Zo Vapual

I nu leh pa chawimawi rawh (Ephesi 6 : 1 - 3 )

C. Lalmuankima

Newcastle, United Kingdom

Nu leh pate chawimawi dan thiam lo ber leh inzir mek te zinga mi, vawiin thlenga chawimawi dan thiam lo ber te zing a miin he thupui pawimawh tak ka han sawi tur chu kan inthiam lo hle mai. Amaherawhchu a tulnain a ur thlu hrim a ni ang e, rilrua awm chu kâin a sawi chhuak thin an tih ang deuhvin ka rawn ât thlasik mau puah ve leh phawng phawng mai dawn a ni.

Photo: Google Image

Nu leh pate hi kan lei pathian te an nih angin an thu thua awm tur kan ni. Tichuan malsawm dawnna pawh a ni. Nu leh pate tirethei leh tiduhdahtute chu he khawvelah hian an hmuingil ngai lo va, an dam rei ngai lo bawk. Chuvangin nu leh pate hi nuam taka kan siam thei lo a nih pawhin an rilru kan tihrehawm tur a ni lo. Kan malsawmna dawn tur kan inping hlen thei a ni. Malsawmna dawn i duh chuan i nu leh pate enkawl tha la, duat rawh....tih a awm a, a tha hle mai. Nu leh pate duatna tur sum leh pai tam tak kan nei lo a ni mai thei, mahse an rilru hlim takin kan siam thei a ni tih erawh hi chu theihnghilh loh a tha hle ang.

Nu leh pa chawimawi te pawh hi eng dang a ni lo, chawimawina lallukhum khumtira parthi leh rimawi leh ruai ropui tak siama tih bung bung lam a ni lo va, 'ka nu, ka pa, ka chawimawi a che u.....' tih chiam a ni hek lo. Nangma nun kha Pathian thu hmanga i thuhnuai theih hunah leh midangte tana malsawmna thlentu i lo niha nun kawng fel taka i kal hunah chiah i nu leh pate kha chawplehchilhin i chawimawi nghal a ni. A hranpa a chawimawina ropui tak khumtir tum ang hrima nu leh pate chawimawi kan tum a nih phawt chuan kan tithelh fo vang. Chu tluka tih thelh lian a awm leh thei tawh lo vang.

Nu leh pate chawimawi leh thuawih hi damreina a ni tiin Ephesi 6 : 1 -3 ah khan kan chhiar fo tawh thin a. 'Hei hi Bible bung leh chang rangkachak a ni....' (golden verses) a ni ti te pawhin an sawi fo thin a ni. Kan chhinchhiah tlat a tha bawk ang. Bible mi thiamte chuan heta 'Naupangte u.....' a tih hi naupang tak tak a sawina a ni lo va, Pathian fate a sawina a ni an ti a ni. Chuti a nih chuan kan zavaiin min chah tihna a nih chu.

Damreina a ni a ti hi tha ka va ti tak em, kan sawi tawh angin nu leh pate tirethei leh tiduhdahtute an hmuingil ngai lo va, he leiah pawh hian an dam rei ngai lo. Kan nu leh pate hi Pathianin kan lei pathian atana min pek an nih angin kawng engkimah ei tur tha leh silh tur tha, chenna in nuam leh tha pui puiah dahin hmun nuam tak leh nun nuam takin siam thei lo mah ila, a man tlawm ber leh tuna kan zawm nghal theih tur rilru nuam tak erawh chuan kan siam thei a ni tih hi i hre thar leh ang u. Nu leh pate rilru nuam taka siamtu fanu/fapa te hi an hmuingil thin a, malsawmna an dawng thin. A changin tlakchhiat chang an nei a nih pawhin an tlachhe hlen tak tak thei ngai lo.

Tun khat chu pastor pakhat hian a tu leh fate a koh khawm a, a tu leh fate hmaah chuan, "Tu leh fate u, ka Hapui hi han en teh u; tuna a la that lai hian a ei theih tur thil tui leh tha thain chawm rawh u; a ei theih tawh loh hunah chuan khawvela thil tui leh chaw tui tak taka chawm tumin awmzia a nei tawh lo vang." tiin a tu leh fate chu a hrilh a. (Hei hi rawngbawltu pakhatin a tu leh fate a fuihna thil thleng tak tak a ni.)

Hemi chungchang atanga zirlai pawimawh lak chhuah ka duh chu, kan nu leh pate hi an ei theih lai, an kain tui a la thliar theih lai, an hain a la thial theih lai hian duatin kan theih tawk tawkin ei tur tha i pe ang u, an ei theih tawh loh hnu, an kâin thil tui leh tui lo a thliar theih tawh loh huna duat hian awmzia a nei tawh lo vang. Nitin sa hmehpui tur tihna lam a ni lo va, kan tlin tawk leh phak tawk piah deuh hret pawhin i duat ang u. Engmah an ei theih tawh loh huna duat tum chuan awmzia a nei tawh lo vang. Chu pawh chu nu leh pate chawimawina chi khat a ni.

Nu leh pate chawimawi hi an faten thiamna sang pui pui zir chhuaha hna tha leh ropui tak tak thawka mipui van tlang chung lama han thut luah lam a ni lo va; in leh lo tha ber ber leh awmna nuam tak tak siamsak theih pawh a ni hek lo; an/kan phak tawka duat leh ngaihsak taka kan enkawla nunkawng fel tak kan zawhna hmunah hian nu leh pate kan lo chawimawi zawk thin a ni. Nu leh pate hi khawvel lungkhamna hre lo khawpin siam thei mah ila, hmangaih taka enkawl leh duat, ngaihsak lamah kan pachhiat leh si chuan in enfiah a la ngai hle tihna a ni ang.

Nu leh pate chawimawi dan tha ber chu an thu awih hi a ni. Hmangaihtu tan chuan hmangaiha te, hmangaihi te che vel hmuh tluka nun hlimawm a lo awm ngai lo va, chu chu an hlimna ber pawh a ni. Chuvangin nu leh pate hlimna ber leh lawmna ber mai chu an fate thu awih taka an hnuaia an kun hi a ni a, chu chu nu leh pate tan chuan thil hmuh nawm ber a ni bawk. Chutiang bawkin Pathian hmaa thu awih taka kan kunna leh a thu ang zela ke kan pena kan che vel hi min hmangaihtu Pathian tan kan hmuh nawm ber lai a ni. Hmangaih te che vel hi hmangaihtu tan chuan a en kham theih loh va, cheng tam tak pawhin a lei theih loh hlimna leh lawmna a inphum ru bawk.

"I nu leh i pa chawimawi rawh,......" Ephesi 6:2