Zo Vapual

Malsawmna chhiar dan

C. Lalmuankima

Slough, United Kingdom

'Malsawmna chhiar dan' ka han ti ve leh thawr a. Malsawmna chhiar dan thiam lo ber te zinga miin he thupui hi han chilh pawr ve leh ka tum a ni. A nih leh malsawmna chhiar dan hi a lo awm tak tak emaw ni le, inbumna mai a ni lo maw?  Chhiarkawp chawh anga chawh chhuah mai chi lah ni hek suh...! Heti hian i han sawi tan dawn teh ang.

Photo : Google Image

Malsawmna hi a chhiartu azira malsawmna ni thei emaw ni lo thei emaw a ni a, a chhiartuin a chhiar thiam dan azira hlua hlu lo thei a ni bawk. Kristian kan nih angin Bible - in min zirtirna thu hi kan dah lal ber zel ang a. Zawlnei Hagaia lehkhabuah chuan he ti hian kan hmu a. "Tam tak in ching a, tlem te in seng si; in ei a, in tlai si lo; in in a, in kham si lo; in sin a, in lum chuang si lo; inhlawhfa chuan ip pawpa thlak atan mai a hlawh a ni." (Hagaia 1 : 6 ) He Bible bung leh chang atang ringawt pawh hian kan sawi tum chu a lang sa ruah mai le. ........!

Malsawmna hi van tawng khawp pawhin dawngin chhek sen loh khawp pawhin nei mah ila, a chhiar dan kan thiam loh chuan min vel taptu leh kan mittui titla tamtu an ni thei tlat. A bik takin a malsawmna chhiar thiamlotute chungah a thleng dik hle.  A malsawmna chhiar dan kan thiam lohva Pathian hnenah kan kawltir loh phawt chuan ni khat emaw darkar tinah emaw cheng nuai tel pawh hai lut thei mah ila, kan hriat loh hlanin eiraltu fel takin min eiral leh hiau hiau thei a ni.

Malsawmna kan dawn te hi Pathianin min venhimsak em? Pathian hnenah min venhimsak turin kan dil ngai em? Eiraltu leh tiriraltu laka venhimsak turin kan dil ngai em?  Hei hi a pawimawh hle mai.

Pathian malsawmna kan dawn ang ang te hi amah Pathian biak leh chawimawi letna atan kan hman thiam a pawimawh a ni. Chuti ni lova amah theihnghilh phah nan emaw do let nan emaw kan hmang a nih phawt chuan nichina zawlnei Hagaia lehkhabua kan chhiar ang khan, tam tak ching siin tlem te kan seng ang a.....ip mawngpawpa thil kan thlak ang maiin a tla hiau hiau mai dawn a ni. A malsawmna kan dawn te hi amah Pathian hnenah min venhimsak fo tur leh a hmanna dik taka min hmantir tur tein kan dilin kan tawngtai thin reng em?  Kan la ti ngai lo a nih chuan tun atang khan han ti nghal teh le, a hlawkzia chu a takin i chhanna i hmu ang a, tun hmaa i hriat loh hlana eiraltu leh rawktu lakah khan venhimsakin i awm tawh dawn a ni.

"LALPAN in a sak loh chuan a satute chuan an thawk rim thlawn mai a ni. LALPAN Khawpui a vawn that loh chuan a vengtu chu a meng thlawn mai a ni." tiin Sam 127:1 ah kan hmu a. A malsawmna kan dawn ang ang te hi LALPA ah kan kawltira min venhimsak fo tura dil na chang kan hriat loh chuan hriat loh lamah kan paih thlawn mai mai thei a, kan thawk rim thlawn thei. Chuvangin a malsawmna kan dawn ang ang te hi amah Pathian hnenah kawltirin i venhimtir ang u.

"Malsawmna i dawnzia zelin Pathian hnenah pe la, chuti a nih loh chuan Pathianin i pek angzia zel chauhvin mal a sawm ang che." tiin Peter Marshall chuan a lo sawi a. A sawi tha ka ti hle mai...! He thu Thufingte 11:24 thu nen pawh hian a inthlun zawm viau mai a, "Semdarh chu pun lehzualna a ni a, mamawh tawka liam kawmpui chu tlakranna a ni." tih hi. Miin a pek tam poh leh a dawng let tam dawn tihna a ni.

Chhunzawm leh atan....