Zo Vapual

Chanchin Thaa inthlunzawm - Chhungkua

C. Lalmuankima 

Slough, United Kingdom 

Chanchin Tha (Pathian Thu) avang a nih loh chuan Chhungkua hi inenkawlin inzirtir thin mah ila eng emaw ni tihsual hlekah ‘Chu mi vang a ni’ ‘Kha mi vang a ni’ ‘Nangmah vang a ni’ adt. tiin a chhan leh vang tha tak sawi tur awm lovin tu tute emaw inmawhpuh a awl hle mai a, a tawpah chhungkaw kehdarhna hial te pawh a thleng thin a ni. Chanchin Tha (Pathian Thu) avang a nih erawh chuan eng emaw ni tihsual palh thil thu a lo awm pawhin Chanchin Tha (Pathian Thu) ah kan inthawi dam leh mai thin a, Pathian Thu bawkin min tuam dam leh thin. Rawngbawltu pakhat tawngtai thuchham tha ka tih leh ka nun min hneh deuh mai chu, ‘Lalpa, kei hi chu lo na mah ila, Chanchin Thain min tuam dam leh thin. Kei hi chu a tlawm zawk zelah min siam ang che. Lalpa, kei hi chu a chan zawk zelah min siam ang che….’ a tih hi a ni. Pathian Thu hmanga intuam dam nachang hre lo chhungkua kan nih chuan a pawi ngawt ang le. 

Photo: Google Image 

Chhungkaw buaina leh harsatna thawi damna tha ber mai chu Chanchin Tha (Pathian Thu) hi a ni. Chhungkuaa harsatna hi mimal emaw a chhunga cheng member zawng zawng emawa sut kian theih loh chin a lo awm a nih pawhin Chanchin Tha (Pathian Thu) erawh chuan harsatna te ber atanga a lian ber leh chingchivet ber thleng pawhin min chinfelsak thei a, chhungkaw buaina te ber atanga a lian ber thlenga min chinfelsak thei awm chhun pawh Chanchin Tha bawk hi a ni. Chuvangin chhungkuain a innghahnatlak ber leh a innghahna lungphuma a hmanna tur hmun dik tak chu Chanchin Tha hi a ni. Ringtu kan nih chuan Chanchin Tha hi kan innghahna lungphum atan kan hmang thin tur a ni a, chuti ni lova Chanchin Thaa innghah nachang hre lova khawvel thilah emaw chhungkaw member tu tuteah emaw chunga kan innghat a nih phawt chuan kan innghahna hmun a fuh tawh lo va, chhungkaw hma lam hun kal zel turah pawh a dik tawh lo va, a tawpah Chhungkuain a kalkawng a bo phah thei. Chanchin Thaa innghah nachang hre lo chhungkuaah bawk hian a ni chhungkaw kehdarhna lo thleng thin ni. Pathianin chhungkua min dinsak ve a nih ro ro chuan Amah Pathian (Chanchin Tha) a innghah hi a him ber a, chhungkaw kehdarhna a awm lo ber bawk. 

Chuvangin Chanchin Thaa (Pathian Thu) inhumhim nachang hria apiangte nun hi a him thin a, harsatna leh buaina tawp khawk tawh hnuah pawh Chanchin Thaa inhumhim nachang hre lo khawpa sualin a phuar beh kan nih chuan a pawi viau thung ang. Inhumhimna atana tha ber leh tlak ber chu Chanchin Tha hi a ni. Pathian thu hi inhumhimna atan i hmang thin ang u, tichuan kan tisual lo ber ang. Khawvel thilte hi inhumhimna leh innghahna atan a va tlak lo tak em! Khawvel thil hi chu inhumhimna atan hmang thin ve bawk mah ila kan hman chin chinah min tithlabartu leh kan mittui titla tamtu an chang leh thin a, kan him tak tak thin lo. Pathian Thua inhumhimna erawh chuan khawvelin a pek theih loh thlamuanna a chhawm tel a, chu chuan nun thlamuanna min siamsak tel a ni. Chuvangin harsatna leh buaina kan tawh huna kan inhumhimna leh innghahna tlak ber chu Pathian Thu hi a ni a, Pathian Thu inhumhimna atana hmangtu erawh an mualpho ngai lo thung.

Chhungkuaa Pathian Thu kan sawiho thei ringawt pawh hi a man a tam tak zet a, khawvel sum leh pai leh ro thil hlu zawng zawng pawhin a lei theih loh a ni. Chhungkuaa Pathian Thu sawiho thei lo khawpa kan awm chinah chuan sualin min zuam em em thin a, a tawpah a bawiah min neih thuai thin. Chuvangin Chanchin Tha hi chhungkaw thlunzawmtu atan kan hman phawt chuan kan chhungkua hi engtik lai mahin a tluchhe lo vang a, a mualpho ngai hek lo vang. Chuti ni lova kan chhungkua min thlun zawm tura thil dang kan hmang a nih phawt chuan engtik lai mahin kan che fuh ngai lo vang a, kan ding khaw chhuak lo bawk ang.

Chhungkua hi Chanchin Thaa inthlunzawm nachang kan hriat phawt chuan engtiang khawpa hmelma thlemna lian tak pawhin chhungkuaah bu rawn khuar tum mah sela, hmelma tihmualphovin an awm leh ang. Chhungkua hi Chanchin Thaa inthlunzawm nachang kan hriat loh erawh chuan thil ho teah kan inmawhpuh ang a, a tawpah thil ho te bawk hmangin chhungkua hial pawh kehchhe khawpin kan siam thei a ni. Hawh u, chhungkua hi Chanchin Thaah hian i inthlunzawm tlat ang u. Chanchin Tha pel dawrh khawp thil dangah hi chuan inthlunzawm i tum lo hram ang u. Nakin lehzela kan mualphona zakhua min thlentu an la ni thei a ni. 

Chhungkua hi Chanchin Thaa kan inthlunzawm phawt chuan thil dangah pawh sawi ngai lovin kan lo inthlunzawm nghet a, a pawimawh ber mai Chanchin Thaa kan inthlunzawm tawh chuan thil dang hi chu a behbawm lek a ni tawh thin. Chanchin Thaa inthlunzawm thei lo khawpa hmelma Setanan a thikthuchhiatna avanga kan chhungkuaah hem thlak a tum thin a nih chuan Lalpa lam chauh enin ke pen tlat i tum ang u. Chutianga Lalpa lam chauh kan en a, kan chhungkua hi kan innghahna bulpui ber atan Chanchin Tha (Pathian Thu) hi kan hmang a nih chuan engtik lai mahin kan chhungkua hi tihnghinin kan awm ngai lo vang. Kan dinna lungpui Kristaa kan din ngheh phawt chuan thlipui leh ruahpui anga hrang thin sual lakah pawh humhimin kan awm zel dawn a ni. Hei hi kan hriat reng atan a tha ang, innghahna tur dik lovah chhungkua hi kan innghat palh vaih a nih chuan engtik lai maha siamthat leh theih tawh loh khawpa chhiain chhungkua hi kan kehdarh thei a ni. Chhungkaw innghahna lungphum atan chuan Chanchin (Pathian Thu) hi a tlo ber a, chhungkaw inthlumzawmna atan pawh Chanchin Tha hi ni zel rawh se.