Zo Vapual

Lalpa tan inbung ruak rawh

C. Lalmuankima

Newcastle, United Kingdom

Mak ka tih em em mai chu, indonaa miin kut khing hnih meuh phar a, a kut a lek chhoh chuan 'ka tlawm e' 'ka inpe e' tih a lantir a. An hmelma te mana awmin an awm thin. Tichuan hmelma kut hnuaiah chuan an tang ta thin a ni. Ka Lalpan kraws ler thing kawkalha ban phar meuhva tlawm taka a tawrhna erawh chuan hnehna ropui tak min chantir/siamsak ta hlauh zawk a; hmelma Setanan 'ka khengbet a, thlanah ka phum ta' a tiha ngei kha thlan thim leh mitthi khua te pawhin an chelh hneh rual lohvin kaih thawhin a awm leh ta zawk a, chu nun thiltithei tak mai min pe chu kan inhmeh lo em a, a mak ka ti tawp thei lo a ni.

Fakna hla siamtu Evan J. Zaihmingthanga hla a 'Mak tiin khawvel ka hmang ral ang....' a tih angin ka Lalpa zarah kan chenna khawvel hi mak tiin kan hmang ral dawn a ni. Van hmun ropui kalsana sual fa min tlan tura lei thima a lo vak vai hi a mak tawh teh reng nen, mi sual nung tlak lo min thlang a kan thih ai min thihsak maiah duh tawk lovin nakinah Van in kan thlen hunah pawh lawmna mittui luang nen min lo kuangkuah leh zel tur hi a van thlamuanthlakin a van mak teh reng em......!

Lei lam chhiarkawpa chhut chuan thil atthlak leh ho tak a ni a, van lam chhiarkawp atang erawh chuan a duh taka a siam hringfa te sual lak ata kan chhuah leh theihna tura a fapa mal neih chhun a rawn tir hi a ropui tawp khawk a, Pathian fapa meuh mihringa lo changa min tlan tura a lo kal hi a mak em atin a ni. Eng dang vang erawh a ni lo, min hmangaihna vang a ni.

Chu ngei chu kraws thu kan hril thin hi a ni. Chu kraws thu chu boral mek te tan chuan atna a ni si a, keini chhandam mek te tan erawh chuan Pathian thiltihtheihna a ni zawk a....(1 Korinth 1:18) Chu kraws thu thiltithei takin a man beh tawh te nun chu a thlamuang thin a, Lalpaah nun tam an nei ta thin a ni.

Ka Lalpan kraws lera ban min lo pharsakna avang khan vawiinah hian nun ka lo neih ve phah a, ka Lalpan kraws lerah khan khawvel mi ngaihin tlawm takin ban min lo pharsak lo se la chuan he khawvel sual tuipui hi ka tan han hleuh kai rual a ni lo vang.

Hmelma tih tlawma a awmna hmun ngei, Kalvari Kraws a ban min lo pharsakna chuan nang leh kei chatuana boral mai tur min chhandam a, van khua leh tui nihna min pe ta zawk a; tlawm taka ban a lo pharna hmun ngeiah khan chhandamna ropui tak min lo siamsak ta zawk a ni. Tlawmna nun hmangin min lo lei ta zawk a, Pathian fapa chu mihring fapaah rawn changin, kraws mi sualte tana thihna kraws anchhe dawnah ngei chuan sualna pakhat mah nei lo chu khenbehin a lo awm ta a, a thisen chhuak leh tlawmna nun hmangin mi zawng zawng chu hmelma kut ata min lo lei ta zawk a ni.

Tlawmna nun hi a va pawimawh tak em...! Lalpa hmaah tlawm hmasa lovin ban a phar mai mai theih loh. Bar phar nun hian tlawmna a entir a, chu tlawmna nun chu Lal Isua min zirtirna pawimawh tak a ni thung, chu mai ni lovin a nuna inphum nghet tlat a ni bawk. Miin tlawmna nun tel lovin Lal ram a zauh theih loh va, Lalpa hmaa kan nun hi a tuiral hmasak phawt loh chuan kohhran, khawtlang, ram leh hnamah mite ei tlak khawpin rah tha kan chhuah thei ngai lo vang. Pathian tan inbun ruak rawh. Keini chu Pathian thu ni lo, thil dang hi kan pai tam leh lutuk a; kan inbung ruak phal thin lo va, mite tan malsawmna kan ni thei lo fo thin. Mi dang te tan malsawmna ni thei tur chuan keimahnia bet tlat thin leh min tihnawk thei apiang te hi paih thlain Lalpa tan i inbung ruak thin ang u.

Lalpa hmaa kan inbun ruah vekna hmunah hian amah ngeiin a thu tak hmangin min chhung khat ang a, tichuan mi dang te tan rah tam tak kan chhuah thei dawn a ni. Lalpa tan inbung ruak rawh le, Lalpa tana i inbun ruahna hmunah ngei khan Lalpa a inpuang zel ang.

Pathian chauh hi kan nun khawhar leh ruak tak tikhat theitu a ni.