Zo Vapual

Sam 23:1,2 atanga ringtu nun zirna

C. Lalmuankima

London

Lalpa chu mi vengtu a ni a, ka tlachham lo vang. Ani chuan hlobet hring dup hmunahte mi bawhtir thin a, chawlhna tuikamahte mi hruai thin. (Sam 23:1-2) 

Photo : Google Image

He Bible chang tawi te hian Pathian thlamuanna thuchah a van pai hnemin a van pai ropui tak em....! He Bible chang tawi te hi ka naupan laia (Upa dan takin kan naupan lai chuan i han ti ve khanglang i la....) ka Bible chang by-heart (memorized) hmasak ber te zinga mi a ni a. 'Naupangte u, Lalpaah chuan in nu leh in pate thu zawm rawh u..... Ephesi 4:1) tih loh vekah chuan ka by-heart hmasak pawl a ni.

Naupan lai chuan a chhan leh vang pawh hrethiam chuang lovin nu leh paten a tha an tih avangin kan zir a, kan chham liam satliah mai mai a; kan ngaihtuah zui lem chuang hlei lo va; thu tha hla tha a pai tam hle a ni tih lam chu a lang lo hle a ni. Pathian thu, chanchin tha hmanga ka thlarau mit tihmen a lo nih ve hnua ka ngaihtuah let hian...." Aw...... he Sam ziaktu Lal Davida hian Pathian khi a lo van hrechiang teh lul em....!" tih te min ngaihtuah chhuahtir a,... Lalpa, Amah vengtu Lalpa khi a hriatchian em avangin,' Ka tlachham lo vang.....' a ti tawl mai a ni!

Awle, vawiin niah hian, " Tu nge kan vengtu ni ve le...?" "Tunge nang leh keia vengtu hi ni ve le?" "Tunge nangmah vengtu ni ve le....?" Kan vengtu/ min vengtu hi kan hriatchian a pawimawh hlein ka hria....! Mi tam tak chu kan sum leh pai te hi "Kan vengtu/min vengtu rinawm ber emaw kan ti thin a, innghahna rinawm ber emaw tiin innghahna atan kan hmang a, min siamtu Pathian theihnghilh phah nan kan hmang thin. Heng kan sum leh pai te hian kan mittui hi min la tihtlaksak thei a ni tih hi kan ngaihtuah pha lo reng reng a, hei hi a pawi hle a ni. 

Sum leh pai ngah hi amahin a sual a ni kan ti a ni ringawt lo. Sum leh pai petu Pathian theihnghilh phah nana kan hmang thin hi sual lian tak zawk chu a ni. Min petu Pathian tana kan hman thiam phawt chuan amah chawimawi nan leh a hming tihropui nan leh a lalram zauh nan nasa takin a hman theih thung....! Thil reng reng chu a hmanna tur dik taka kan hman phawt chuan a sual ngai lo hrim hrim. Chutiang chiah chuan kan sum leh pai neih te hi a hmanna tur dik taka kan hman phawt chuan Lalpa khi kan hriatloh hlanin kan lo chawimawi reng a ni tih hi i hre nawn leh ang u. Tu pa mahin mahni fate malsawmna dawn loh chu an duh ka ring lo. Kan hmangaih tak, kan fate hian malsawmna dawng thur thurin thang uak uak se la.... tih hi kan duh dan theuh a nih ka ring. 

Photo : Google Image

Thenkhat erawh chuan kan finna, hriatna leh thiamna te hi kan vengtu/min vengtu lungpui nghet emaw kan ti a, inphenna atan kan hmang a; kan tisual fo thin. Chung mite chu an van khawngaihthlak teh lul em...! Kan Pathian thu erawh chuan he ti hian min hrilh ve thung a;" Kraws thu chu boral mekte tan chuan atna a ni si a; keini chhandam mekte tan erawh chuan Pathian thiltihtheihna a ni zawk e. 'Mi fing finna chu ka tiboral ang a, remhre remhriatna chu ka paih thla ang..' tih ziak a ni si a....... 1 Kor 1:18-19) tiin.

A nih leh ringtute hi kan hausak, kan fin, kan thiam, kan remhriat a phal lo tihna em ni? ti i la..... Teuh lo mai...! A phal teh meuh mai...! Amaherawhchu heng zawng zawng hi kan pathiana, amah theihnghilh phahna atana kan hman a, amah ngaihnepna atana kan hman chiah hian sual lian tak a lo ni ta thin a ni.

Khai le.... kan tum loh lamah kan kal thui dawn ta tlat mai.... 

Min vengtu chu tunge a nih....? tih hi hriat a van pawimawh tak em....! Nangmah vengtu chu tunge a nih...? Tunge nangmah vengtu chu....? Tunah khan han inchhut ngun teh le.... nangmah vengtu chu Pathian a nih loh chuan Setana te hi a lo ni mial lo maw.....? tih te pawh ngaihtuah chian a ngai a nia aw..... nangmah vengtu i la hrechiang lo a nih phei chuan Lalpa hnenah inchhirin han tawngtai teh le..... tichuan nangmah vengtu rinawm ber a pe mai dawn che a ni. (Sam 91:11 thu kha i chhiar chuan ... i kawng tinrenga humhim tur chein i chung thu-ah zawng a vantirhkohte chu thu a pe dawn si a....' tih i hmu ang) Chuvangin nang leh keia min vengtu atan chuan Lalpa khi a lo tawk reng a, a lo tha ber bawk. Nang leh kei chuan kan phatsan chang a van tam thin tak em...! Ani erawh chuan englai mahin min phatsan ve dawn si lo va, nang leh keia vengtu atan Lalpa khi a lo tawk reng a ni tih hi i hre thar leh ang hmiang.....

Lalpa a thu malsawm rawh se....Amen....!