Isua chuanna sabengtung no kha....

Isua chuanna Sabengtung no kha…. (Mt 21:1-11, Mk. 11:1-11; Lk. 19:28-40; Joh 12:12-19)

Photo : Google Image

Kumin Tumkau (Pathian ni) ni pawh a lo thleng leh ta reng mai….. rilru mitthlaah Lal Isua leh a zirtirte leh mipui sang tam tak ten Jerusalem kawt dung velah an inzui lut dur dur lai a rawn lang nghal a. Chu mai bakah Rome sipai then khat leh sakhaw mifel Pharisai leh Sadukai ten el ran leh thik ranin an lo zui ve bawk a….? Tichuan Lal Isua chuanna tur sabengtung no leh mipui lo kal khawm ten an puan leh chhawl hnah (tumkau hnah) te kenga Lal Isua Jerusalem khawpuia ropui taka lut tur lawma au thawm “Hosanna! Lalpa hminga lo kal chu fakin awm rawh se, ram lo thleng tur, kan pa Davida ram chu chawimawiin awm rawh se, Chungnung berah khian Hosanna!” tih ri te chuan Jerusalem khawpui dung leh vang chu a khawk phei rum rum turah ngai ila……. Khai le, a thawnthu chu kan hriat sa vek a nih avangin sawi thui tawh lo mai i la,….

Kan thupuiah khan lut dawn tawh zawk i la a tha awm e….. Upa dan takin kan naupan lai, mi ningkhawng ka hriat ve theih atangin kum tin maiin Tumkau ni hi ka lo hmang ve tawh thin a, rilruah Isua leh a zirtirten Jerusalem-ah ropui taka an luh thu hi a rawn lang uar uar nghal a, chawlhnah te kenga kawt lai kan fan vel lai te pawh a rawn lang uar uar mai. Kumin erawh chu rilruah Isua chuanna Sabengtung no kha a rawn lang ve tlat mai a….

Lal Isua chuanna sabengtung no ka han tih deuh kherna chhan pawh, kan Bible ah hian sabengtung hian hmun pawimawhna lai a nei ve tlat a. Mithiamten an sawi danin sabengtung hi ransa zingah chuan mawl tak a ni an ti a. Chutianga ransa mawl tak chunga Lal Isua, vanlal fapa meuh a rawn chuang khan zirtir tum tam tak a nei ta a ni. Zakaria 9:9 ah chuan, “…. Inngaitlawm takin sabengtung no chungah a chuang a….” tih kan hmu a. Kha tih hun lai khan sabengtung aia tha, indona atan pawha an hman thin sakawr chuan tur a tam dawn teh lul nen…. Sabengtung no chungah kher a chuanna hian Vanlal fapa meuh pawh rilru inngaitlawm taka sabengtung no chungah rawn chuangin Jerusalem khawpuiah khan a lut a, mi tam tak te rin loh deuhvin an rilruah hna a thawk ta daih mai a ni. Lal Isua avang khan a chuanna sabengtung khan chawimawi a hlawh ve ta zel a, Jerusalem khawpui an luh thlengin chawimawi a hlawh a, a kalna turah pawh puan te, chhawl hnah (tumkau hnah) te phahsakin a awm a; Isua zarah ropui takin Jerusalem khawpui chu inhmeh lo deuhvin a lut ve ta a ni.

Nang leh kei pawh hi e…. kan pianphung reng atanga suala khat, bawhchhiatna avanga suala tluchhia, thatna reng neilote kan ni hlawm a. Chuti chung chung chuan Lal Isuan a chuanna atana min lo thlang ve tlat mai hi a van ropui tak em…! Sabengtung no khan Lal Isua zarah chawimawi a hlawh a, ropui takin Jerusalem khawpuiah a lut ang khan keini pawh hi Lal Isua avang chauhva mawi leh fel leh tha, Lal Isua avang chauhva chawimawi hlawh kan ni a, Isua zarah nakin van khawpui thlenga hruai chhohvin kan la awm dawn a ni.

Mi zawng zawng hi Lal Isua tello chuan tumah mi tling leh famkim kan awm lo va, mi zawng zawng hi Lal Isua avang erawh chuan mi fello leh mi tlinglo kan lo awm ta lo a ni. (Isua tello chuan tumah kan tling zo lo va, Isua avang erawh chuan mi tlinglo kan lo awm ta lo a ni.)