Zo Vapual

Ka pa fuihna leh zilhna tawngkam khat kha

C. Lalmuankima

Slough, United Kingdom

Nu leh pate zilhna leh fuihna tawngkam khatah hian an fate tana an hmakhua hun tur hi thui tak a innghat a ni.

Ka pa fuihna leh zilhna tawngkam khat kha ka tan hian a hlu zual bik em ni aw tih tur khawpin ka rilru chhungril ber thlengin min fan a, vawiin thlengin ka theihnghilh thei tawh lo va, chu chuan ka nun hi min fuihin min khalh kal nasa hlein ka hria. 

Photo: Google Image 

Tum khat chu Pathianni tukah tukthuan ei tura chhungkuaa chawhlui kan kilho taih hnuah unau inhnialna a lo chhuak a, kut inthlak duh hial khawpa thinurna a lo chhuak ta hial a, chuta ka pa tawngkam vawiin thlenga ka la chhinchhiah tlat leh vawiin thleng pawha ka nuna thu la sawi rengtu chu, "In zak lo em ni, unauza in ni a, hetiang tur a ni ngai lo, in ei tur chawhlui tal hi zah ta che u, in nu leh pate awmlai maha hetianga in inhauh va, kut hial in inthlak duh chuan kan awm tawh loh hnuah phei chuan engtiang khawpin nge in nasat ang tih pawh ngaihtuah ngam loh khawpa in awm hi in zak lo em ni?" a tih khan chaw pawh ei chhunzawm thei tawh lovin min siam a, tuihmun lamah ka chawthleng ka chawi phei a, ka thleng ka sil mek laiin ka mittui hi a rawn dir thla zawih zawih a ni. Khami atang khan a tul lo thleng thlenga unau inhnial vak vak leh invelh hialte hi thil atthlak tak a ni tih min hriattir a, thenawm khawvengte hmuhah pawh a lo zahthlak hle dawn a ni. 

A hunlai kha chuan ka pa tawngkam khan ka rilru chhungril ber thlengin min velin a na ka ti a, vuak hrep ai pawhin ka na zawk hial mai thei. Mahse tun hnua ka ngaihtuah letin ka pa khan a fate hmuh aia a let eng emaw zata thui a lo hmu a, unau inngeih dial diala awmin rah tha a chhuah mai bakah unau piangtlang zingah inpumkhatna tha zawk a siam a ni tih kha a lo hmu tlang vek a nih hi tih hi a ni. Ka han sawi tum tak zawk chu Mizo chhungkuaah chuan chhungkuaa chawhlui kan kilho hi chawhlui kilho satliah a ni lo va, infuih ngaite infuih a, inzilh ngaite inzilh hun remchang atan kan hmang thin. Chu hun tha chu miin a ngaih pawimawh loh va, chhungkaw member-ah pawh tel ve lo ang maia chhungkaw chawhlui kilho a ngaih pawimawh loh phawt chuan chumi chu chhungkua atangin a tawlh bo thuai thin a ni.

Chhungkaw thiltihhona ngaih pawimawh fo hi chhungkaw ngel nghet siamna a ni a, inlungrualna leh inpumkhatna tha min siamsak bawk. Miin a chhungkaw thiltih a ngaih pawimawh loh ni apiangah a chhungkua atangin a tawlh bo thuai thin a, chhungkuaa inremlohna leh inlungruallohna thlentu a ni thuai thin. Chuvangin chhungkaw ngel nghet siam tur hian a chhunga chengten inlungrual taka thiltihho dial dialnaah hian a innghat a tih theih a ni. 

Chhungkuaah pain a thuneihna a hmanna turah pawh hman nachang hre lo leh hmang duh lo chhungkua an awm leh thin avang hian an fateah fa sual leh tha lo an lo chhuak thin a, chu chuan khawtlang leh kohhran, ram leh hnam thlengin a nghawng pawi ta thin a ni. Pa chuan chhungkaw ei leh bar tur zawn hna a thawh mai bakah a fate zilh leh fuih ngai an awm chuan a zilhin a fuih thin tur a ni ang. Chuti ni lova a en liam mai mai a nih chuan chhungkaw chhiatni bul thlentu a ni thei. Fate zilh leh fuih hunlaia en liam mai mai chuan a tawpah a chhungkuaah harsatna a tawk fo thin reng a ni. Fate zingah zilh ngai leh fuih ngai lo khawpa fa fel leh tha an awm a nih chuan thu lawmawm tak a ni ang a, amaherawhchu fate zilh leh fuih ngai lo khawpa fa fel leh tha chu tlem te an ni thung. A chhan chu mihring hi inzirtira inkaihhruai ngai thin kan ni a, a then phei chu inhrilh reng chung pawha la ti tha duh lo an awm fo thin. Chutih hunah chuan pain a dinhmun a luah zawh a pawimawh a, a fate tan entawntlak takah a insiam fo thin tur a ni. Mahni fate tan pawha entawntlak taka kan insiam/awm loh chuan midangte tan chuan entawntlaka insiam a har tawh ngawt ang. Mi zawng zawng entawntlak takin kan insiam/awm thei lo a nih pawhin kan fate tan tal hi chuan entawntlak taka insiam/awm fo tur a ni. Fate hian nu leh pate nunphung leh khawsak zia hi kan la tam ber a, nu leh pate nun atang hian thil tam tak kan zir chhuak thin. Chuti a nih chuan kan fate hian kan nun atangin thil tha nge zir chhuak se kan tih thil tha lo tih hi kan inenfiah fo a pawimawh ang.

Pa chuan chhungkuaa a thuneihna a kenkawh dan a thiam fo a pawimawh bawk ang. Chhungkaw pa ber ka ni alawm ka thu thu tih ngawt theih a ni lo va, thuneihna hman sual palh pawh a awm thei. Chuvangin chhungkuain kan tangkaipui tur ngei lamah hian pa chuan a thuneihna kengkawh thiam thin se la, chhungkua pawhin malsawmna a dawng thin a ni. Pa tam tak chuan an fate chunga thuneihna hmang sualin 'Ka tawngkam khata chhe vek thei i nih kha aw....' tiin fuihna thu tha inhrilh pawh awm chuang si lova a tul lo thleng thlenga fate vo leh tihthaih an ching thin a, hei hi thil tha ber erawh a ni lem lo. Kan tawngkam khat avanga kan fate chhe vek thei an nih chuan kan tawngkam khat fuihna thu tha avanga kan faten malsawmna an dawn theihna lam hi kan ngaihtuah hmasak tur leh kan sawi uar tur a ni zawk dawn lawm ni? Kan tawngkam khat avanga kan faten an dam chhunga an thatpui tur thu sawi fo hi kan tih tur a ni mai dawn lawm ni? 

Tianga invuak hrep aia lut thuk zawk thu hian mihring nun hi min lo khalh kal mah zawk a, hringnunah puitlinna min siamsak fo thin. Pate fuihna leh zilhna tawngkam khatah hian an fate tana an damchhung daih tur thu tha tak tak a lo inphum ru reng thin a, chu chu ngaihtuahna fim tak nena ngaihtuah chet chet chuan fate tana thu lawmawm tak a ni. Fate sualna pawh zilh lem lova en liam ve mai mai thin pa kan nei a nih chuan chhungkaw tan thil lungchhiatthlak tak a ni zawk ang. Chuvangin pate fuihna leh zilhna tawngkam khat hian an fate chungah thu a va sawi ring tak em! Chu chu chhungkua pawhin a mamawh berte zing ami a ni a, pate zilhna leh fuihna tawngkam hi fate mai bakah chhungkaw tan pawh malsawmna a ni a tih theih a ni.