M.S.Dawnga (Seattle, USA)
Bible bu hmasa ber Genesis-ah chuan Pathianin mihring hmasa ber Adama a siam thu kan hmu a. Adama amah chauha awm chu kim lo a ti a,chuvang chuan a kawppui tur Evi a pe a.Tichuan Adama leh Evi chu nupa an lo ni ta a,chuta tang chuan chhungkua kan tih hi a lo intan a ni.
Genesis tih hi a awmzia chu 'bul,tobul,intanna'tih a ni a. (Bible thumal hrilhfiahna,p,203). Genesis chu Bible bu hmasa ber a ni a,lei leh van Pathianin a siam tan dan kan hmu a,mihring hmasa ber berte lo awm tan dante nen.Hetah hian a lang apauva Pathianin thil siam zinga kan hmuh ve si loh,mahse a ruka pawimawh tak ni si,lo inphum chu chhungkua hi a ni.
Eden chhungkua atang khan khawvelah chhungkua a lo ding ta zel a, Rev.Dr.Kenneth Chaffin-a phei chuan"Chhungkua hi khawvela pawl hlun ber leh tlo ber tur a ni a.Chhungkua a hlawhchham chuan khawvela pawl dang zawng zawng hi hlawhchham sa an ni.Hetiang anih avang hian chhungkaw tha dan hi khawvela hna pawimawh ber a ni"a ti hial a.(Nupa Leh Chhungkaw Hlim Nan,P,1).A ni tak a,hnam,kohhran,khawtlang leh mimal nun thlenga kan hlawhchham fona chhan hi chhungkua ber atanga kan hlawhchham vang a lo ni fo thin.
Siam thatna zawng zawng bultanna tur chu chhungkua a ni a,kan hriat loh hlanin chhungkaw nun hian hringnunah hian thuneihna sang tak a chang fo thin a ni.Mihring nun thatna leh that lohna hi chhungkua atanga lo inhreuh ru a ni fo va.Heti khawpa pawimawh anih avang hian Kristian chhungkaw tha chu awlsam taka neih mai theih a ni hauh lo. Zirlaiin a zirlaiah a hlawhtlin theihna tur chuan ni tin tha taka a inbuatsaih a ngai ang hian,Kristian chhungkaw tha din thei tur pawh hian nasa taka inbuatsaih a ngai a. Chhungril nun hrechiang si lova mahni duhzawng nazawng neih mai chin te, duh huna inriahbuk thing fawm chawt zel maite hian
chhungkaw tha din a har fo thin a ni.
Nulat tlangval lai hian inngaizawng satliah mai lova kristian chhungkaw tha kan din theihna turin inbuatsaih tur a ni a.Ngaihzawngte nen kristian chhungkaw tha din theih dan tur lam sawi dun fo te,mahni mizia a chhe ber thleng pawha inhrilh tawn a,Kristian chhungkaw lam hawi ziahna lehkhabute pawh a tam thei ang bera chhiar zau a pawimawh a ni. Inneih hnua bul tan tum chauhte aiin nulat tlangval lai atanga inbuatsaih nachang hriate hi Kristian chhungkaw tha dinna kawngah an hlawhtling zawk fo awm e.Chutianga lo inbuatsaih lawk nachang kan hriat ngat chuan chhungkaw keh chhia avanga kan ram leh hnamin kan chhiatpui thinna zawng zawng lak ata hi kan fihlim tawh ang a, chhungkua ber atanga kan hlawhtlin chuan khawvel hnam duhawm berte zinga mi kan ni tawh dawn a ni.
Eng chhungkua nge din tura i inbuatsaih le??
No comments:
Post a Comment