Zo Vapual

Lalpaa beiseina

Chhungkuaah hian Chair latu (chairman thawktu) chu LALPA a nih phawt chuan, chu ngei chu tehna puitling dik lo thei lo a ni a; engkim mai hi a fel vel vek thin. Keini chu LALPA khi chairman thawhtir lovin tirhkah ah hman kan tum zawk thin a, keimahni ngeiin chair (chairman hna) lak kan tum thin avangin kan chhungkaw din hi a buai nuaih ta thin a ni.

Photo : Google Image

Engkim kan tihna apiangah Lalpa khi dah lal zel ila, Lalpaah khian innghat ngam zel ila, kan nun hi a hah chawl ve tawh ang. Nang leh keia chhungkaw mamawh chu nang leh kei aiin Lalpa khian a hre zawk daih a, nang leh keia chhungkaw tana tha tur pawh a hre zawk a ni. Amahah khian beiseina nghat zel ila, rinna chu thil beiseite awm ngeia hriatna, thil hmuh loh te hriatfiahna a ni (Heb 11:1) a tih angin kan beiseinate min tihhlawhtlinsak turin kan Pathian khi a inpeih reng a ni.

Lalpa khi i beisei tlat ang u, a ni chuan min tihlawhchham dawn si lo. Amah beiseitute leh koh tute tihlawhchham ngai lo leh chhang lova chhuah ngai lo Pathian a ni si a, rilru leh thinlung takin i beisei tlat ang u.

Rawngbawltu pakhat thu sawi ka duh em em mai chu,"Hapui min petu chuan a thial tur pawh min pe zel dawn a ni," a tih hi a ni. Ka van duh tak em....! Awmlo ata awma min siamtu leh min dinchhuak tu ngei chuan min tithlawn dawn si lo va, kan za atana a fapa petu ngei chuan thil dang zawng zawng pawh a thlawna pek tel min la tiam cheu si a, a van thlamuanthlak tak em....!

Hawh u, Lalpa khi i beisei tlat ang u. Amahah khian thil engkim mai hi a awm si a, amah beiseitute tihhlawhtlinsak thin Pathian a ni si a; i beiseinate a tihhlawhtlinsak ngei dawn si che a, beidawng hauh lovin i beisei tlat ang u.