Zo Vapual

Tlawmna nun - Isua atanga chhuak ngei kha

C. Lalmuankima 

Slough, United Kingdom 

Khawvel sawrkar chak takte chuan ralthuam chak tak tak hmangin khawvelah ram an la a, an ram lakten an do let leh fo thin. Lal Isua erawh chuan tlawmna nunin ram a la a, a ram a zau tial tial thung. Tlawmna nun tel lova ram lak chu a tawpah a zuih ral thuai thin.

Mite chhungril ber thleng pawha hneha luhtlang thei vek awmchhun chu tlawmna nun hi a ni. Lalpaa tlawmna nun tel lo chuan mite chhungril ber thlengin hneh a har khawp mai. Chuvangin tlawmna nun hi ringtuten Lal Isua nun kan tawmpui theihna awlsam ber a ni a, chu nun atang chuan mi rilru khauh leh sehhel tak anga lang pawh hneh theih a ni. 

Photo: Zovapual

Lalpaa tlawm hliah hliahna nun atang hian miten keimahniah Isua hmel an hmu thin a, an chatuan nun daih tur ei tur tak an hmu thin a ni. Pathian thuin min tihtlawmna hmun zel hi midangte tana malsawmna kan nihna hmun atan Lalpan min lo buatsaihsak thin a, chumi atang lo chuan mihring hi kan tlawm mawh khawp a nia! Mihring lam tak pawha inchhuan leh tlawhchhan tur eng eng emaw ni nei vea kan la inhriat chhung hi chuan nun hi Lalpaah a tlawm mawh khawp a. Kan intunnunna tur leh kan inphenna tura kan ngaihte phehchimsaka kan awm chinah chiah hian 'Tlawm rawh, tlawm rawh...' tih ngai miah lovin Lalpa hmaah kan tlawm nghal a, mihring lama chechang thei lova kan awm chinah chiah hian Lalpa inpuanna thar a lo thleng nawn thin a ni. 

Pathian thuin min tihtlawmna hmunah zel hian a ni miten Lal Isua hmel keimahnia an hmuh thin ni. Lalpa Pathian thuin a tihtlawm phawt loh che chuan nangmahah khan chapo larh leh mahni mihringpuite hnuaia kun duh miah lo nun kha a awm si a, chu ngei chu tihtlawm hmasak a ngai phawt thin a ni. Pathian thuin chechang thei lova a siam phawt loh che chuan midangte tana eitlak khawpin rah tha i chhuah ngai lo vang. A chang chuan kan chhungril rimtuina leh mawina Krista hi midangten an hriat theih nan kan pawn lam taksa ngei pawh hi tihtlawm hmasak a ngaih chang a awm thin a ni. 

Kalvari krawsa Lal Isua chechang thei lova a awmna hmun ngei pawh kha Pa Pathian mithmuhah chuan hmelma Setana a rahbehna hmun, hmelma a tihthihtlinna hmun a ni tlat. Amah khengbettute tan chuan hnehna ropui tak changah an inngai mai thei, mahse amah khengbettute nun kha a khenbehsak ta zawk a, chechang thei lova awm khan amah khengbettute nun kha chechang thei lovin a siam ta hlauh zawk a, an nunah Lal Isuan hnehna ropui tak a chang thung. Chuvangin mite ngaiha chechang thei lova kraws thuin min khenbehna/phuarbehna hmun zel hi mite tan malsawmna luankawrah min chantirna hmun atan Lalpan min hmansak thin. Mahni dikna ngei pawh sawi thei lova min siamna hmun zel hi Isua nun kan tawmpuina a ni a, chu nun atang chuan miten Isua hmel an hmu thin a ni. 

Khawvel mite ngaihah chuan ban kan phar hian kan tlawm thu kan puangchhuak tihna a ni a, miin a hmelma laka a ban a phar tawh chuan hmelma laka tlawmsaa ngaih a ni thin. Pathian ngaihah erawh chuan chutiang chu a ni ve tlat lo, miin a hmelma laka tlawmna nun hmanga a ban a phar chhuah hian Lalpa Pathian ngaihin hnehna ropui tak a chang zawk thin a ni. Tlawmna nun hi Isua nun kan tawmpui theihna awlsam ber a nih avangin hmelma thinlung sak ber pawh tlawmna nuna hneh a ni thin. 

Lalpa avanga ban phar tam apiangte nunah hian Pathian khi inpuang lovin a awm ngai lo va, chawl lovin a hnenah a lut chhuak thin a ni. Lalpa hminga ban kan pharna hmunah zel hian a ni Lalpa Pathian inpuanna ropui kan chan thin ni. Chu chu a dawngsawngtute tan malsawmna a ni tel bawk. Ringtuin a hmelma tana a ban vawi khat pharna hnuaiah hian malsawmna engzat tak inphum ru ang maw? Kan mihringpuite hmaa kan ban vawi khat phar hlut zawng hi kan ngaihtuah ngai em le? Man to tak a ni asin! Khawvel suma lei theih a ni lo. A chhan chu tlawmna nun hmanga miin i ban vawi khat phar (Isua hminga i tlawmna nun hmanga i ban i phar khan) an hmuh khan Isua hmel an hmu tel nghal a, van lamin an lo hlawkpui thin asin! Chuti chu midangte hmaa tlawmna nun hmanga kan ban vawi khat phar avanga miten Chanchin Tha eng an lo hmuh theihna a nih dawn phawt chuan Lalpan kan ban hi min phartir zel rawh se. Lalpa avanga ban phar nun hi a lo hlawk hle a ni tih hi ka hre chhuak tial tial ve tan ta. A chang chuan mahni dikna zawna ban phar chu har ve tak chu a ni. Mahse Isua hmingin han tilui zel ila, Isua hmingin mahni lam hi han indah tlawm zel ila, a tawpah a hlawkzia kan hmu leh nge nge thin a ni. Kan thih hma hi chuan kan famkim dawn hauh lo, mahse famkim lohna khawvela kan awm chhung hian kan mihringpuite tana malsawmna kan ni ve thei a nih phawt chuan Lalpan kan ban hi tlawmna nunin min phartir fo rawh se.

Lalpa kaltlanga i vawi khat ban pharna khan nangmah leh i chhehvela mite tan boruak nuam tak i siam thei a ni tih hi hre reng thin ang che. Lal Isua nun i tawmpuina tlawmna nun ngei khan midangte hmaa inphahhniam hreh ngai suh ang che. Chu chuan nangmah leh i nun che vel thlirtute tan eitlak khawpin rah tha a chhuah zel dawn a ni. Midangte tana eitlak rah tha kan chhuah theih lohna chhan hi han ngaihtuah chiang ila, kan mihringpuite laka kan tlawm duh thin loh vang a ni duh khawp mai. Kan dinhmun aia sang deuhva kan hriatte hmaah chuan kan tlawm mai thei a, mahse kan dinhmun anga ding ve leh kan dinhmun aia hniam deuh hrette hmaah phei chuan kan tlawm mawh khawp thin. Chu tak mai chu midangte tana malsawmna kan nih theih lohna intanna a ni fo mai. Hawh u, kan mihringpuite hi keini aiin an dinhmun a sang a ni emaw kan dinhmun anga ding ve an ni emaw kan dinhmun aia hniam zawka ding an ni emaw a hun takah chuan an hmaah tlawm i hreh lo vang u. Thu hmasa lama kan sawi ang khan tlawmna nun hi Lal Isua nun kan tawmpui theihna a nih avangin midangte tan pawha malsawmna kan nih theihna pawimawh tak a ni tel a ni tih hi i hre reng ang u.