Ram leh hnam hmangaihtu tak tak kan mamawh
C. Lalmuankima
Newcastle, United Kingdon
Ram leh hnam hmangaihna hi a theory (a sawia sawi) a inzirtira inhrilhah a tawk mai lo va, a taka thawh chhuahnaah hian a innghat a, chutah chuan ram leh hnam hmasawnna a lo awm thin a ni. Rilru leh tawngka chauhva ram leh hnam hmangaih a, a taka thawk chhuak peih lo ram leh hnam hruaitu chuan ram leh hnam tan eng hlawhtlinna mah a thawk chhuak ngai lo vang. Chuvangin ram leh hnam hmangaihna leh khua leh tui tha nihna hi a sawia sawiah a tawp mai lo va, a taka chetchhuahpuina/thawhchhuahpuina ah hian ram leh hnamin hmasawnna ropui tak a lo nei thin a ni. Ram leh hnam hmangaihna leh hmasawnna hi a theory-ah a innghat lo va, practical-ah a innghat zawk a ni.
A theory chuan nitin cheng nuai sang tel pawh haichhuak thin mah ila, a practical taka ni khatah cheng khat pawh kan haichhuak thei lo a nih chuan ram leh hnam hmasawnna ropui tak neih chu a har ngawt ang. Chuvangin kan tawngka leh che zia hi in balance (intluk tlang) tur a ni. Chutianga kan tawngka leh che zia chu a intluk tlan phawt chuan ram leh hnam hmasawn tura inzirtir kan ngai tawh lo vang.
I ram leh hnam tan vawi sang khat aia tam pawh thi ngamin i nun hlan ngam mah la, i hnua thang leh thar lo kal zel tur te tan ram leh hnam hmangaihna tak tak thinlung i hnutchhiah chuan si loh chuan engmah awmzia a nei lo tihna a ni ang. Ram leh hnam hmangaihna hi a sawia sawiah ni lovin a taka thawhchhuahnaah a innghat zawk a ni.
Ram leh hnam hmangaihna tak tak thinlung neitu chuan a hnua lo kal tur thang leh thar te tan kawng dik leh tha a sialsak thin a, chumai ni lovin amah anga ram leh hnam hmangaihtu tak tak a chher chhuak thin a ni. A sawi zawnga sawi tlawr dup thei, a taka thawh chhuah lama thawk chhuak tha peih lo te hi ram leh hnam hmangaihtu dik tak an ni thei ngai lo vang a, ram leh hnam hmelma lian tak, ram leh hnam tlakchhiatna thlentute an ni zawk a ni.
To be continued....
No comments:
Post a Comment