Zo Vapual

Windsor Castle leh the Long Walk
C. Lalmuankima
Slough, United Kingdom

Ni 6 March 2020 khan Lalnu (Queen Elizabeth II) castle duh leh ngainat ber tlawhlohna a rei tawh alawm le tiin Slough atangin kein ka kal a. Eton College (Royal family ten lehkha an zirna hmun, politicians lar tak tak David Cameron te, Boris Johnson te leh midang hming lar tak takte inzir chhuahna hmun) ka paltlang a, tichuan Eton Village ka paltlang leh hnuin a ral lehlam lawk Lalnu kulh ngainat ber Windsor Castle chu ka thleng ta a ni. Lalnu leh a chhungte pawh an lo dam tlang a ni ang, lal in chhung atangin thu lungchhiatthlak kan hre bawk si lo va 😅, tunlai tak erawh Megxist boruak vel avangin Lal Chhungkua an buai hle a, an rilru pawh an seng hle ang tih a rinawm. Kha lam chu kan sawi tum a nih loh avangin sawi lohva lumah dah ta mai ila.....

Photo : Zo Vapual

Tichuan Windsor Castle leh a chhehvelah eng eng emaw ni thil ena ka hawkdak mek laiin The Long Walk leh Deer Park lamah kal turin ka rilru ka her thut mai a, the Long Walk kal tur chuan hun pek ve deuh a ngai a, Windsor Castle atang Georgius Rex lim awmna thleng kal tur hian mile 3 lai a nih avangin darkar khat dawn kal a ngai a, mel 3 chuang kea kal tur chuan kal lam leh hawng lam tiamin a tlem berah darkar 2 vel ka mamawh tih ka hria a. Tichuan chawhnu dar 3 rik tepah The Long Walk chu ka han zawh ve ta phawt a.

The Long Walk leh Deer Park - Kawng laka ka thil hmuh thenkhatte

A. Thingkung ngir suauvin ka lung min dum

He The Long Walk leh Deer Park sir tawnah hian thingkung tlar hnihin an kal pheitir a, Windsor Castle atanga Georgio Tertio Patri Optimo Geogius Rex lim thleng an phun ngir suau mai han hmuh hian mit men a tihahdam hliah hliah a, a bula kalte leh che velte tan pawh chawlhna hlim nuam tak a siam a ni.

B. The Long Walk leh Deer Park an enkawl tha

Heti khawpa ram awl zau tak mai a fur a thal a thlasika hring cham dul reng maia an enkawl tha hi sawi tel loh atan chuan a uiawm dawn em a, ka han sawi tel hram teh ang. The Long Walk lehlam lehlam han hawi ila, a hring nalh em em a, mit men a rinuam tak zet a ni. A enkawlna senso ringawt pawh hi a hau tak ngawtin a rinawm. The Long Walk a ka kal mek lai pawhin a enkawltute leh security car vawi hnih lai ka tawk a, an vilveng tha hlein ka hria. Chutianga vilveng tha na na na chu mipui pawhin kan zah bawk a, a chhehvelah thinghnah ro tla tih loh chu bawlhhlawh pakhat mah ka hmuh der loh chu le! An van vawng thianghlim tak em! Keini ram ang ni se la chuan kawng lakah kuhva tui kan chhak sen leh puat puat ang a, a sira thingkung ding ngir suauvah chinai kan tat var leh nuk ang a, chu mai bakah park leh a chhehvelah bawlhhlawh kan theh khat leh nukin a rinawm. Aw....mi ram hi chu an lo va thianghlimin dan an lo va zawh tha tak em tih hi kawng laka ka kal mek laia ka rilrua rawn inthumrawn tlut tlut ri awm chhun a ni.

C. Deer Park

Deer Park a nih angin sazuk/sakhi tla pawh kawnga kalte tan hmuh theihin an awm. Sazuk/sakhi tla lai ral atangin a hmuh theih a, ramsa a huhova an tla dial dial mai han hmuh hian rilru an tihlim tak zet a ni. Deer Park chhunga awm sazuk/sakhi te hi nitin maia mihring an hmuh thin vang nge ni ang an ngampa em em a, a chang chuan thla han lakte hian nalh takin an lo in post ve a!

Pathian thil siam ramsa kan hmuh theihte hian nun an tihlim a, an che vel rimgawt pawh hi a hmuhnawm a ni.

D. Park zau nuam tak a ni

Park zau nuam tak a nih avang hian nau awma lo innawr lawp lawp te, ui lo walk tawk lah bo lo, exercise laa jogging lo ti lawp lawp te hmuh tur an awm zut mai. Chu mai bakah nula leh tlangval a thianga lo inkuaha lo inkhalhbing tawk lah awm ve bawk. Tin, thalah phei chuan he Park hi a lun lehzual a, thenkhatin chhungkaw picnic na hmun atan an hmang a, a thenin a huhova inkawm hlimna atan an hmang ve bawk a, he park hi a fur a thal a thlasik a nipuiin a awl lo a ni ber e.

Sapram nuam ka tih leh ka awh thin em em pakhat chu khawipui hmun lailiah park zau nuam tak tak leh naupangte infiamna hmun (play area) hmuh tur a awm zel hi a ni. An enkawl uluk thin bawk a, ram awl zau nuam tak tak leh infiamna hmun an siam thin hian a chhunga chengte nun hlimna tam tak a pe a, thing hring leh pangpar mawi tak tak a hun a mil zela khawchhung hmun lun lai taka an partir thinte hian rilru a va tihlim thin tak em! Heng zawng zawng han hmuh chang hian rilru hahna a tidam sawng sawng a, rilru ipik takte pawhin Park ah kalin an rilru hahna an va tireh thin a ni. A chang chuan sapram park nuam leh mawi tak takte hi phurh hawn a, mahni pian leh murna ngeiah hun a chakawm thin.

Naupangte infiamna tur play area lo awm zelte hi a remchang ka ti a, man chawi ngai miah lova nau awmna tha tak a ni. Hengte hi neih ve chi tak niin ka hria.

Khawi lo khualzin ve changa ramngaw zau tak tak leh thing hring ngir phei khup mai han hmuh chang hian hawina lam apiang mai hi a nuam a, rual awh erawh a tina thin hlein ka hria. Kan chenna leh a chhehvelah thing hring hmuh tur awm lo lutuk hian kan hrisel tur angin kan hrisel loh phahin ka hre bawk. Chuvangin thing phun te hi uar ila, ramngaw te hi siamin humhalh tha ila, kan chhehvel hi sapram angin ram nuam takah kan siam thei dawn a ni.

The Long Walk leh Deer Park ah hian thirsakawr khalh zu phal hauh lo va! Windsor Castle atanga Georgius Rex lim awmna thleng hi mel 3 lai a nih avangin kawng laihawl velah motor kawngin a kaltlang a, motor kal lun lai tak nan fuh chuan minutes 3-5 dawn lai traffic nghah a ngai thin a ni.

Tlai dar 4:38 ah chiah Windsor Castle lam panin ka let leh a. Kawng lakah thlate laa ka chawlh leh thin avangin Windsor Castle ka thlen meuh chuan tlai lam dar 5:20 a lo pel fel der a, tichuan kaw ruak lutuk hnawh khah tumin McDonald's ah ka chawl lut a, Chicken Mayo burger leh fries leh hot chocolate a ka inhnawhpuar hnuin ka phone battery charge nghah phahin Bible ka chhiar a, phek thum li lai chu ka chhiar hman. Zan dar 6:55 ah Slough lam panin kein ka hawng a, dar 7:25 ah Slough ka lut.