Zo Vapual

Thiam thar nei ringtu nun chu

C. Lalmuankima

United Kingdom

Rev. Vanlalzuata chuan, 'Ringtute chu Isua kan zui rei tial tial a, thiam thar kan nei tam tial tial thin.' tiin a sawi a. Ringtu ni ve si, hmasawn miah lo kan nih chuan kan pianna hmun a fuh tawk lo tihna a ni ang. Ringtu chuan thiam thar a neih thin avangin a thlen chin atangin hma a sawn thin (Phil 3:16). Thlen chin chin atanga hmasawn hi ringtu nun puitling neihna pawimawh tak a ni.

Photo: Google Image

Nu nau pawm chuan an faten thiam thar an neihin hahipin an sawi thin a, an lawm em em thin. 'Ka fa chuan lawm a hre tan...' 'Ka fa chu a thu thei tan... ' 'Ka fa chu a kal thei tan...' tiin an fate thil thiam tharah khan an lawm em em thin a ni. Chutiang chiah chuan ringtute pawh hi kan nitin nunah hian thil thiam thar kan neih hian van Pathian khi a va lawm dawn tak em! Kan nitin nunah hian tawngtai taimak kan thiam thar em, mite rel chin thin bansan lamah kan nun a thanglian em, mite chunga rilru tha putah thiam thar kan nei em, kan chhehvela mite chunga that chhuah kawngah hma kan sawn em....etc. mahni leh mahni kan inenfiah fo a pawimawh a ni.

Mithiamte chuan Awle (Crocodile) hi a thih ni thlengin a thang lian a ni an ti a, Awle hi ringtu nun nena tehkhin a ni thin. Ringtute pawh hi kan thihni thlengin Krista anna kawngah kan thanglian a, a famkimna chu van kan thlen hunah kan hmu dawn a ni. Thiam thar nei lo ringtu kan nih chuan kan ngaihtuahawm ngawt ang. Chuvangin ringtu chu kan thihni thlengin Krista anna kawngah kan thanglian a, vanram kan thlen hunah chiah famkimna Krista nun kan chenza dawn a ni.

Philippi 3:12-16 kan en chuan, 'Hmu tawh reng inti ka ni lo va, famkim tawh reng inti pawh ka ni hek lo; Krista mi man chhan ka man thei dah law maw tiin a umin ka um zawk a ni...' tiin Tirhkoh Paula, a hunlaia rawngbawltu hlawhtling tak leh kum tam tak Lalpa tana lo thawk tawh pawh khan hmu fuh ber leh famkim berah a insawi ngai lo va, famkim tawhah pawh a inngai hek lo. A la hmuh tlemzia hriain Krista man chhan chu man tumin tiam chin lam pana a tlan talh talh thu a sawi zawk a, dik ber leh hmu fuh berah a inngai reng reng lo.

Hmu fuh ber leh dik bera kan inngaihna hian ringtu nunah hma min tisawn thei lo thin a ni. Hmu fuh ber leh dik leh famkim bera inhriatna hi sual hnathawh chi khat a ni fo thin a, chu chuan chapona sualah min luhpui thuai thin. Kan nunah ngai awh reng kan nih chuan hma kan sawn lo tihna a ni zel. Chuvangin ringtu nun chu ngai awh reng aiin hma lam pan zel nun a ni a, ringtu chuan a nitin nunah zir a neiin thiam thar a nei zel thin a ni. Ringtu nuna zir nei lo leh thiam thar nei lo nun chu midangte tan pawh malsawmna a nih theih loh. Nitin nuna thiam thar nei lo leh hmasawn tum lo ringtu kan nih chuan ringtu azawnga ringtu sawngnawi ber kan ni ang. Tehkhin thua kan sawi angin naute chuan nitin thiam thar a nei thin a, naute thiam thar nei lo chu naute sawngnawi tak an ni thin ang hian ringtute pawh hmasawn tur nei lo leh hmasawn tum lo (thiam thar nei lo) te hi ringtu nuna ringtu sawngnawi tak an ni thin. Chuvangin ringtu chuan a nitin nunah thiam thar a nei thin a, Isua a zui rei tial tial a, Isua anna kawngah a thanglian tial tial thin a ni.

Kohhran leh mimal nunah pawh hian a ni tho tho. Kohhran leh mimal nunah pawh ngai awh che chea kan awm a nih chuan hma kan sawn lo tihna a ni. Kohhran leh mimal nun pawh hma thar kan lak loh chuan kohhran leh mimal nunah hmasawnna a thleng ngai lo. Chuvangin kohhran leh mimal nunah pawh hian thlen chin atanga hmasawn tur kan nih angin hma thar kan ngaihtuah fo a pawimawh hle ang. Pathian rawn chung zela kal erawh a finthlak ber bawk ang. Lalpa rawn lova mahni thahnemngaihna hmanga hma lak vak hi a awm ve theih a, chu chuan rah tha a chhuah chuang lo va, rah tha chhuah a hnekin kan nuna hmasawnna tur min daltu nget lian tak a ni thei ve bawk a ni. Lalpa tirh lohva kal te hi a va hlauhawm dawn tak em! Lalpan min dahna hmuna awm lohva Lalpan min tirhna hmuna kal loh hi a hlauhawm em em a, chutianga kan tih loh ni apiangah kan nun pawh mahni leh mahni anchhia kan inlawh tihna a ni. Lalpa Pathianin min dahna hmunah hian rinawm tak leh thuawih taka awmin thawk thin ila, tichuan a hun takah Lalpan kan thawhrim rah min sengtir zel dawn a lo ni reng mai.

Ringtute hi kan thlen chin leh kan dai chin a inchen vek lo mai thei. Amahaherawhchu kan thlen chin inthuhmun vek lo mah sela, kan thlen chin chin atanga hma kan sawn kha Lalpa tan kan tih theih ropui ber a ni thung. A then chu kum tam tak kal ta a piangthar tawh leh thlarau lam nunah pawh ringtu nun puitling tak nei tawh te an ni ngei ang, a then erawh chu nimin lama thlarau lama mit keu ve hlawl te chauh pawh an awm ngei ang. A pawimawh ber mai chu kan thlen chin chinah hmasawnin thiam thar nei zel ila, tichuan Krista anna kawngah kan thanglian zel dawn a lo ni. Lalpa avangin a tha lama thiam thar neih lamah hian i intihhmuh sauh sauh vang u. A tha lo leh kan nun min tichhe vek thei tur thiam thar neih lamah erawh insum hram hram bawk ila.

Mahni mimal nunah te, kohhranho zingah te, kan chenpuite, kan thawhpuite, kan zirpuite nen kan inkar thlengin hmasawnna nei lo tur kan awm lo vang. Nitin thiam thar neia hmasawn zel tur kan nih angin hma lam pan zai kan rel tawh loh ni apiang kha kan nunah sawngnawina leh rona a lo thlen ni a ni mai dawn a ni.