Zo Vapual

Ka mi ngaihsan zawng Part I

C.Lalmuankima

Newcastle, United Kingdom

Thuhmahruai

Khawvelah hian mi ropui tak tak te, mi neinung leh hausa tak tak te, mi thiltithei tak tak leh ngaihsanawm tak tak te, mi ropui, tlawmngai leh entawntlak tak tak te an awm a, amaherawhchu mi mal tin ten kan mi ngaihsan zawng te chu a in ang vek kher lo mai thei. Kristian kan nih angin Biblical view atanga thlirin kan nitin nuna kan entawn fo tura ka duh leh ka mi ngaihsan zawngte chu a hnuaiah hian ka han tarlang teh ang. An nun hi a awhawm mai ni lovin an ngaihsanawm a, an entawntlak hle bawk. Anmahni nun atang hian ringtuten zir tur tam tak kan nei a ni.

Abrahama

Abrahama angina Pathian i ring ngam ang u (Genesis 12:1,7) Abrahaman Pathian kohna a chhan khan, “LALPA, chumi chu ka va ti phawt ang e, khami kha ka va ti phawt ang e, ka unaute ka va hrilh ve phawt ang e,” a ti reng reng lo. Amah kohtu Pathianah a chiang a, a kalna tur lam pawh hre hawt lovin Pathian a ring tawp a; a zui nghal tawp a ni. A rin Pathian ngei chuan a tithlawn dawn lo tih a hrechiang hle a, chu a rinna chu ama felnaa ruatin a lo awm ta a ni. Keini hi engnge kan an ve le…? Min kohtu Pathian khi kan hrechiang em? Hrechiang hlei lo hian miten an zui/biak avangin kan lo zui/be ve mai a ni ang e. Sakhaw rawng hi kan bawl ang a, min kohtu Pathian rawng bawl lo hian kan awm pal hang tih a hlauhawm hle a ni. Pathian rawng bawl lo hian sakhaw rawng hi thui tak a bawl ve theih a nia.

Photo: Google Image

Min kohtu hrechiang hlei lovin kan lo zui ve ringawt te a nih chuan keimahni hi a buai tur kan ni a, in enfiah hmasak a ngai tihna a ni. ‘Rinna chu thil beiseite awm ngeia hriatna, thil hmuh lohte hriatfiahna a ni’ tiin Hebrai 11:1 ah kan hmu a. Miin a rin Pathian ber mai a hriatchian loh chuan a thinlung zawng zawng leh a rilru zawng zawng leh a thlarau zawng zawngin engtinnge a rin theih the lul ang? Pathian rinawmnain kan nun hi min thlenchilh hmasak a ngai a, chumiah chuan Lalpa rinawmnain min thlen chilh hnuah chuan Rinna nung min petu Lalpa, thil beiseite awm ngeia hriatna leh thil hmuh lohte hriatfiahna kan lo chang ta thin a ni.

Rinnaa Pa ber Abrahama chanchinah khan i han let leh teh ang. Pathian thuin, “Abrahama chuan Pathian a ring a, chu rinna chu a felnaa ruat a ni” tiin min hrilh a. Rinna chungchang sawi dawn hian a hming lam hmasak ber a ni thin a, “Rinnaa Pa” tih a ni bawk. Moria ram tlanga a fapa Isaaka hlan tura Pathianin a tih khan, i he lovin a kal a; a fapa Isaaka chu hruaiin Moria ram tlangah chuan a fapa neihchhun Isaaka chu halral thilhlana hlan turin a kal ta a ni. Mihring lam taka ngaihtuah chuan Abrahama khan hrehawm chu a ti ve ngawt ang. A nupui Sari nena an tar lam fa, thutiam fa neih chhun ngei mai chu halral thilhlan atana hlan turin a ti mauh mai le. Pathian pawh hi ti awm ang lo i ti ve lo maw? A ran rual zinga mi a thau tha tha leh a huanthlai zinga mi a rah tha tha hlan turin ti se la chuan ngaihdan a la siam theih a, chuti ni lova a fapa neih chhun hliah hliah, a thih hnua a ro luahtu tur leh a nupui hmangaih tak Sari nena an ril arah neih chhun ngei mai hlan tura a han ti ringawt mai chu mihring lam tak chuan a har ve ngawt ang le. Mahse Abrahama chuan a rin Pathian chu a hrechiang tlat a, awmlo ata dinchhuaktu leh petu ngei chuan ha Isaaka pawh hi lak sak leh mah se la, a dang pawh a pe leh thei a ni tih hi a hrechiang tlat a; Pathianin ti tura a tih chu phunnawi hauh lovin a ti ta a ni. Chumiah chiah chuan Abrahaman Pathian a rinzia a tilang a, a rin Pathian ngei chuan a felnaah a ruatsak ta a; Rinna Pa tia koh a lo ni ta a ni.

Kan rin Pathian hriatchiannaah hian a ni huaisen taka rinnaa ke pen ngamna a lo awm ni. Kan rin Pathian rinawmzia kan hmuh thiam hma leh kan hriatchian hma chuan kan zam thin a, rinnaa ke pen chu sawi loh, a awmsa hmanga/ringa ke kan pen pawhin kan thla a phang ru tlat thin. Nang leh keia thinlung mizia hi chu a zam thin a, chu nun zam reng thin thinlung kan nei a ni tih a hriat avangin chatuana zam ve tawh ngai lo tur a fapa Isua Krista nun ngei chu min lo pe ta zawk a, chu ngei chu kan nun atan min lo thlansak ta zawk a ni. Lalpa hming fakin awm rawh se.

Rinna kan tih reng reng chu kan va rinate rinawm vang a ni. Kan va rinate rinawmna hian keimahniah rinna nung min siamsak a, kan nun a hahchawl a, chu rinna nung (Isua nun) chuan huaisenna min pe a, huaisen takin rinna kawngah ke min pentir ta thin a lo ni. Ringtu hi a fel ngai lo va, a rina zawk kha a fel a, chu chuan a thawhsak zawk thin.

Min tanpuitu tur leh kan lama tang chu LALPA a ni tih kan hriatchian hma chuan kan nun hi a zam thin a, a changin kan ringhlel leh rum rum thin. Zawlnei Elisa chhiahhlawh Gehezia pawh kha a mit tihvarsak a nih hma kha chuan a zam a, a pu hnenah a va tlan a, Suria sipaiten Dothan khua an lo hual khat tlat mai a hmuh khan a zam em em a nih kha. Chutah zawlnei Elisa chuan a mit a lo var theihnan a tawngtaisak a, a mit chu tihvarin a lo awm ta a, Dothan khua hualtu Suria sipate awmna hnung lama tlangah chuan LALPA sipai/vantirhkoh rualin an lo hual thup mai a hmu a, tichuan a thla a lo muang ve ta a nih kha. Chutiang chiah chuan nang leh kei pawh hi e, min tanpuitu tur kan hriatchian hma chuan kan nun hi a zam chhe hle thin a, kan mangangin kan buai ruai thin a ni. Mahse, kan vela min thlamuantu tur Lalpa vantirhkohte kan hmuh thiam niah chuan kan nun hi a zam chhe ngai tawh lo va, zam chhiat a hnekin LALPA tan huaisen takin ke kan lo pen ta thin a ni.

Photo: Google Image

Abrahama, ‘Rinnaa Pa’ kan entawn fo atana ka duh chu: Pathian a rinna hi a ni. Amah kohtu Pathian khi a ring tawp a, awmlo ata siamtu Pathian chu a ring a, a rina ngei chuan a tithlawn dawnlo a ni tih ah a chiang a; a ram, a laichin leh a pa chhungte chhuahsanin LALPAN ram thar a pek tur Kanan ram lam chu rinnain a pan tawp mai a nih kha. LALPA thu a nih phawt chuan zawh let kher a ngai lo. A hnung zuia ke pen tawp zel mai tur a ni. Chumiah chuan LALPAN kan tana thil tha tur Kanan ramah hian min lo buatsaih ta thin a ni. Rinna Pa Abrahama hi a va ngaihsanawm take m….! Kei chuan ka mi ngaihsan ber ber te zingah a tel tlat a ni.

Chhunzawm leh atan....