Zo Vapual

Neitu rilru pu thin ang che

C. Lalmuankima 

Slough, United Kingdom

Kan thiltihnaa kan hlawhtlin theih lohna chhan hi han ngaihtuah chiang ila, neitu rilru kan put thin loh vang a ni duh khawp mai. Neitu rilru i put phawt chuan i chhugkaw hlimna leh hlimlohna te, i chhungkaw hmingthat leh hmingchhiatna te kha i kutah a awm tih i hria ang a, chu chuan thil tha ti turin a khalhkal fo vang che.

Photo: Google Image

Neitu rilru kan pu a nih chuan kan ram tana tha tur hi kan ngaihtuah ve tur a ni. Kan ram chhunga hnam dang va huata va velh chiam tum lam a ni lo va, neitu rilru kan pu tak tak a nih chuan kan khawtlang tana thil tha tur hi kan ngaihtuahho zawk tur a ni. Khawtlang siamthat hna thawktute sawisel fo chin te hi a tha lo va, kan khawtlang kan hmangaiha neitu rilru kan pu tak tak a nih chuan kan khawtlangin a mamawhna zawna a kila lung tangkai tak kha nih ve mai tum tur a ni. Neitu rilru pu tlat chunga ram leh hnam, kohhran leh khawtlang kan hruai a nih loh chuan ram leh hnam, kohhran leh khawtlang hmangaihna tak tak kan nei lo tihna a ni ang. Chuvangin ram leh hnam, kohhran leh khawtlang hmangaihtu tak tak te chuan a sawia sawi that piah lamah hian neitu rilru puin a takin an thawk tak tak thin a, chutianga thawktute zarah chuan vawiin thlengin ram leh hnam sawi tur kan lo nei ve thei chauh a ni.

Ram leh hnam kan hmangaih tak tak a nih chuan neitu rilru kan pu thin tur a ni. Neitu rilru pu lo chuan ram leh hnam siamthat hi a har khawp mai. Miin neitu rilru a put tlat chuan a ram leh hnam hmingchhiatna lo thleng tur lakah huaisen takin a indang ngam thin. Neitu rilru kan put loh chuan kan ram leh hnam hi hnam dang kutah pawh tlu mah sela pawi tihna kan nei chuang lo vang. Chu tak mai chu neitu rilru put a tulzia leh pawimawhzia kan inzirtir chhan pawh a ni.

Kan ram leh hnam tan hian tih theih kan nei lo a nih pawhin kan ram leh hnam tana mi hnawksak nih i tum lo hram thin ang u. Ram leh hnam siam tha tura hmalatute hi sawisel mai lovin neitu rilru pua siamthat ngai kan tih apiangte chu intanpui tawnin ram leh hnam hmasawnna atan theih tawp chhuah i tum zawk ang u. I tu leh fate tan sum leh pai, rohlu tha pui pui i hnutchhiah teuh ai khan ram leh hnam hmangaihna thinlung nei tlat tura i zirtirna khan nakin lehzelah anmahniah rah tha a chhuah zawk dawn a ni. I tu leh fate tana sum leh pai, in leh lo tha pui pui i hnutchhiah ai khan an hringnunah ram leh hnam hmangaihna thinlung i tuh ngheh a, neitu rilru pu fo tura i zirtirna khan an awm tawh loh hnuah pawh an thiltihin midangte tan rah tha a la chhuah zel dawn a ni.

Neitu rilru kan pu chunga thiltih hi a hlawhtling duh hle thin. Kan hnathawhna kawng tinrengah pawh neitu rilru pu rana thahnemngai taka kan thawh hian inthlahdahna a bo va, hringnunah hlawhtlinna parmawi kan chhuah thin a ni. Neitu rilru kan put phawt chuan kan hnathawhna kawng tinrengah thahnemngaih a na a, tihthat loh kan hlau va, a tha thei ang berin kan thawk thin a, chu chuan mi hlawhtling takah min lo siam ta thin a lo ni reng mai. Kan tih theih piah lam hi chu tuman min beisei thiang lo va, kan tih theih chin chinah erawh neitu rilru pu chunga kan thawh phawt chuan hlawhtlinna chu kan lam tangah kan siam nghal tihna a ni. Chuvangin neitu rilru put fo hi hringnunah pawh hlawhtlinna kailawna min lawntirtu rahka pawimawh tak a ni fo.

Thiltihnaa neitu rilru pu lo leh neitu rilru put nachang hrelote bawk hi a ni an hnuhma phuai thin ni. Chutiang mite chu engtikah mah an hlawhtling ngai lo bawk ang. Chuvangin kan hringnunah hian mahni tawka hlawhtlin kan tum a nih chuan kan thiltihna kawng engkimah neitu rilru kan put a pawimawh a, chu neitu rilru chuan thahnemngaihna min siamsakin kan thawh chhun chhunah rah thlamuanawm tak min chhuahsak dawn a ni.

Eng hna pawh thawk mah la, neitu rilru pu rana i thawh chuan nangma tawkah i hlawhtlin lohna tur a awm lo vang. Neitu rilru pu tih avanga thuneih chiam tum lam a ni lo va, neitu chan chang tak neitu nihna rilru khan min phuar beh tlat avangin a inthlahdah theih loh va, thahnemngaihna lian tak min siamsak zawk thin a ni. Hringnun hlawhtlinna atana key pawimawh tak mai chu thiltihna kawng engkima neitu rilru put hi a ni a, chu thuruk chu theihnghilh ngai suh ang che.