Zo Vapual

Hmangaihna mitin i mihringpuite thlir thin rawh

C. Lalmuankima 

Slough, United Kingdom 

Hmangaihna mita ena Lal Isua atanga mi kan teh thin loh chuan mi tumah kan teh tling ngai lo vang. Keimahni ngei pawh hi Lal Isua avanga tling, Lal Isua avang veka chatuan nunna nei, Lal Isua avanga Pa Pathian hmaa mi tling kan ni si a, Lal Isua atang zel hian teh thin ila a lo fuh ber a; a hahdam ber bawk a; mi tumah teh tlinloh kan nei ngai tawh lo vang. Mi tam tak chu Isua atanga ena teh nachang kan hre thin lo va, mite tlin lohna lai leh an chet fuh tawk lohna lai hmuh phet kan tum a, mi hi kan teh tling zo thin lo a ni. Hmangaihna mita mite kan thlir thin loh avangin kan mihringpuite kan teh tling thei lo a ni ber mai. 

Photo : Google Image

Nangmah atanga i teh chuan nang aia fel anga lang leh khawvela mi fel ber pawh a sualna leh thil tihsual zawngin i mitah chuan a tling chuang lo vang a ( nang aia sual anga lang chu sawi lohva lumah ti ila....), an tih that poh leh an fel lohna lai hmuhchhuah tumin tan i la nasa ting mai ang....!!! Mihring mize kal sual laileng hi chu hlauhawm tak a ni a, kan khinpuiten an tih that poh leh an tihsualna lai hmuh tum leh chang ranin kan rilru ngaihtuahna hi a lo hmanhlel ve thin a, chu chu hmelma Setana hnathawh a ni tih kan hriat loh phei chuan midangte tana malsawmna nih a hnekin mahni ngei pawh anchhiaah kan inchhuah thin a ni. 

Lal Isua atanga i teh a, hmangaihna mita i en phawt chuan mi tha lo leh mi sual bera i ngaih pawh kha i hmu tling tawh ang a, nangmah ngei pawh Lal Isua khawngaihna zara tling ve chawp i nihzia i hria ang a, mi sual ber : tualthatpa, uirenu, rukrupa, dawtsawi ching, kawhmawh bawl ....etc. pawh Isua thisen chuan a silfai vek thei a ni tih i hmufiah tawh ang a, i teh tling vek tawh dawn a ni. A pawimawh ber mai chu Lal Isua atanga bul tan tur hi kan lo theihnghilh leh thin hian kan ngaihtuahna a tibuai fo thin a lo ni zawk e. Tehna kipui ber atan Lal Isua Hmangaihna kan hman phawt chuan tumah tlinglo kan awm lo, Lalpa Isua zara Pa Pathian thinlunga tling vek kan ni. Pathian khawngaihna leh hmangaihna thinlung atang chuan mi tumah tling lo kan awm lo. Chuvangin Lalpa Pathian atang zel hian kan tehna ki hi hmang thin ila, kan mihringpui kan hmelmate ngei pawh ni se kan lo teh tling tawh dawn a lo ni. Kan rilruah, 'Mahni hmelmate hial teh tlin chu a ni thei dawn em ni, i ti lutuk deuh lo maw...?' kan ti mai thei. Mahse a hmelmate tan pawha ngaihdamna dilsaktu Lal Isua ngei pawh khan nang leh kei atan hian Kalvari krawsah khan a thisen far ral thakin min lo tlan tawh a, kan nihna zawng zawng thlan thim thuk tak hnuaiah luhpuiin a phum a, a tholeh nun duhawm tak chu min lo pe zawk asin! Chu nun atanga kan hmelmate kan en phawt chuan nangmah a hmangaih tluk thovin i hmelmate pawh kha Lal Isuan a hmangaih a ni tih hi i hmu thiam tawh ang. Chu Isua nun chu tehna dik lo thei lova kan hman nun awmchhun chu a ni. A thisena man dang beisei lova min tlantu hian a thisen far khat chauh pawh hi a luanraltir mai mai dawn lo a ni. 

Tih tak emah chuan hmangaihna mit atanga thlira mite kan teh loh chuan mahni ngei pawhin kan inteh tling zo lo a nia! Mahni ngei pawh induh khawp loh chang hi mimal tin hian kan nei fur asin! Keimah ngei pawh Isua khawngaihna leh hmangaihna atanga tling lek ka ni tih ka inhriat fo loh chuan mahnia inteh tlinga nun thei ka ni lo. Fakna hla siamtuin 'Lalpa, nang chauh hi ka tlinna i ni' tia a lo sawi angin Lalpa atang lo chuan mahnia inteh tling zia zang kan ni lo va, kan tlinna awmchhun pawh Amah Lalpa Pathian bawk a nih avangin kan mihringpuite chunga tehna ki kan lek dawn ro ro a nih chuan Isua khawngaihna leh hmangaihna hi lek thin ila, tichuan hringnun hi hlim leh nuam takin kan hmang mai dawn a lo ni reng mai. 

Lalpa Pathian atanga tehna ki hmang duh lote bawk hi a ni an nuna malsawm dawnna luankawr tur pawh inkhar hnan thin ni. Mihring tehna ki hi chu engtik lai mahin a rintlak ngai loh va, a dik ngai lo bawk. Thu hmasa lama kan sawi tak ang khan Lalpa atang ni lo, keimahni atanga kan teh chuan keini aia fel leh tha pawh an fel lohna lai leh an that lohna lai hmuh tumin kan zawng ngar ngar thin a, kan teh tling chuang lo. Chuvangin Lalpa atang zela tehna ki kan hman zel hi kan mihringpuite chungah pawh a lo tha a, tichuan teh tlin loh kan nei ngai tawh lo vang. Kan tehna ki kan hmanna tur dik tak chu Lalpa Isua atang zel hian ni thin rawh se. Chu Isua nun i neih ngei chuan i hmelmate lamin inremna a siamsak zawk ang che. 

Mi zawng zawng hi Lal Isua tel lo chuan Pa Pathian hmaah kan tling zo lo va, Lal Isua avang erawh chuan mi zawng zawng hi Pa Pathian hmaah mi tlinglo kan awm lo ve thung. Chuvangin kan mihringpuite hi keimahni thlirna zawn atanga teh mai lovin Lalpa Pathian khawngaihna leh hmangaihna zawn atangin thlirin teh thin ila, kan lo teh tling zel tawh dawn a lo ni reng mai. Tehna ki pawimawh ber Isua Krista nun atang zel hian teh thin ila, tichuan mi tumah teh tlin loh kan nei ngai tawh lo vang. Nangmah leh i mihringpuite kha Pathian khawngaihna leh hmangaihna mit atanga thlirin teh thin ang che.