Zo Vapual

Nun thiltithei - Tho leh Krista Nun [2018 Easter Sunday Pual]

(Rom 14:9; Joh 3:16-17; 11:25; Mk 16:5-6; Mt 28:5-7)

C.Lalmuankima

Newcastle, United Kingdom

"Isua Krista hi Pathian a nih a, ka tan a thi tak zet a nih si chuan a hnena inpumpek hi ka tan a ropui lutuk thei lo."

C.T. Studd

Kristiante hi sakhaw dang laka kan danglamna leh ropuina chu kan rin Pathian hi mitthi zing ata tho leh Pathian a nih vang a ni. Sakhaw dangten an biak pathiante chu vawiin thlengin an tho leh tih kan hre ngai lo. Keini rin Pathian erawh chu thihna hnehin thlan thim hnehin a tho leh a, a tho leh mai ni lovin chu a thawhlehna nun tawmpuituah min lo thlang ta zawk hi a ropui tawp thei lo a ni. 'Chu Krista thihna leh a lo nun lehna chhan chu, mi nung leh mitthi Lalpa a nih theihna hi a ni....' tiin Rom lehkha thawnah kan hmu a (Rom 14:9), chu nun thiltithei chu changtute kan ni hi a ropui tawp thei lo a ni.

Photo Google Image

Hmelma Setanan a hlauh ber mai chu a tho leh Krista nun hi a ni. Lal Isua a hring chan laia a taksa erawh kha chu a hlau lo nasa mai a, a changin a thlem a (Mt 4:1-11), a changin thiam thu ngei pawh sawi thei lova siamin puithiam lalte leh mipui hmangin sawichhiatna chi hrang hranga sawichhiain a velin a hnek a (Mt 26:67), a tawpah kraws lerah hial a khengbet a (Joh 19:18). Mihring a nihna a taksa thi thei chin zawng kha chu a duh tawkin a sawisa thei a, kraws lerah hial pawh khengbetin thlan thuk thim takah a phum a, ti fuh a inti hle a ni. Mahse nun thiltithei tho leh Krista nun zawk chuan thlan thuk thim ber leh thihna atangin a kai tho va, hmelma Setanan a dan beh zawh rual lohvin thihna te, thlan thim te, hremhmun te hnehin a tho leh ta a, chu nun thiltithei tak mai chu nang leh keia chan atan min lo hlan ta zawk a ni.

Kan nun chan ropuizia hi kan ngaihtuah ngai em? Hmelma Setanan a hlauh ber mai a tho leh Krista nun thiltithei changtute kan ni hi a ropui tak zet a ni. Chu tho leh Krista nun ngei mai chu ramhuaiten an hlauh ber a ni bawk. Amah ngei pawhin, 'Kei hi thawhlehna leh nunna chu ka ni; tupawh mi ring chu thi mah sela a nung reng ang....' tiin a lo sawi a (Joh 11:25).

Chu nun thiltithei tak mai chu miin a chan tawh chuan a tana inpekna thuk lutuk a awm thei tawh lo va, an nun pumpui Lalpa tan an hlan tawp chung pawhin a tana inpe thuk lutukah an ngai ngai lo. Vawiina Lalpa tana kan thil tih ve chhun chhun te hi kan aia a inpekna ngaihtuah chuan sawi tham a tling lo va, a thil min tihsak ropuizia ngaihtuahin Lalpa tan inpek thuk lutuk a awm thei ngai lo vang. Kan tih chhun chhun erawh a thlawn lo va, Lalpan min chhinchhiahsak a, nakinah a hnen kan thlen hunah a pung tam tak nen min la pe leh dawn a ni. Chuvangin Lalpan nun thiltithei min pek Chanchin Tha hi thahnemngai takin i hril zel ang u, lei leh vana thuneihna zawng zawng pawh a hnenah pek a ni tawh a (Mt 28:18), hnam tina mi zirtirah siamin Chanchin Tha hi uar takin i hril zel ang u. Chu chu Pathianin a Fapa khawvela a tirh chhan pawh a ni a, khawvel hi amah avanga an lo dam theihna turin a tir zawk a ni (Joh 3:17).

Kan Lalpa kraws lera bar phara engmah tithei lova a awmna hmun kha nang leh kei atan chuan engkim kan tih theihna leh nun kan neih theihna hmun pawimawh tak a ni si a. Lal Isua kha a Pathiannaah pawh zaah za a ni a, kraws ler atang khan rawn chhukin thilmak tiin a intidam thei asin, mahse a intidam duh tlat lo. A chhan chu, kraws ler atang khan thilmak tiin rawn chhukin rawn intidam ta se la, Pathian thil tum a tihlawhtling lo vang a, chu mai ni lovin Pa Pathian thinlungah kan damlo kumkhua reng tawh ang. Chu chu a hriat avangin nang leh kei hi Pa Pathian thinlunga kan dam leh theih nan a mihring mihrinnaah chuan thih hreh tak chungin thihna chu a tuar chhuak ta a, Pa Pathian thinlung hliam chu a han thawi dam a, lei leh van mite inrem lehna lawmna Jubilee dar min vuaksakin Pa Pathian thinlungah damna kan lo chang leh ta a ni.

Nun thiltithei - tho leh Krista nun changtute kan nih angin mahni duh dan leh tha tih dan mai maia nung thiang kan ni tawh lo. Mana lei kan ni tawh a, Krista thisen hlu taka tlan kan ni. Chuvangin kan taksaah hian Pathian chawimawi zel tur kan ni a (1 Kor 6:20), mahni tana nung thei kan ni tawh lova kan thih aia thi atana nung tur kan ni (2 Kor 5:15). Chu nun thiltithei tak changtute kan nih avangin Lal Isua lo kal chhan tihlawhtling zelin he leia a lalram din zel hi kan hna pawimawh ber a ni.

Tin, Isuan a hnenah, "Kei hi thawhlehna leh nunna chu ka ni; tupawh mi ring chu thi mah sela a nung reng ang; nung apiangin mi ring chu kumkhuain an thi lo vang; chu thu chu i ring em?" a ti a. (Johana 11:25, 26)