Zo Vapual

Vision (hmathlir) nei thin rawh

C. Lalmuankima

Newcastle, United Kingdom

Vision leh target nei lo mihring reng reng chu mi hlawhtling an awm ngai lo...an lo tih angin vision (hmathlir) i neih loh chuan i hringnunah khan engtik lai mahin i hlawhtling ngai lo vang. A chhan chu i tum ram ngeia hruai thleng theitu che awm chhun chu i vision kha a ni.

Photo: Google Image 

Vision nei lo chu lawng karfung nei lo angin an lo tehkhin fo thin a. Lawng karfung nei lo chu thliin a chhemna lam apiangah a kal thin a, a tum ram a thleng ngai lo angin vision nei lo mihring chu lawng karfung nei lo angin miten an sawi apiangah an awih mai zel a, an rilru a nghet lo va, engtik lai mahin an tum ram an thleng ngai lo a ni. Chuvangin i tum ram ngeia i thlen theih nan vision nei thin ang che.

Vision han tih hian thenkhat chu kan rilruah hian kan ngai ropui lutuk thin nge aw ka ti thin. Kan thalai tam tak te zingah 'Engnge i vision?' ‘Tun hnu kum 5-10 lo awm turah engnge tih i tum?’ tia zawhna ka zawh chang hian 95% aia tam chu vision sawi tur nei mumal lo kan ni thup mai a, a lungchhiatthlak ka ti khawp mai. A tam zawkin min chhanna chu 'Ka nei lo....' 'Ka hre lo...' ‘Chutiang lam chu ka lo ngaihtuah ngai hauh lo….’ tih hi a ni tawp zel mai a, lungchhiatthlak tak a ni ringawt. Hnam pui zawka kan ngaih Sap naupang leh thalai thenkhatte hi ka zawt ve thin a, anni chuan an vision an sawi nalh nalh thei a, an thiltih tum leh an thlen tumah an chiang a tih theih awm e. Anni chuan tunhnu kum 5-10 inkara an nih tum an sawi nghal fak fak thei hi an hringnun hlawhtlinna kawnga anmahni khalhkaltu pawimawh tak chu a ni chiang mai.

Vawi leh khatah thlawhna siam chhuak tura vision ropui tak nei turin ka phut hauh lo che, amaherawhchu thlawhna siam chhuaktute neih ang thluak i nei ve a ni tih erawh theihnghilh hauh suh ang che. Vision chhe te tal i neih kha i hringnun hlawhtlinna bul intanna tur kawng dawh zawmtu pawimawh tak a ni tih hi i hre reng dawn nia. I thiltih tumah i chian hmasak phawt loh chuan i thiltih tum a tak ramah i cheng lo tihna a ni ang. Chuvangin vision han tih avanga eng emaw ni thil ropui tak i rilruah lo lang lo se la, ropui tak tak te lo chhuah theihna hi thil tê tak tê atangin a intan fo a ni tih hi hria la, i hringnun kawngah i lo hlawhtlin theih nan vision chhe tê tal nei thin ang che. Vision neih nachang hre miah lote aiin vision nei thinte chu an hlawhtling nge nge thin a ni.

Vision neih a thatna chu kan vision hian min lo khalh kal nasa khawp mai a. A changin thatchhiatna lo thleng tur pawh vision avangin min pawt kal hram hram thin a ni. Chuvangin i hringnun hlawhtlinna kailawna hnuk thleng theu tur chein i vision kha a hnukkaltu pawimawh tak a ni tih hriain vision nei thin ang che.