Zo Vapual

Chawmhlawm Thalai

C. Lalmuankima

Slough, United Kingdom

Kut ke kim biai, pian phunga rualbanlo pawh ni si lo, an duhna zawnah chuan zah nachang hre lo khawpa artial nghal khawpa nghal thiam, an duhlohna zawnah erawh chuan nawrluih chung pawha kal tha duh lo leh chet lak tum hauh lo thalaite hi chhungkua, kohhran leh khawtlang tan hian an va manhla lo tak em! Chhungte chawmhlawm ringawt a hun khawhral thak thak thin thalai kan la kawl teuh chhung chuan kan hnam hian hma a sawn mawh hle ang.

Windsor Castle
Photo : Martin (Zo Vapual) 

Tunlaiah khawvel hmasawnna leh changkannain a thopa zuana a chak thei ang bera min thlawhpui dawr dawr lai hian awmhmunah chhungte chawmhlawm chawpa kan lo in la champ vel mai mai a nih chuan a pawi ngawt ang. Mahnia hna chhe te neih hi hna nei lova awm awl aiin mi zahawmah min siamtu pawimawh tak a ni tih hi kan inhrilh hriat nawn awn awn atan a tha a ni. Kan thalaite zingah mahnia hna neih chu sawi loh, chhungten an biak rem sa pawh thawk tha peih hauh lo sawi tur an awm fo thin hian ka lung an tichhe thin tak zet a ni. 

Mi tam tak chuan chhungte chawmhlawm nih pawh hi zah nachang zu hre hauh lo va maw le! Thawh chhuah sawi tur pakhat mah nei hawt si lo hian mamawh hi kan tina ve em em bawk si a, zuk leh hmuam ni se la mahni intodelh chu sawi loh, a baa lak kan la huai em em zel mai te hian khua a tivar thlawt lo a ni e. A baa lak kan huai tluk te hian taima ta ila chuan chhungte chawmhlawm ngai lovin chhungte chhawmdawltu kan ni thei zawk ngei ang. 

Thalai ni ve si, chhungkaw mamawh kar awl dah khattu atan pawh kan tangkai lo a nih chuan a zahthlak hle ang a, thalai kan nihna kan pu zo lo hle tihna a ni bawk ang. Thalaite hi chhungkaw innghahna kakpui pawimawh kan ni tih hi kan hriat reng atan a tha. Chhungkaw innghahna leh khaidingtu tur berin innghahna tlaka kan awm lo a nih chuan kan dinhmun kan luah zo lo hle tihna a ni ang. Chhungkaw tana a kila lung tangkai berte zing ami turin chhungkaw eichhetu leh titlabaltuah kan tang a nih chuan chhungkua hian dinchhuah tih a nei thei dawn lo a ni. Chuvangin chhungkaw tana a kila lung tangkai berte zing ami kan ni thei lo a nih pawhin chhungkaw mamawh kawng khat tala khahchhilhtu nih ve theih i tum fo vang u.

Chhungte chawmhlawma awm reng hi zah nachang i hria ang u. Chhungte chawmhlawm thalai kan tam lutuk hian chhungkua leh kohhran leh khawtlangah hma kan sawn tur ang pawhin hma kan sawn chak theih loh phah fo thin a, chawmhlawm thalai nih hi zah nachang hriain sim hmak i tum ang u.

Chhungkua leh kohhran leh khawtlangin a neih rohlu ber chu thalaite hi kan ni tih hi kan hriat reng atan a tha. Thalaiten ke an pen a, hma an lakna zawn apiang chu a kaw duak duak thin a, khawvelin a neih rohlu ber pawh thalaite hi kan ni tih i hria ang u. Chutianga khawvelin a neih rohlu ber chuan awmhmunah thatchhiat hna kan lo thawh hian kan inhmeh lo hle tihna a ni. 

Thalai nih leh thatchhiat hi a inhmeh lo hle a, chhungte chawmhlawm thalai nih phei chu a inhmeh lo lehzual. Chuvangin chhungte chawmhlawm thalai ni lo va, chhungte chhawmdawltu thalai nih fo i tum zawk ang u. Tichuan thalai kan nih chhan kan tifamkim ang a, chhungkua leh kohhran leh khawtlang tan kan manhla dawn a ni.