Zo Vapual

Kalsan nun nei thin rawh

C. Lalmuankima 

Slough, United Kingdom 

Lal Isua Krista atanga kan nun chan, a lo thanlen a, mi dangte tan rah tha leh duhawm tak chhuah zel tur chuan he khawvel thil Isua hmel hliah thei thil hi kan kalsan fo a ngai a ni. Khawvel thil Isua hmel hliah thei thil nena inkaihkuah reng chung si chuan mi dangte tan malsawmna a nih theih loh. Chuvangin kan nun a lo thanlena mi dangte tana malsawmna ni zel thei tur chuan keimahnia Isua hmel hliah thei khawvel thil hi kan kalsan ngam zel a pawimawh a, chutianga keimahnia Isua hmel hliah thei khawvel thil kan kalsan tamna hmun apiangah miten keimahniah Isua hmel an hmu ang a, kan nun chu mi dangte tan malsawmna luankawrah Lalpan a hmang zel dawn a ni. 

Ringtu nunah chuan kalsan/tlansan nei tam apiangte hi midangte tan malsawmna an ni thin. Engvangin nge midangte tana malsawmna kan nih theih thin loh kan tih chuan keimahni min ei chhetu Lal Isua hmel hliah thin tisa thil kan kalsan/tlansan ngam thin loh vang a ni duh khawp mai. 

Lalpa avanga min uai hnawktu khawvel thil (tisa thiltih) kalsan/tlansan phal (ngam) apiangte hian Lalpaah nun tam an lo nei thin a, midangte tan malsawmna niin rah tha an chhuah thin a ni. Kan kalsan ngam loh leh phal loh thil te hian ringtu nun hi min hnuk hniam fo thin a, midangte tana malsawmna nih chu sawi loh keimahni nun ngei pawh hi mite tana ei tlak lohvah kan inchhuah thin. 

Tuna i dinhmun atang khan engnge kalsan (chhuahsan/tlansan) tur i neih ve le? Mi mal tinten kan thlen chin a in ang lo vang, mi mal tinte kan thlen chin in ang lo mah sela kan thlen chin chinah kalsan tur kan nei theuh. A thenin an nunah zu leh sa kalsan tur an nei mai thei, a then erawh chuan gambling lamah emaw a ni thei bawk. Chutiang zelin thenkhat erawh chuan keimahnia chapona leh duhamna te pawh a ni thei. A then tan chuan thinrimna leh thinurna te pawh a ni ngei ang, chutiang chuan kan thlen chin chinah kan nuna Isua hmel hliah thei khawvel thil kalsan tur kan nei theuh a ni. Chu tak mai chu Lalpa hming avanga kan kalsan ngam phawt chuan he leiah chan ber angin lang mah ila, vanramah kan tan lallukhum ropui tak buatsaihin a la awm dawn a ni. Isua hmel hliah thei khawvel thil i kalsan chin chinah nangmahah khan Pathian inpuanna ropui tak i chang zel ang. Isua hmel hliah thei khawvel thil kan kalsan ngam thin loh avangin keimahnia Pathian inpuanna ropui tak lo thleng tur pawh kan dal fo thin a ni. 

Lal Isua ngeiin ''Tu pawhin mi zui a duh chuan mahni hrehawm pawi sa lovin, nitin a kraws puin mi zui rawh se...." (Luke 9:23) tiin a lo sawi a. Chawlhkar khat dan emaw chawlhkar hnih dan emaw thla khat dan emaw kum khat dan emaw a kraws puin mi zui rawh se a ti lo va, nitin a kraws puin mi zui rawh se a ti a ni. Nitin mahni lam zel kan thihna hmunah chiah hian keimahniah Lal Isuan lalna a chang zel ang a, tichuan midangte tana ei tlak leh malsawmtlakin kan nun hi a rah chhuak tawh dawn a ni.

Kraws put chungchang hi han tuihnih ve leh lawk ila. Mihring kan ni a, mi in ang lo tak tak kan ni bawk a, ringtu tan kan kraws put te chu a in ang vek lo mai thei. Kan ni tin nuna kan kraws put atana Lalpan min pek hi a in ang vek kher lo vang. Thenkhat tan chuan kan fanu emaw kan fapa emaw chu kan ni tin kraws put a ni thei a, a then tan kan thiante leh kan thawhpuite leh kan zirpuite pawh an ni thei bawk. Chutiang chuan kan ni tin nun atana kan kraws put in ang vek lo mah sela, Lalpan kan ni tin nuna kan kraws put atana min thlansak a nih chuan lawm taka put mai kha kan nuna malsawmna kan dawnna tur pawimawh tak a ni zawk asin! Pathianin i tana a remruat a nih chuan engvangin nge i zawh let kher? 'Lawm takin i kraws ka pu zel ang e...' ti mai tur kan ni mai dawn lawm ni? Pathian khian kan put theih loh tur khawpa lian chu kan nunah hiam min puttir hauh lo vang. Kan ni tin nuna kan kraws put theih tawk tur chu Amah Pathian bawk khian a hria a, chu a remruatnaah chuan lawm taka a kraws put mai kha mi dnagte tana malsawm luankawr atan min hmanna tur a ni. 

Mihring lam kan channa zelah hian Lal Isua hi a lo hlawk thin a, Lalpa avanga chan tam apiangten nakinah vanram thlen hunah lallukhum ropui tak an la khum dawn a ni. Mahni lama chan hlau reng renga awmte hi ringtu nun sawngnawi tak neihna a ni a, ringtu nunah thanglian thei lova min siamtu a ni fo thin. Chuvangin mi dangte damna tur a nih phawt chuan Lalpaah khian a chan zawk zelah insiam thin ang che. Mi dangte damna tura Lalpaa a chan zawk zela kan insiamna hmunah chiah hian a ni mi dangte tana par rimtui kan lo chhuaha mi dangte tana malsawmna luankawr kan lo nih ni.

Keimahni lamah damna kan zawn fo chuan mi dangte nunah damna leh hlimna thlentu kan ni thei ngai lo vang. Lal Isua ngei pawh kha kalvari kawrsa an khenbeh khan ama lamah damna zawng duh se la chuan Pathian fapa a ni a, kraws ler atang pawh khan rawn chhukin intidam thei a ni asin! Amah nghaisatute leh tiduhdaha mantu Rom sipaiho pawh kha mitkhap kar lovah a tiboral vek thei asin! Mahse a damna tur a zawng lo va, a lo kal chhan ber a tihhlawhtlin theiha Pa Pathian thinlunga kan dam kumkhua theihna tur zawkin Amah ngei chuan kraws thihna chu a rawn kaltlang ta zawk a, tichuan Amah leh Amah intidam thei reng chung khan Pa Pathian thinlunga kan natna chu a rawn thaibo ta a, lei leh van inremna Jubilee Dar chu min lo vuaksak ta zawk a ni. Mahni ngei intidam thei lova khan Pa Pathian thinlungah damna a thlen mai bakah vawiin khawvela mihringte tan damna a thlen ta a, Isua zarah mi tam takin damna (nunna) kan chang ta a nih hi!

Chu tak mai chu a ni a kraws pua zuina nun chu. Mahni lama damna zawng lova tlansan ngai apiangte kan tlansan hian mi dangte tan malsawmna thlentu kan ni zawk a. Keimahnia sawithiah ngai apiangte sawithiah ngam zelna nun hi a ni mi dangte tana malsawmna luankawr atana min siamtu tur chu. Chuvangin i kalsan ngam chin chinah khan inpuang zel turin i Lalpa khian hma a hruai tawh a, chu a hniakhnung zui thei zel tur chuan Pathianin tichak deuh deuh che se la, Isua hmel hliah thei khawvel thil tlansan ngam zel tur chein i nun chu mi dangte tana malsawmna luankawr ni zel thei turin buatsaihsak thar zel che rawh se. Isua hmel hliah thei khawvel thil i tlansan tam poh leh nangmahah mi dangte tana ei tlak rah tha i chhuah zel dawn a ni.