Zo Vapual

TUNLAI LO MIN TI MAW...?

C.LalmuankimaNewcastle, United Kingdom

Tunlai taka nun ka tum ve ngial pawhin keimahah inthiamlohna lian tak lo chhuak thin hian min titunlai lo fo thin. 'Tunlai nun' tih hi han hrilhfiah dawn ila, kan hrilhfiah tum dan azira tunlai thei leh tunlai lo thei a ni ngei ang a, kan hrilhfiah dan a in ang lo thluah mai thei a ni.

Chung zinga tunlai nun nia lang sar zual em em pakhata lang chu, mahni thawh chhuah ni hauh lova inchhek arbawm leh inlak champ vel hi a ni ngei mai le. (A bik takin kan thalaite nun choletna atan ni se la....) Kan thalaite zingah hian mahni thawh chhuah ni hauh si lo va, inla champ leh inla chapo, inla vei hmuh tur an awm ta nuk mai a, nu leh pate thawh chhuah sa ringa inla cool em em mai te, thawhchhuah sawi tur nei hauh si lova sum hmanna tur hre hnem hle te, mahnia pawisa pawh la thawk chhuak thei hauh si lo va bat huai em em mai te, mahnia dere khat pawh thawk chhuak hawt si lova zuk leh hmuam heh em em mai te....adt..kan awm ta nuk mai le....!

Photo: Facebook Group

A tam zawk chuan zah nachang zu han hre hauh lo nia......! Zah a hnekin nu leh pate thawh chhuah sa hman ral hiau hiau hi changkanna chi khat emaw inlakna chi khat emaw tiin kan chapopui zaw mah a. Nge kei hi ka lo tunlai lo viau zawk em ni ang.....tih zawhna hi keimahah a inthum rawn tluk tluk mai. (Mi hausa faten an nu leh pate thawh chhuah sa an lo tlakral a nih pawhin ngaih khatah dah ta ila, chuti ni lova mi hausa fate tih dan zira mahni neih loh thleng thlenga kan inthuam leh intlakral kan ching erawh hi chu thalai ngaihtuahna fim tak nei chin tan chuan a va tih chi loh tak em.....! ) Hetiang anga kan kal zel a nih chuan nu leh pate rawktu leh eiraltu nget lian tak kan ni ngei ang le. Chumai ni lovin chhungkaw titlarantu leh chhungkaw hrik vei lian tak kan ni ngei ang.

Khawvelah hian eng ang mihring hi nge i zaha i ngaih ropui ber... tiin min zawt ta se la, ngaihtuah nawn ngai lova ka chhanna tur chu 'mahni thawh chhuah hmanga chhungkaw tana malsawmna thlentu, mahni tawka hna thawh hreh lo leh hna nei...' tiin ka chhang ngei ang.

Hna zawng zawng hi a zahawm vek a, a thawktu mihring te hian kan tizahawmin kan tizahawm lo mai zawk a ni. Miin eng hna pawh zahawm taka a thawh phawt chuan chumi ngei chu mi zahawma chhiar tel an ni thin. Cleaning hna atanga officer hna thlengin a zahawm dan a in ang vek a, officer hna a nih avang khan a zahawm ta viau a ni lo va; cleaning hna a nih avanga hna hnuaihnung a nihna a awm chuang lo. Officer hna thawka zah kai hauh lo kan hmu fovin a rinawm.

Chung mite ai chuan mahni hna zah tak leh rinawm taka thawk thin cleaner te pawh an zahawm fo va, a thawktu zahawmna khan hna zahawm takah a siam ta thin a ni. Officer rinawm lo leh mahni hna pawh zah tlaka thawk tha duh lo aiin cleaner rinawm leh mahni hna zah taka thawktu chungah chuan kan rinna kan nghat ngam zawk a, zahawmnaah chuan a buk pawh a rit hle a ni. Hna zahawmna hi khawi atanga teh tur nge kan tih chuan a thawktu mihring zahawm leh zahawm lohvah thui tak a innghat a tih theih ang.

Officer hna kha amahin a zahawm a ni ngawt lo, a thawktu mihring chuan a tizahawmin a tizahawmlo thei a ni. Chutiang bawkin cleaning hna pawh hi a zahawmlo a ni ngawt bik lo, a thawktu mihringin rinawm tak leh zah taka a thawh phawt chuan hna zahawm tak a tling a ni. Hna reng reng chu kan ngaih pawimawh leh pawimawh loh azira zahawm thei leh zahawm lo thei a ni bawk.

Tum khat chu kan thian pakhat nen kan inkawmnaah ka hnathawh min zawt a, full time-in College-ah ka kal a, part time-in cleaning hna ka thawk thin ka ti a; cleaning hna ka thawk ka tih avangin min nuihzat hle mai a, a nih leh engnge i thawh ve le...? tiin ka zawt a, ani chuan 'engmah ka thawk lo, ka awm mai mai....' tiin inlak hmel deuh hian min chhang a. (Amah leh a chenna in ka han en a, mi hausa fa a ni bik si lo va, nu leh pate nitin ei chawp dap ve mai an ni si a....)

Thalai chak vak tak mai, mahni tawka fiak tha awm rualin engmah thawk lova a awm mai mai thuin min chhang a, a mi chhanna chu a va lungchhiatthlak tak em....! College kal loh changa Cleaning hna ka thawh avang khan ka zahawmna ka hloh phah chuang lo va, ka zak bawk hek lo; ka hnathawhah rilru ka pek leh pek lohvah hian a ni zahawmna chu lo awm zawk ni.

Hna hnuaihnung ang taka lang, mi office-ah cleaning hna part time-a ka va thawh avang khan ka zahawmna ka hloh lo va, ka zak bawk hek lo. Hna nei lova awm awl mai mai kha a zahthlak ka ti fe zawk a ni. Ka thianpa ngaihah chuan ka lo tunlai lo a ni mai thei, mahse intih tunlai chiama hna mumal tak sawi tur neih loh ai chuan ka hlim zawk a ni.

Sawi tawh angin thawh chhuah pakhat mah sawi tur nei hauh si lova chhungte thawh chhuah saa ka lo inchhek arbawm ve ngawt a nih chuan a zahthlak hle ang. Chutiang mite chuan anmahnia zahawmna an hnawl a, mahni leh mahni an intheh dere ta thin a ni.

Thawh chhuah nei si lova pawisa hmanna tur nei hnem hle si ai chuan neih loh ang anga lan ngam hi huaisenna chi khat a ni a, chung mite chu an zahawm fe zawk a ni. Tunlai taka lan tumna hian ruk min ruktir fo thin a, chhungkua min rawktir fo thin. Chhungkaw khawlbawm pawh ualau taka dah ngam lova min siamtu chu tunlai taka lan tumna avanga lo awm a ni.

Kan nihna piah lama lantumna hian tlakrannaah min hruai thei a, mahni nihna ang anga lan ngamna erawh chuan mi zahawm takah min siam thei thung. I nihna baka lan i tumna khan i zahawmna a tihbo sak fo thin ang che.