Zo Vapual

Inrintawkna nei thin rawh

C. Lalmuankima

Newcastle, United Kingdom

Mahnia inrintawkna kan neih loh hian kan thiltih a bahlah thin a, hlawhtlin a har hle bawk. Mahni tawka inrintawkna neih loh hi kawng engkimah kan hnufual a, kan che zia a khawr a, mahni leh mahni kan inrin zawhlohnain a ken tel mahni leh mahni lak tlak lo leh tlaktlai lovah min chhuah ta thin a ni.

Inrintawkna nei tur hian thil tih tur pawimawh tak tak sawi tur a awm thei ngei ang. Chu lam chu kan sawi tum a ni lo va, mahni inrintawkna nei tura kan inzirtir dan lam hi kan sawi tum tak zawk chu a ni.

Photo: Google Image

Zofate hi mahnia inrintawkna kan tlachham hle a, chutianga inrintawkna inzirtirna phei chu kan tlachham lehzual a ni. Chutiang lamah chuan inzirtirna leh infuihna tha kan neih loh avangin mahnia inrintawkna kan tlachham lo thei lo va, mahnia inrintawkna kan tlak chham na na na chuan thiltih kan zuam loh phah nge nge thin. Thiltih kan zuam loh chuan hnathawhna leh kawng engkimah kan khawrin rual kan pawl lo nghal a, a tawpah inkiltawihna min siam a, mi hlawhchhamah kan chhuak ta thin a ni. Mahni leh mahni inrintawkna neih lohvin a hrin chhuah chu mahni leh mahni tlaktlai lova inngaihna a hring nghal a, a tawpah hlawhchham bik tura inngaihna tha lo takah min hnuk lut thin.

Fate inrintawkna neihtir leh inzirtir kawngah hian hnam pui zawkte hi entawn an tlak hlein ka hre thin. Hnam pui zawka kan ngaihte hian an fate an inzirtirin an infuihin an inhrem nasa ve hle tho va, an inzirtir leh infuih/inhrem dan erawh a dang thung. Keini chuan kan faten thil an tihsual hlekin inzirtirna leh infuihna tha pe hmasa si lo va, kan hmuh hmuhin kan vua a, kan beng/chum/kik leh pawp/awk/lawlh zel a, kha kha fate thil tihsual chhanlet dan tha ber emaw kan ti thin. Fate hi an kum phu lo zeta hrem kan ching thin bawk.

Hnam puite hian an fate an zilhin an hrem bik lo a ni reng reng lo. An thil tihsualin a nghawng chhiat theih dan leh midangte tan harsatna a thlen theih thu thlengin an hrilhfiah zawk a, chumai bakah zirtirna leh fuihna an pe nghal a, chu chuan anmahniah rah tha a chhuah thin a ni. Fa fel leh tha neih chu mi zawng zawngin kan duh vek a, chutianga nei thei tur chuan zirtirna leh fuihna lamah kan pawih leh tlat thin a, a tawpah kan duh loh zawk fa sual leh thuawih lo kan lo nei leh ta thin a ni. Kan fate hi vuak leh velha tha thei ni se la chuan kan in vaw fing vek tawh ang. Mahse vuak leh velh aia pawimawh zawk thu tha hla tha hrilh erawh kan hlamchhiah thin a, hei hi a pawi hle.

Bible bung leh chang Thufingte 23:13-14 thu chu la vawngin 'Kan fate chu kan vuain kan hrem tur alawm....' kan ti a. A dik nalai a awm ngei ang. A pawimawh ber zawk fate fuih leh zirtir kawngah erawh kan fail leh hlauh si a. A hma lama inziak Thufingte 22:6 thu erawh chhiar kan fo kan ching thin thung. Inzirtirna leh infuihna tha kan inpek loh chuan vuak leh velh ngawtin an nun kan siamtha dawn chuang lo tihna a ni. Fate intawkna neihtir kawngah hian zirtirna leh fuihna pek kan tlachham hlein ka hria. Inzirtirna leh fuihna tha pe chuang si lova invuak leh invelh ringawt hi chuan an thlarau nun sawi loh an hringnun kawng sual zawh tur pawh kan chhanchhuak thei ngai lo vang. Chuvangin kan faten anmahni tawka mahni leh mahni inrintawkna an neih theih nan inzirtirna leh fuihna tha kan pe zo tur a ni.

Kan faten thil an han ti ve a, 'I tithei leh chuang lo vang...' 'I hlawhtling leh chuang lo vang...' 'I tan a harsa em mai, i hlawhtling leh chuang lo vang...' adt. tiin a thim zawng hlirin kan thlirsak a, khang a thim zawnga thlirna tawngkam tha lote khan anmahnia inrintawkna kan um bosak mek zel a ni tih hi kan ngaihtuah ngai reng reng thin lo. Han fuih phur zual sauh tak aruanga a nih theih loh dan ringawt an benga thun luh kan chin chuan a tawpah an hlawhchham nge nge thin.

Mahni leh mahni inrintawkna kan neih loh phawt chuan kan thiltihna kawng engkimah kan hlawhtling thei lo vang.

Thubelh:

"Naupang thunun tim suh, 

Tiangin vaw mah la, a thi dawn si lo va.

Tiangin i vua ang a,

 Tichuan Seol ata a nunna i chhanchhuak ang."

(Thufingte 23:13-14)

"Naupang chu a kalna awm kawngah zirtir ula, 

A upat hnu pawhin a thlah lo vang.'' 

(Thufingte 22:6)