C. Lalmuankima
Slough, United Kingdom
Tum khat chu London Victoria Station-ah Slough lam pan tura rel ticket ka lak mek laiin Spanish tlangval pakhat hian min rawn pan chawt mai a, tah aw deuh tuau hian ka hnenah tanpui min rawn dil a. A harsatna ka zawhin a wallet a tihbo thu leh a nau hmeichhia Ilford a awm hnen thlen a duh thu min hrilh a. A nau hnen thleng turin a pawisa bawm ber a tihbo avangin harsatna a tawh thu min hrilh a ni. A tirah chuan ngawih liampuia hnar mai ka tum a, tichuan ka bulah min dinchilh reng bawk si a, a tawpah chuan 'Tikhan lo nghak lawk rawh, ticket hi ka han lei hmasa phawt ang e....' tiin ka hrilh a, min nghak ve ta ran a, tichuan Ilford lam kal tur train ticket chu ka leisak ta a.
 |
| Photo: Google Image |
A lawm lutuk kha min chibai lawp lawp a, 'I zarah ka nau nen kan inhmu thei dawn a, ka lawm tak zet a ni. Ka phone no hi la ta che, tichuan ka nau hnen ka thlen velah i pawisa hi ka pe leh ang che...' a ti chung mai a, mahse kei chuan, 'Ekhai... Ni lo ve a, i nau nen hlim takin in inhmu dawn nia, Pathianin malsawm che rawh se.' tiin ka thlah liam ta a. In lam pana ka hawn mek laiin kha tlangval hmel kha ka mitthlaah a lo lang a, a lawmzia ka hmuh khan ka rilru chhungril takin ka hlim a ni. Kha tlangval tana ka tihsak ve theih thil te tak te avang maha hetianga ka rilrua hlimna ka chang a nih chuan midangte tana thil tha tithinte hian hlimna nasa tak an lo chang thin dawn a nih hi....tih hi min ngaihtuah chhunzawmtir a, ka lawm tak zet a ni.
Ka sawi tum tak zawk chu heti zawng hian a ni: Kan tanpui theih loh tur hi chu Lalpan kan hmaah a rawn tir dawn lo. Chuvangin i hmaa tanpui ngai Lalpan a rawn tirh kha beidawngin chhuahtir suh. Mite harsatna tanpui hi anmahni an lawmah a tawp mai lo va, a tanpuitu ngei pawhin chhungril takin lawmna an chang thin a ni. Kan tanpui theih dan number tlem leh tam hi a ni ber kher lo va, a petu thinlung zawk hi a pawimawh fo thin a nia! An mamawh tlem azawng kan va phuhhrukzak ve thei hrim hrim khan anmahni a tilawm mai ni lovin keimahniah lawmna min siamsak tel a, chu chu a hlawkna a tih theih ang.
Kan hmaah hian kan tanpui theih loh tur khawp chu Pathian hian a rawn tir hauh lo vang tih hi ka ring tlat a. Chawplehchiha kan tanpui thei kher lo a nih pawhin tawngkam tha tak nen thlahin 'Lalpan awmpuiin tanpui che rawh se...' tih tala thlah hi a tha a ni.
Kan chhehvela tanpui ngai zawng zawng tanpui vek turin Lalpan a rawn tir hauh lo vang. Kawng sira kutdawh nazawng pawh hi i tanpui vek sen a ni bawk lo vang. Amahaherawhchu kan tanpui ve theih tur Pathianin kan hnena a rawn tirh chhun erawh hi chu Lalpa chakna rinchhana kan puih hian midangte tan malsawmna kan lo ni zel dawn a lo ni reng mai! Pathianin a rawn tirh hi keini lo dan thiang a ni lo va, Bible-in a sawi angin hriat loh hlanin vantirhkoh hi englai pawhin kan lo thleng thei a ni tih hi kan hriat reng atan a tha hle mai.
Malsawmna dawn belh duh viau siin a luanchhuahna insiamsak nachang kan hriat loh chuan kan malsawm dawnte hi keimahni tan ngei pawh anchhia a ni thei a ni. I malsawmna dawn zozai kha mi pahnih khat hnenah tal share nachang i hre lo a nih chuan malsawmna dang lo luang lut leh tur i inkhar hnan thei a ni tih hi hria ang che. Midangte tan malsawmna nih duh viau si a, mahni lamah uikawm rilru kan put reng chuan kan nih tum hi engtik lai mahin kan ni thei ngai lo bawk ang.
Chuvangin kan hmaa tanpui ngai Lalpan a rawn tirh hi chu tanpui lovin i chhuah suh ang u tih hi kan inchah nawn awn awn duh a ni. Kan sawi tawh angin Pathian hian i tih theih loh tur chu a phut lo vang che. Nangmah pawhin i tih theih a, i zawm theih ngei tur zel hi Lalpan i hmaah a rawn hruai thin ang.
Midangte tan malsawmna luankawr nih i duh a nih chuan nangmah ngei khan i malsawm luankawr tur kha hai hawngin midangte tan luanchhuahna tur insiamsak thin ang che. Tui luang chhuak reng chu a rimchhe ngai lo angin nangpawh luang chhuak reng nun i neih chuan i nun a lo duhawmin a lo rimtui ang a, i nunah miten Isua hmel an lo hmu bawk ang a, i bula awm an thlahlel fo tawh mai ang.
No comments:
Post a Comment