Zo Vapual

Engkima min hrechiangtu LALPA

(Sam 139:1-11; Matthaia 10:30; 28:20; Isaia 43:1)

C. Lalmuankima 

Slough, United Kingdom 

Keimah leh keimah ka inhriatchian aiin ka rin Pathian khian min lo hrechiang em em a, ka ngaihtuahna chhungril ber thleng pawhin min lo hriatsak a, a lak atang hian thil zep ruk theih pawh a ni lo, min lo hrechiang em atin a ni.

Photo : Google image

Mihring taksa ruangam pianhmang leh a kaihhnawih zirmi Daktawrte chuan kan taksa bung hrang hrang invuah dan leh kawchhung lam thlenga hai let vek thei khawpin khawl finna hmangin kan taksa chhunga thisen zungzam kal dan thlengin min luhchhuahin min hrethei a ni mahna, kan rilru chhungril ber thlenga rawn lut thei erawh an awm hauh lo. Kan rilru ngaihtuahna chhungril ber thlenga rawn lut thei chu Pathian chauh a ni. Keinin kan taksa peng pawh kan hriat kim theih loh laiin Ani chuan kan sam zai lam pawha min lo chhiarsak vek thu min hrilh a (Matt 10:28), hei tluka inhriatchianna hi a awm thei chuang lo vang.

Sam ziaktu Lal Davida pawh hian LALPAN a hriatchianzia a sawinaah pawh amaha a hriat fai vek loh a leiah thu reng reng a awm loh thu a auchhuahpui hial a, LALPAN a hriatnaah a tawpsan loh thu sawiin a thut leh a din, a kal leh a mu, a awm dan zawng zawng a hriat vek thu leh a rilru ngaihtuahna lam pawh hla tak atanga a hriat thu a sawi a (Sam 139:1-11). Pathianin a hriatchianzia leh amahah a hmuh fai vek thu a auchhuahpui a......

Pathianin min hriatchianna hi kan tan chuan a tawk a ni. LALPA hriatchianna tel lo chuan kan inkarah inlaichinna tha a awm thei lo va, Pathianin min hriatchianna atang chiah hian LALPA nena kan inkar inlaichinna tihnghehin a awm thin a ni. Pathianin min hriatchianna hian amah nen kan inkarah inpawh leh tlangnel taka awmna min siamsak a, chu chuan inlaichinna nghet min siamsak ta thin a ni. Entirnan: Thil tihhona ilo leh puipun nikhuaah hmelhriat pakhat mah an awmlohna hmunah tlangnel taka i hminga rawn koh chhuak nalh theitu chu i ngaina nghal zar mai a, i hming hre miah lote ai chuan i hminga rawn koh nalh theitu che chu i ngainain a bulah i tlangnel zual sauh va, in inlaichinna pawh a hnaih zual sawtin i hre ngei ang. Chuvangin Pathianin min hriatna hi amah ringtute tan chuan a tawk em em a, hei aia tha beisei leh chuan tur kan nei tawh chuang lo. A mi hriatna hi chatuan daih a ni a, a mi hriatnaa lungawi lova kaw dang hreuh phet tumna hi sual lian tak a ni thung. 

Heti khawpa min hrechiangtu lak atanga tlan bo kan tum phet thin hi min hrechiangtu tan chuan a rilru kan va tinâ zing dawn tak em...tih te ka ngaihtuah a. Pathianin min hriatchianna hi kan thlamuanpui em tih erawh zawhna lian tak awm thei a ni ve leh ta a ni. Pathianin min hriatchianna thlamuanpui zo lo tura min siamtu hi sual lak atanga chhuak a ni tih hi kan hriat reng a tha. Pathian min hriatchianna thlamuanpui zo lo khawp hian sualin min bumna lak atanga tal chhuak zo lo khawp hian kan awm palh ang tih hi a hlauhawm hle mai. 

A mi hriatna avang ringawt pawh hian rintlak Pathian a nihzia kan hmu thei a, belhtlak Pathian a nihzia leh thlamuanpuitlak Pathian a nihzia kan hmu thei bawk. Ram bial pakhat hmel hriat nih mah kan thlamuanpui hliah hliah a ni a, lei leh van siamtu hmel hriat han nih tluka thlamuanthlak hi a awm chuang awm lo ve....! 

Pathian min hriatna hi kan damchhung chauh pawh ni lo, kan thih hnua a hnen kan thlen thleng pawha min hruaitu leh min thlamuantu tur a la ni zel dawn a ni. Lalpan a hriatna che hi i thlamuanpui zo em tih hi nangmah leh nangmah inzawt thin ang che. Pathian hriatnaah i thla a muang zo lo a nih chuan nangmahah khan inenlet tur a awm tihna a ni ngei ang, chu chu sualin a bumna che a ni thei bawk a ni. 

Heti khawpa min hrechiangtu hian min hriatchiannaah a tawp mai lo va, kumkhuain khawvel tawp thleng pawha kan hnena awm zel min la tiam leh zel zel hian thla a timuang hliah hliah a ni. Sakhaw dang pathiante chuan khawvel tawp thleng pawha an hnena an awm zel tur an sawi awm pawh kan hre lo. Kan rin Pathian erawh chuan kumkhuain khawvel tawp thleng pawhin kan hnena awm zel a intiam (Matt. 28:20) hi Kristiante Pathian danglamna a ni. Hei tluka thu thlamuanthlak hi a awm tawh chuang lo. Sam ziaktu bawk hian a rin Pathiana chu a hrechiang a, thih hnu thleng pawha amah hruaitu tur a nih thu a sawi tel bawk a ni (Sam 48:14). A van thlamuanthlak tak em....!

"Aman engkimah min hria e,

Aman engkimah min hria e;

Hetiang em ema hriatchianna hi,

A sang em a, ka phak lo a ni."