Zo Vapual

Tawngka chhuak khawngaihna chi-a al

C. Lalmuankima

Slough, United Kingdom

Lal Isua hmaa i sawi duh tur ngei mai kha i mihringpuite bulah pawh sawi thin la, an tan khawngaihna chi-a al a lo ni ang a, nangmah ngei pawhin malsawmna i dawn phah ngei bawk ang. Keini chu Lal Isua hmaa kan sawi duh loh tur thil tam tak hi kan mihringpuite bulah sawi kan ching thin a, an tan khawngaihna chi-a al a ni thei lo va, a tawpah phei chuan hmelmaah kan insiam phah fo thin reng a ni. 

Photo: Zo Vapual

Kan tawngka chhuak kan fimkhur tawk loh avanga a hretu leh ngaithlatuin a tawrh nat theihzia hi kan ngaihtuah ngai em? Kan tawngka chhuak hi khandaih hriam tak ai pawha hriam zawk a ni a, kan fimkhur loh phei chuan a dawngsawngtute at na khawpin kan siam thei a ni. A dawngsawngtute leh ngaithlatute chhiatna rup thlen thei khawp kan kawl theuh a ni tih hi kan hriat reng a pawimawh ang. Tur hlauhawm ber ai pawha hlauhawm zawk leh min tichhe vek thei thil hlauhawm tak keimahniah hian kan kawl reng a ni tih hi hriat a tha. Chuvangin i tawngkam vawi khat chhak chhuah tur kha ngaihtuah hmasa lovin i chhak chhuak liam puat palh ang tih hi a hlauhawm a. Ngaihtuah hmasa lova i chhak chhuah liam puat avanga a dawngsawngtute leh ngaithlatute tan rilru natna hial thlen thei a nih phei chuan i tawngka chhuakah anchhia i inlawh tihna a ni ang. 

Chutia kan tawngka chhuakin midangte tan anchhia a thlen thei tih kan hriat laiin kan tawngka chhuak vekin midangte tan damna a thlen thei tih hi kan ngaihtuah ngai em le? Kan tawngka chhuak pakhat avang hian miten damna an chan theih laiin kan tawngka chhuak pakhat avang vekin midangte tan natna thlentu kan ni ve thei bawk a ni tih hi kan hriat reng atan a tha. Chuti a nih loh chuan midangte tana khawngaihna chi-a al hi an nunah kan thlen thei ngai lo vang a, midangte tan malsawmna luankawrah kan tang thei ngai bawk lo vang.

Midangte tan malsawmna ni thei tur hian keimahni ngei pawh a malsawmna dawng tlaka nun ve a ngai asin! Chutiang zelin kan tawngka chhuakah midangte tan damna thlentu ni fo thei tur pawhin mahni ngei kan zir hmasak a ngai. Mahni ngei mai malsawm dawngtlaka insiam hmaa midangte tan malsawmna nih tum chu thil har tak a ni bawk. Chuvangin i tawngka chhuak leh i thiltihna kawng tinrengah midangte tan malsawmna ni turin nangmah ngei kha malsawmna luankawrah insiam hmasa thin ang che. Chuti chu engtin nge keimahni ngei malsawmna luankawrah kan insiam hmasak ang kan ti a ni mai thei. Hei hi thil ho te anga lang ni si, thil pawimawh tak ni lawi si a ni a, nangmah ngei malsawmna luankawr ni tur khan i tawngka chhuak leh thiltihna kawng engkimah i fimkur a pawimawh a, i tawngka chhuak turah khan khawngaihna chi-a al a nih leh nih loh ngaihtuah hmasain i mihringpuite hnenah thu sawi thin ang che. I tawngka chhuak tur kha vawi tam tak ngaihtuah nawn hmasa thin la, midangte tan ngaihthlak leh dawnsawn hrehawm a nih dawn ai chuan sawi loh law law kha a him ber fo vang. Tichuan nangmah ngei pawh malsawmna luankawrah siamin i lo awm tawh ang a, nangmah atangin midangten malsawmna an lo dawng chhawng zel bawk ang. 

Mi then khat chu kan tawngka chhuak te hi kan duh tui lovin kan fimkhur tawk lo hle a, midangte nun kan hliam fo thin. Kan tawngkam khatin mite nuna harsatna lian tak a thlen theih thu phei chu kan ngaihtuah lo hle a ni. A dawngsawngtu leh ngaithlatu tan pawha dawnsawn leh ngaihthlak tuitang lo tawngkam kan chhak chhuak hreh tlat thin lo hian kan chhehvela awmte mai bakah keimahni leh keimahni hial pawh anchhia kan lo inlawh tel reng a, mite hian kan bula awm leh khawsak hi an chak viau lem lo hial thin. Chutiang mite awm ve tawhna hmun apiang mai chu mite kal serh leh awm duh lohna hmun a ni fo thin bawk. Chuvangin keimahni avanga kan chhehvela miten harsatna an tawh hian keimahni ngei pawh hi anchhe dawngah kan insiam nghal tihna a ni ang. 

Tawngkam hman finkhur loh avangin miten nunna hial an lo chan phah fo tawh thin a, tawngkam hman fimkhur loh avang vekin miten harsatna lian tak an nunah an tawh phah fo thin. Chuvangin kan tawngka chhuak pakhat pawimawhzia hi ngaihtuah thleng pha thin ila, kan tawngkam pakhat chhuak turin midangte tan harsatna lian tak a thlen theih thu leh thihna hial pawh a thlen theih thu hi ngaihtuah thleng hmasa thin ila chuan tuna thlahdah taka kan hman thin tawngkam tha lo leh hrisel lo tak hi chu kan hmang rim viauvin a rinawm loh. Kan thiltih turah hian a sawhkhawk lo let leh tur lam ngaihtuah hmasa hauh lova kan tih puat puat hian nakin lehzelah keimahni ngei pawh min la tichhe vek thei thil keimahniah hian a inphum tel thei a ni tih hi kan ngaihtuah nawn hmasak fo a pawimawh a ni. 

Kan tawngka chhuak tur hi khawngaihna chi-a al hmasak a ni em tih hi kan inzawhna hmasa ber ni thin rawh se. Kan tawngka chhuak tur hi khawngaihna chi-a al hmasak a ni em tih hi kan inzawhna hmasa ber a nih thin loh chuan midangte tana malsawmna thlentu kan ni thei ngai lo vang. Keimah ngei pawhin ka pai tawih theih loh tur thu hrisel lo tak tak hi chu midangte pawh hian an lo pai tawih thei bik lo va, anchhia te phei chu tuman kan duh loh avangin a kal kual a kal kual a, a tawpah a lo chhuahna ngai bawkah a lut leh thin a ni. Chuvangin kan tawngka chhuak turah hian midangte tana malsawmna thlen thei tawngkam khawngaihna chi-a al nge a nih midangte tana chhiatna thlen theihna tur anchhia tih hi kan ngaihtuah hmasak fo a pawimawh. 

I taksa leh i rilru pawhin a ngeih loh tur tawngkam bawlhhlawh leh hrisel lo tak mai chu i thlarau tan pawh chaw tha tak a ni thei lo hrim hrim. Chu chu i mihringpuite hnenah hlan chhawn phet i tum a nih phei chuan midangte tan malsawmna thlentu ni lovin midangte tan anchhia thlentu i lo ni zawk tawh ang. I tawngka chhuak khawngaihna chi-a al pakhatin i mihringpui tana damna a thlen theih laiin i tawngka chhuak pakhat hrisel lo leh bawlhhlawh tak avangin i mihringpui tan thihna anchhia a thlen thei a ni tih hi hre reng ang che.