi a hming tiropuitu atan a hmang thin a ni. Chu chu engvang nge kan tih chuan 'Mi tin ta tur Chanchin Tha lawmawm em em' a nih vang a ni.

Khawvel chanchin lawmawm hi chu kan hlimpui zat chiah kan tahpui leh thin a, Lal Isua chanchin lawmawm mi tin ta tur erawh hi chu kan hriat zatah kan hlimpui a, a hre tlem ber pawhin a hriat chhun chhunah a hlimpui pha tlat a ni. Chu mai ni lovin chu a hlimna chu nitin tihpunsakin a awm thin. Mi ti ta chu Chanchin Tha lawmawm em em mai hi man chawi ngai lova a thlawna neih theih a ni a, a neih dan awlsam ber mai chu kan thinlung kawngkharte hawnsak a, Lal Isua chu kan Lal leh Chhandamtu atana kan thlen hi a ni.